←  Genesis (22/50)  →
1. Chuong thil hnunga chun Pathienin Abraham a fie a. A kuomah, "Abraham" a ta, ama chun, "Hi taka hin ka um" a ta.
2. Chuongchun, Pathienin, "I naupa, i naupa nei sun Isak, i hmangai kha thuoi la, Moria bielah fepui la, chu taka tlang pakhat ka kawkhmu chea chun pumraw inthawinaah inhlan rawh" a ta.
3. Abraham chu zing inhma takin a tho a, a sabengtung a siem fel a, a siehlaw pahni le a naupa Isak chu a thuoi a. Pumraw inthawinaa hmang ding thing an nga hnung chun Pathienin a hril tlang tieng chu an pan a.
4. Ni thumnaa chun Abraham chu a hang dak a, an fena hmun ding chu ralah a hei hmu a.
5. A siehlawhai kuoma chun, "Kei le naupang chauh saw tlanga son va feng kan ta, nangnin sabengtung leh hi taka hin mi lo nghak ro. Pathien chawibiek kan ta, chu zoah hung kir nawk kan tih" a ta.
6. Abraham chun pumraw inthawinaa hmang ding thing tel chu a lak a, a naupa Isak chu a'n puttir a, ama chun mei le chemte a chawi a, an pahni chun an fe ta a.
7. Isak chun a pa Abraham chu a biek a, "Pa" a ta. Ama chun, "Iem, ka naupa?" a ta. Isak chun, "Hi, mei le thing chu a um a, sienkhom pumraw thilhlan ding beram te chu khaw lai am a um?" a ta.
8. Abraham chun, "Ka naupa, Ama kuoma pumraw thilhlan ding chu Pathienin mi hung pe el a tih" a ta. An pahni chun an fe ta pei a.
9. Pathienin a hrilna hmun an tlung chun Abrahamin maicham a siem a, a chungah thing a sep khawm a. A naupa Isak chu a khuop a, maichama thing chunga chun a'n zaltir a.
10. Abraham chun a chemte a ban a, a naupa sun hlum dingin kut a hlang a.
11. Sienkhom, LALPA vantirko chun vana inthokin "Abraham, Abraham" tiin a zuk ko a. Ama chun, "Hi taka hin ka um" a ta.
12. Vantirko chun "Naupang chungah khan kut thlak naw la, a chungah ieng khom thaw naw rawh. I naupa, i naupa nei sun ngei ngei khom mi pek i'n ro naw leiin Pathien i ti takzet ti tu hin ka hriet tah" a ta.
13. Abraham chu a hang dak a, ngai ta, beram chal, chimbuka a kia intang chu a hmu a. A va pan a, beram chal chu a man a, a naupa aiin pumraw thilhlanah a hmang a.
14. Chuleiin, hi hmun hi Abraham chun 'Jehova-jire' (LALPA Phuhrukna Tlang) tiin a'n buk a. Tu lai chen khom hin, "LALPA tlanga chun aman phuhruk a tih" an ti hlak a nih.
15. LALPA vantirko chun vana inthokin Abraham chu a hung ko nawk a,
16. "I naupa, i naupa nei sun ngei ngei khom inro loa hi thil hi i thaw leiin kei, LALPA ngei hin ka hming salin thu ka'n kham a nih.
17. Mal sawm ngei ngei ka ti che a, vana arasi le tuifinriet kama tieuvut anga tamin i thlahai la sukpung ka ta, i thlahai chun anni dotuhai khawpui chu la hluong an tih.
18. Ka thu i awi leiin, i thlahai hmangin hnuoia hnam tinin malsawmna la chang an tih" a ta.
19. Chuongchun, Abraham chun a rawihai chu a zuk fin nawk a, Beer-sheba panin an suok a, Beer-shebaa chun Abraham chu a um ta zing a.
20. Chu hnung iemani chena chun Abraham kuomah, "Milka khomin i sang Nahor kha nau pasal iemani zat a neipek" tiin miin an hung hril a.
21. A upa tak chu Uza a na, a sanghai chu Buza hai, Aram pa Kemuel hai,
22. Cheseda hai, Hazo hai, Pilda hai, Jidlaf hai le Bethuel hai an nih
23. Bethuel chu Rebeka pa a nih. Milka chun chuong naupa pariet chu Abraham sangpa Nahor a neipek a nih.
24. A hmei, a hming Reuma khomin naupa Teba hai, Gaham hai, Tahas hai le Maaka hai a neipek bok.
←  Genesis (22/50)  →