←  Genesis (21/50)  →
1. A hril tah angin LALPA chun Sari chungah zangaina insuoin, a thu tiem tah angin a chungah a thaw a.
2. Sari chun nau a pai a, Pathienin a kuoma a hril hun taka chun tar hnungin Abraham chu nau pasal a neipek a.
3. Sarin a neipek a nau pasal hmingah chun Abraham chun 'Isak' a sak a.
4. A naupa Isak chu ni riet a tling charin, Pathienin thu a pek angin a ser a tanpek a.
5. A naupa Isak a pieng chun Abraham chu kum zaa upa a ni tah.
6. Sari chun, "Pathienin a mi suknui a, hi thu hre taphot chun mi'n nuipui veng an tih" a ta.
7. A hril pei a, " 'Sari'n naute la pom a tih' ti tuin am Abraham kuomah an hril telul ding? Sienkhom a tar hnungin nau pasal ka neipek ta hi!" a ta.
8. Naute chu a hung inthang lien a, nene nek an inbantir ni chun Abrahamin ruoi ropui tak a the a.
9. Aigupta mi Hagar naupa, Abraham ta dinga a neipek chun a nuisaw lai chu Sari'n a hmu a,
10. Abraham kuomah, "Hi bawinu le a naupa hi hnot suok rawh; hi bawinu naupa hin ka naupa ro hluopui thei naw nih" a ta.
11. A naupa chungchang thu chun Abraham chu nasa takin a sukbeidong a.
12. Sienkhom, Pathienin, "Naupang chungchang thu le iI bawinu chungthu hin i lung sukrim naw raw se. Sari ti ang ang chu zawm rawh, a san chu Isaka inthokin i thlahai chu an sui ding a ni si a.
13. Bawinu naupa khom hi hnam ropui takah siem ka tih, i thlaa mi a ni tlat leiin" a ta.
14. A tuk zingkar chun inhma takin Abraham chu a tho a, beiper le savun tuium, tui thun sip chu Hagar a pek a, a liengkoa chun a'n chuonpek a, naupang le chun a tir suok tah a. Chuongchun an fe a, Beersheba thlalera chun an invak an invak a.
15. Tuiuma tui an dawn zo chun, naupang chu hlo buk hnuoiah a sie a.
16. Iemani chena hla, thal kap phak vela chun a thung chot a, lungrilin, "Ka naupa thi ding chu ka en ngam lul nawh" a ta, inhniek hlop hlopin a tap a.
17. Pathienin naupang tap ri chu a hriet a. Pathien vantirko chun vana inthokin Hagar chu a zuk biek a, "Hagar, iem i chang an ta le? Ti naw, saw taka naupang zal tap ri chu Pathienin a hriet.
18. Tho la, naupang saw kei tho la, i kutin chel rawh, hnam ropui takin ka la siem ding a nih" a ta.
19. Chu phing leh Pathienin a mit a hongpek a, tuikul a hmu a, a va pan a, tuiuma chun tui chu a thun sip a, naupang chu a'n dawntir a.
20. Pathienin naupang chu a umpui a, a hung seilien pei a, thlalerah a um hlak a, thal kap thiem mi a hung ni ta a.
21. Paran thlalera an um lai chun a nuin Aigupta mi nuhmeiah a'n neitir a.
22. Chuong lai chun Abimelek le a sipai hotu Fikol chun Abraham kuomah, " I thilthaw iengkimah Pathienin a umpui che a.
23. Kei le ka nauhai le ka thlahai chu thukhela indawrpui der lo dingin tu hin Pathien hmaah inkham meuin thu mi tiem rawh. I chunga lunginsietna ka'n langtir ang bokin, mikhuol anga i chengna ram hi lunginsiet ve dingin thu intiemkam bok rawh" an ta.
24. Abraham chun, "Awleh, ka'n kham" a ta.
25. Chun, Abimelek siehlawhaiin tuikul an pawnglak leia a lungni nawna thu chu Abrahamin Abimelek kuomah a hril a.
26. Abimelek chun, " Chu chu tu thaw amanih ti ka hriet der nawh. Hi thil hi a hmain i mi hril ngai si naw a, tu hi ka hriet voi khatna a nih" a ta.
27. Chuongchun, Abraham chun beram le bawng ruol a hung thuoi a, Abimelek kuomah a pek a, an pahni chun thu an thlung ta a.
28. Abraham chun a beram ruol laia beramte, a la ngot pasari a sie hrang a.
29. Abimelek chun Abraham kuomah, "Beram te, a la ngot pasari a hrana i sie hi ieng lei am a na?" a ta.
30. Abraham chun, "Hi tuikul hi keima cho ngei a nih ti i mi hrietpuina dingin hieng beram te, a la ngot pasarihai hi ka kuta inthokin i lak ding a nih" a ta.
31. Chu thil lei chun chu hmun chu Beer-sheba an inbuk a nih, an pahniin chu hmuna chun inkhama thu an thlung leiin.
32. Beer-shebaa thu an thlung zo chun, Abimelek le sipai hotu Fikol chu Filistinhai ramah an kir nawk a.
33. Beer-shebaa chun Abrahamin tamaril thing a phun a, LALPA, Chatuon Pathien hming chu a lam a.
34. Abraham chu Filistinhai ramah sawt tak a um a.
←  Genesis (21/50)  →