Genesis (20/50)  

1. Chu taka inthokin Abraham chu Negev tieng a'n son a, Kades le Sur inkarah umhmun a khuor a.
2. Gerar-ah iemani chen a um laiin Abrahamin Sari chu "Ka farnu a nih" a ti leiin Gerar lal Abimelek chun a nuhmei dingin Sari chu a va'n thuoitir a.
3. Nisienkhom, zana chun Abimelek mangah Pathien a hung a, "Ngai ta, i nuhmei thuoi lei hin thi ngei i tih, mi nuhmei a ni si a" a ta.
4. Abimelek chun ama nu chu a la tawk hman naw a, "LALPA, poi tawk lo mihai i sukhlum ding maw?
5. Ama ngei khomin ka kuomah, 'Ka farnu a nih' a ti naw am a ni? Chun, amanu ngei khomin, 'Ka tapa a nih' a ti bok si a. Sie le tha hrietna inthieng tak le kut fai takin hi thil hi ka thaw a nih" a ta.
6. A manga bok chun Pathienin, "A nih, lungril inthieng tak puta i thaw a nih ti ka hriet leiin, kei khomin ka chunga thil suol i thaw ding chu ka khap che a, chu leiin i tawk ka phal naw a nih.
7. Tu hin mi nuhmei kha pe kir la, ama chu zawlnei a na, tongtaipek a ti che a, hung dam i tih; i pek kir naw ruok chun nang le i thil nei po po leh thi ngei i tih" a ta.
8. Zingkar chun Abimelekin a khawnbawlhai po po a ko khawm a, a chunga thil hung tlung chu a hril a, an ti tawl hle a.
9. Chu zoah Abimelek chun Abraham chu a'n ko luttir a, a kuomah, "Ka chungah ieng thil top am a na i thaw hi?
10. I poi ieng am ka tawk a, hienga kei le ka lalram chungah thiemnawna rapthlak tak i hung intlun ta hi? Thil thaw lo ding tawp ka chungah i thaw a nih. Iem a na hienga i thawna san?" a ta.
11. Abraham chun, "Hi hmuna hin Pathien tina nei mi an um ka ring naw leiin, ka nuhmei lei hin mi that an tih ti ka tithawng lei a nih.
12. Chu bakah, ka farnu a ni hrim a, pa hmun khat, sienkhom nu tum kan na, ka nuhmei a hung ni ta pei a.
13. Ka pa ina inthoka Pathienin a mi'n vakvaitir lai khan a kuomah, 'I mi hmangaizie i'n langtir dan ding chu hieng ang hin a nih: ei tlungna hmun taphotah 'Ka tapa a nih, ti pei rawh' ka ti ta sa hrim a nih" a ta.
14. Abimelek chun beram hai, bawng hai, bawinu le bawipa hai a hung thuoi a, Abraham a pek a, a nuhmei Sari khom a pek kir bok a.
15. Abimelek chun, "En ta, ka ram chu a um dei duoi annawm, i ditna hmun hmunah um rawh" a ta.
16. Chun, Sari kuoma chun, "I tapa hi tangka sangkhatk ka pek tah a, i kuoma um po po hai hrieta i chunga thawsuolna laka thupha chawina a na, i chungthu a fel nawk vong tah" a ta.
17. Chuongchun, Abraham chu Pathien kuomah a tongtai a, Pathienin Abimelek le a nuhmei le an bawinuhai po po chu a sukdam a, nau nei thei dingin a hung siem nawk ta vong a.
18. A san chu, Abraham nuhmei Sari leiin LALPA chun Abimelek sungkuo sul po po a lo kharpek vong hman lei a nih.

  Genesis (20/50)