← Genesis (2/50) → |
1. | Chuongchun, hnuoi le van le thil iengkim chu siem zo a ni ta a. |
2. | Pathienin a thilsiem sin a zo fel tah leiin a ni sarina ni chun a chawl a. |
3. | A thil inumtir le siem sin po po a chawlsan tak leiin Pathien chun ni sarina chu mal a sawm a, a'n ser thienghlim a. |
4. | Chu chu hnuoi le van hung um dan tobul chanchin chu a nih. |
5. | Hnuoi le van siem a ni lai chun, hnuoia hin hna hring hrim hrim a la um naw a, thlai hrim hrim a la to bok nawh. LALPA Pathienin hnuoi chungah ruo a la'n surtir naw a, hnuoi inlettu ding mihriem an la um bok nawh. |
6. | Amiruokchu, hnuoia inthokin tui hu a hung suok a, chu chun hnuoi chu a sukhnawng a. |
7. | Chun, LALPA Pathien chun hnuoia pilvutin mihriem a siem a, a hnarah hringna thuok a'n thuok khum a, mihriem chu mihring a hung ni ta a. |
8. | LALPA Pathienin sak tieng Edena chun huon a siem a, chu taka chun a mihriem siem chu a sie a. |
9. | Chu huona chun LALPA Pathienin thing mawi tak tak le ra inhnik tak tak a'n totir a, huon lailung taka chun hringna thing le a sie le a tha hriet theina thing a sie bok a. |
10. | Huon sukhnawngtu dingin Edena chun vadung a luong a, chu taka inthok chun vadung paliin a peng dar a. |
11. | Vadung pakhatna chu Pison a na, rangkachak tamna Havila ramah a luong kuol a. |
12. | Chu rama rangkachak chu rangkachak tha chi a na, lunghlu bedolak le berul khom a um a. |
13. | Vadung pahnina chu Gihon a na, chu chun Kus ram a luong tlang a. |
14. | Vadung pathumna chu Tigris a na, chu chu Asuria suo tieng a luong a. Vadung palina chu Eufratis a nih. |
15. | LALPA Pathien chun mihriem chu a thuoi a, Eden Huona sinthawtu ding le huon enkoltu dingin a sie a. |
16. | LALPA Pathien chun mihriem kuomah, "Hi huona thei rahai hi a ieng khom i fak thei a, |
17. | sie le tha hrietna thei ra ruok hi chu i fak ding a ni nawh, i fak chun thi ngei ngei i tih" tiin thu a pek a. |
18. | LALPA Pathien chun, "Ama chaua pasal a um hi a tha nawh, a thangpuitu ding koppui ditum siempek ka tih" a ta. |
19. | LALPA Pathien chun pilin ram sa tinreng le chungleng vatehai chu a siem a, an hming lo sakpek dingin Adam kuomah a thuoi a, thilhring tinrenghai chun hming a lo sakpek ang peiin an hung put song tah a. |
20. | Chuongchun, Adam chun ran po po hai, chungleng vate tinreng le ram sa tinrenghai hming chu a sakpek ta vong a nih. Amiruokchu, Adam ta dingin koppui ding awm hrim an um si nawh. |
21. | Chuongchun, LALPA Pathienin Adam chu imu inden takin a'n intir a, a in lai chun a nakru laia pakhat chu a lak suok a, chu hmun chu a taksain a sukbit nawk a. |
22. | Adam nakru a laka inthok chun LALPA Pathienin nuhmei a siem a, Adam kuomah a thuoi a. |
23. | Adam chun, "Hi zet hi chu ka ru ang ru nei, ka taksa ang taksa put a nih. Pasala inthoka lak suok a ni leiin 'Nuhmei' ti ning a tih" a ta. |
24. | Hi lei hin pasalin a nu le pa maksanin a nuhmei chel a ta,b taksa pum khat hung ni tang an tih. |
25. | Chun, Adam le a nuhmei chu saruokin an um a, sienkhom an inzak nawh. |
← Genesis (2/50) → |