Genesis (19/50)  

1. Vantirko pahnihai chun zan tieng Sodom khuo an tlung a, Lota chu Sodom kotsuoa chun a lo inthung a. An hung a hmuin lo lawm lut dingin Lota chu a tho a, bawka hnuoi sikin chibai a lo buk a.
2. "Puhai, lunginsiet takin in siehlaw ina hin lut phot unla, riek unla, in kehai sawp unla, zing inhma taka thoin in fe nawk ding annawm" a ta. Anni ruok chun, "Ni lo e, khawlaiah riek lem kan tih" an ta.
3. Ama chun nasa taka a ngen leiin a ina chun an lut a, ruoi a buotsai a, chawl thang lo beiphek a siem bok a, an fak ta a.
4. Nisienlakhom, an zal hmain a khaw mi, Sodom mihai chu a chin a lien veng tina mi inhawr khawmin in chu an hung inhuol a.
5. Lota chu an ko khek a, "Voizana i ina tlung pasalhai kha khaw la'm an um a? Hung thuoi suok tawl rawh, kan lo pawl theina dingin" an ta.
6. Lota chun kot a hong a, a va suok a, kot chu a khar nawk a.
7. "Ka unauhai, lunginsiet takin chuong khopa rilo chun um naw hram ro.
8. Ngai ta u, tu la pawl ngai lo nau nuhmei pahni ka nei a, hung thuoi suok ka ta, tha in ti angin an chungah thaw lem ro; ka mikhuolhai ruok hi chu mi tawkpek naw ro, ka in luma ka huol himna hnuoia um an ni si a" a ta.
9. Anni rawi chun, "Intawl hmang rawh. Nanga pa hrep hi, pem mei meiin kan chungah thu nei i tum vei a ni? I mikhuolhai nekin i tuor sa lem a tih" an ta. Lota chu an hung nor hleng a, kotkhar chu sut siet an tum a.
10. Nisienlakhom ina mihai chun an hei ban a, Lota chu in sungah an hnuk lut a, kot chu an kal tlat a.
11. Kotkhar bula umhai chu a chin a lienin an mit an sukdelpek vong a, kotkhar chu an hmu thei ta naw a.
12. Chun, mihai chun Lota kuomah, "Hieng i ina mihai ti lo, hi khuoa hin sungkuo dang i nei am? I makpa hai, i naunu le naupa hai le khaw sunga mi laichin hnai i nei taphot chu hi khuoa inthok hin thuoi suok tawl rawh.
13. LALPA hmaah an riva a se ta em leiin hi khuo hi kan sukbohmang ding a na, chu ding chun LALPAN a mi tir a nih" an ta.
14. Chuongchun, Lota chu a fe suok a, a naunuhai nei dinga a makpa huolhai kuoma chun, "Tho unla, hi khuoa inthok hin suok ro, LALPAN hi khuo hi a sukbohmang ding a nih" tiin a va hril a. A makpa huolhai hlak chun a fiemthu an sawn lem si.
15. Khawfingchat vela chun vantirkohaiin Lota kuomah, "Tho la, i nuhmei le hi taka i naunu pahni umhai hi inrang takin thuoi suok rawh, chuong naw chun hi khaw hremnaah hin bohmang ve hlauh rawi in tih" tiin an hmaw a.
16. A la muongchang em leiin vantirkohai chun ama le a nuhmei le naunuhai chu an kuta chelin khaw puo tieng chun an kei suok a, LALPAN anni chu a lunginsiet si a.
17. Khaw puo an tlung charin, vantirko pakhat chun, "Tu hin in hringna dingin tlan ro. Hnung tieng ngha naw unla, phaizawlah chawl hrim hrim naw unla, tlanga son tlan tung ro. Chuong naw chun bohmang pal in tih" a ta.
18. Nisienlakhom Lota chun, " Pu, chuong ang chu tlung naw hram raw se.
19. Ngai ta, i siehlaw hin i mit a tlung a, ka hringna hla dingin i zangaina lien tak chu ka chungah i'n langtir a. Sienkhom, tlang chu tlan tlung zo naw ning, lampuiah sietnan mi nang a ta, thi tho ka tih.
20. Saw va saw tlanna phak chauh khuo a um a, khaw chikte a nih. Chu khaw chiktea chun mi'n tlantir lem la, him ka tih" a ta.
21. Vantirko chun, "Ni e, chu i hni khom chu phalpek ka ti che. Chu khuo i hril chu sukbohmang sa ve naw el ka tih.
22. Sienkhom, inhmaw takin tlan rawh, chu khuo i tlung hma po chun kut ka kei a ngai si a" a ta. Chu lei chun chu khaw hminga chun Zoarh ti an inbuk a nih.
23. Lota'n Zoar khuo a tlung chun nisa a suok ta a.
24. LALPA chun Sodom le Gomora khaw chunga chun vana LALPA kuoma inthokin mei le kat a'n surtir chur chur a,
25. chu khuohai le phaizawl po poa mi chenghai le hnuoia thil to taphot chu a kang hmang ta vong a.
26. Lota nuhmei ruok chu a nghakir leiin chi lungah a'n chang tah a nih.
27. Abraham chu zingkar inhma takin LALPA hmaa a ngirna hmuna khan a hang fe a,
28. Sodom le Gomora khuo tieng le phaizawl chu a zuk thlir a, meikhu intur ngul el, rawtuina meikhu ang ela khu tung ngut ngut chu a zuk hmu a.
29. Pathienin phaizawla khuohai a suksiet khan Abraham chu a hriet zing a. Lota chengna khuo a sukram lai khom khan Lota chu bohmangnaa inthokin a san suokpek a nih.
30. Lota chu Zoar khuoah a um ngam naw leiin a naunu pahnihai leh Zoar maksanin tlangah an kai a, chu taka chun pukah an um a.
31. Ni khat chu a naunu upa lem chun a sang kuomah, "Ei pa hi a upa ta a, hnuoi hmun tina an thaw dan anga mi pawltu ding hlak ei kawl le kiengah pasal dang an um der bok si naw a.
32. Ei pa hi uoiin hrai rui ei ta, ei sungkuo a mang nawna dingin ei pa hi inpawlpui ei tih" a ta.
33. Chu zan chun an pa chu uoiin an hrai rui a, a upa lem chu a lut a, a zalpui a; ama chun a hung zal lai a hriet naw a, a tho nawk lai khom a hriet bok nawh.
34. A zinga chun a upa lemin a sang kuomah, "Voizan khan ei pa kuomah ka zal a; voizan khom hin uoiin indawntir nawk ei ta; chun nang lut la, ei pa chi thla mang loa ei siem theina dingin a kuomah va zal ve rawh" a ta.
35. Chu zan khom chun an pa chu uoiin an hrai rui a, a naupang lem chun a pa chu a va zalpui a. Ama chun a hung zal lai le a tho nawk lai a hriet chuong bok nawh.
36. Chuongchun, Lota naunu pahnihai chun an pa lakah nau an hung pai ve ve tah a.
37. A upa lem chun nau pasal a nei a, a hmingah Moabi an sak a, ama chu tu laia Moab-hai thlatu a nih.
38. A naupang lem khomin nau pasal a nei a, a hmingah Ben-Amij an sak a, ama chu Amon-hai thlatu a nih.

  Genesis (19/50)