←  Genesis (16/50)  →
1. Abram nuhmei Sarai chun nau hrim a neipek nawh. Sarai chun Aigupta mi bawinu a nei a, a hming chu Hagar a nih.
2. Sarai chun Abram kuomah, "LALPAN nau a mi'n neitir phal si naw a, ka bawinu hi pawl el la, ama laka inthokin nau ka nei miel thei rawi mawh" a ta. Sarai thu chu Abramin a remtipui a.
3. Chuongchun, Kanan ramah kum sawm an um hnungin Sarai chun a bawinu, Aigupta mi chu a thuoi a, a pasal Abram kuomah chun nuhmeia nei dingin a pek a.
4. Hagar chu a lo pawl a, a hung inrai a, sienkhom a'n rai ti a hriet charin Hagar chun a pi chu a hmusit tan el ta a.
5. Sarai chun Abram kuomah, "Ka thil tuor hi a maw i phur a nih. Ka bawinu ka pek che a, a'n rai ti a hriet charin a mi hmusit tan el ta si hi. LALPA chun nang le keia chungthu hung rel raw se" a ta.
6. Abram ruok chun Sarai kuomah, "Ngai ta, i bawinu chu i kuta um annawm, tha i ti dan ang angin a chungah thaw ta la" a ta. Sarai chun nasa taka a sukrimsik leiin Hagar chu a tlan hmang a.
7. LALPA vantirko chun thlalera Sur khuo panna lampuia tuikhur kawla chun a lo hmu a.
8. Vantirko chun a kuomah, "Hagar, Sarai bawinu, khaw laia inthoka hung suok a, khaw laia fe ding am i na? a ta. Ama chun, "Ka pi Sarai kuoma inthokin ka tlan hmang a nih" a ta.
9. LALPA vantirko chun a kuomah, "I pi kuomah kir nawk la, a thu thuin um rawh," a ta.
10. Vantirko vek chun, "I thlahai chu tiem seng lo khop hiela tamin sukpung ka tih.
11. Ngai ta, nau i pai ta a, nau pasal nei i ta, LALPAN i rinum tuorzie hi a hriet tah leiin a hmingah Ismael i sak ding a nih.
12. Ama chu ram sabengtung ang el ning a ta, mi tin do a ta, mi tinin ama chu do bok an ta, a unauhai po po leh intai zingin khawsang a tih" a ti bok a.
13. Hagar chun "Pathien ka hmu si a, damin a mi la hla zing el chu a na maw!" a ta, a betu LALPA chu "El-roi"f tiin a'n buk a.
14. Chu lei chun tuikul hminga khom 'Beer-lahai-roi'g ti inbuk a na, chu chu Kades le Bered khaw inkarah a um.
15. Hagar chun Abram chu nau pasal a neipek a, Abram chun a naupa hmingah 'Ismael' a sak a.
16. Hagarin Ismael a neipek lai hin Abram chu kum sawmriet le kum ruka upa a ni tah.
←  Genesis (16/50)  →