← Genesis (15/50) → |
1. | Chu hnung chun Abram chu zelin a um a, LALPAN a kuomah, "Abram, ti naw, kei hi i phaw ka nih; lukhawng i dong ding khom a ropui a nih" a hung ti a. |
2. | Abram ruok chun, "Aw LALPA Chunghnungtak, nau bo ka na, ka ro khawmtu ding hlak chu Damaska khuoa mi Eliezar a ni dai si a, iem a na i mi pek thei chu?" a ta. |
3. | Abram vekin, "Ngai ta, chi i mi'n thlatir si naw a, ka ina inthoka pieng bawi hi ka ro hluotu ding a ni el tah si hi!" a ti nawk a. |
4. | Chuongchun, LALPA thu chu a hung tlung a, "Kha mi kha i ro hluotu ding a ni nawh. I rila ra chauh naw chun i ro hluo naw ni hai"tiin. |
5. | Chun, Abram chu tuolah a thuoi suok a, "Van tieng khi en la, arasi khi i tiem seng hrim am hang tiem ta leh" a ta. Ama vekin, "I thlahai chu khieng zat khi la ning an tih" a ta. |
6. | Abram chun LALPA chu a ring a, chu chu a felnaah a pompek a. |
7. | Chun, "Kei hi LALPA, hi ram hi pe ding che le inhluotir ding chea Kaldaihai khuo Ur-a inthoka ko suoktu che kha ka nih" a ti bok a. |
8. | Abram chun, "Aw LALPA Chunghnungtak, ka hluo ding ti iengtin am ka hriet ding?" a ta. |
9. | LALPA chun a kuomah, "Bawng la, kel le beram chal, kum thum mi seng le vathu le parva tuoi hung chawi rawh" a ta. |
10. | Chuonghai chu a hung lak a, ran po chu a laiah a khoi seng a, phel tin chu inhmatuokin a sie vong a, vatehai ruok chu a khoi ve nawh. |
11. | Mulukolhai chun fak tumin saruong chu an zuk baw a, Abram chun a lo hawl zam pei a. |
12. | Ni a tlak dier dier lai chun Abram chu inden takin a lo in ta der a, thim sa tak le tibaium takin ama chu a hung zar khum a. |
13. | Chuongchun, LALPAN Abram kuomah, "I thlahai chu mi ramah la mikhuol an ta, mi bawia umin kum zali sung suknomnat tuor an tih ti hre rawh. |
14. | Amiruokchu, rong an bawlpek hnamhai chungthu chu la rel ka ta, chu zoah an rosum nei tam tak leh la hung suok dok an tih. |
15. | Nang ruok chu i thlatuhai kuomah thlamuong takin feng i ta, ngal fima damin vui liem an ti che. |
16. | Suon linaah hi hmuna hin i thlahai chu hung kir nawk chauh an tih; Amorhai suolna chu a la kin hri si nawh," a ta. |
17. | Ni tlak hnunga khuo a hung inthim chun meiphu khu lui lui le meiser chok puot puot chu saruong khoi phel inkara chun an inlon zut zut a. |
18. | Chu ni chun LALPAN Abram kuomah thu a thlung a: "Aigupta vadunga inthoka vadungpui Eufretis inkar ram hi i thlahai ka pek, |
19. | Ken mi hai, Keniz mi hai, Kadmon mi hai, |
20. | Hit mi hai, Periz mi hai, Refaim mi hai, |
21. | Amor mi hai, Kanan mi hai le Girgas mi hai ram po po khom" tiin. |
← Genesis (15/50) → |