←  Genesis (13/50)  →
1. Abram chun a nuhmei le a thil nei po po leh Aigupta ram a suoksan a, Negev tieng a pan a, Lota chun a zui pei a.
2. Abram chun ranruol le sum le pai tangkaruo le rangkachakhai a hau hman ta hle a.
3. Negev-a inthok chun hmun hrang hrangah buk khuorin, Bethel chen a fe a, chu chu Bethel le Ai khaw inkara kha hmaa puon in a keina hmun le maicham a siemna hmun kha a nih.
4. Chu taka chun Abram chun LALPA hming a lam a.
5. Abram le inzui Lota khomin beram ruol le bawng ruol neiin, puon in a kei ve a.
6. Amiruokchu, an pahnia khawsakna dingin ramin a keng ta naw a, an burip ta em leiin an khawsa hmunkhat thei ta hlol naw a.
7. Chu lai ram chu Kanan mihai le Periz mihai chengna hmun a nih. Abram ran puhai le Lota ran puhai inkarah inhalna a hung suok a.
8. Chuongchun, Abramin Lota kuomah, "Lunginsiettakin, nangma le keima inkar le i ran chingtuhai le ka ran chingtuhai inkarah insel inhal um naw raw se, unau ei ni si a.
9. Ram a um dei duoi an naw am a ni? Lunginsiettakin ka kuoma inthok hin inmuolvom el ta rawh. Nang voi tieng i fe leh kei chang tieng feng ka ta, chang tieng i fe leh kei voi tieng fe el lem ka tih" a ta.
10. Lota chu Zoar khuo tieng thlirin a ngha vel a, Jordan phaizawl chu LALPA huon ang le Aigupta ram ang ela ram hnawng tha a nih ti a hriet a, LALPAN Sodom le Gomora a suksiet hma kha a ni si a.
11. Chuongchun, Lota chun Jordan phaizawl chu a thlang a, sak tieng panga chun a'n son a, an um hran ta a.
12. Abram chu Kananhai rama chun a um ta zing a, Lota chu Jordan phaizawla khuoa hai chun a cheng a, inson peiin Sodom khaw bulah umhmun a khuor a.
13. Sodom khaw mihai chu an rilo hle a, Pathien lakah nasa takin an suol a.
14. Lota fe hnungin LALPA chun Abram kuomah, "I umnaa inthok khan sak le thlang le sim le hmar tieng mit inlen rawh.
15. Ram i hmu po po hi nangma le i thlahai kutah kumkhuoa dingin ka pek ding che a nih.
16. I thlahai chu hnuoia pilvut anga tamin ka siem ding a nih. Tu khomin pilvut a tiem seng chun i thlahai chu tiem seng chau a tih.
17. Tho la, ram hi a dung a khangin fang suok rawh, ka pek ding che a ni si a" a ta.
18. Chuongchun, Abram chu insonin, Hebron khuoa Mamre saisaw thing lien tak bula chun umhmun a khuor a, chu taka chun LALPA ta dingin maicham a siem a.
←  Genesis (13/50)  →