←  Genesis (11/50)  →

---

1.

Hnuoia mi po poin tong pakhat chauh an nei a, chu chu an hmang seng a.

2.

Sak tieng an intawl pei lai chun Sinar ramah phaizawl an hmu a, chu taka chun umhmun an khuor a.

3.

Chun, "Thaw ro, teklei siem ei ta, chang takin rawng ei tiu" an inti tawl a. Chuongchun, lung aiah teklei an hmang a, a char nghetna dingin pil inhnak an hmang a.

4.

Chu zoa chun, "Thaw ro, ei khawpui ding indin ei ta, van tonga insangin bawl ei ta, ei hming sukthang ei tiu; chuong naw chun hnuoi hmun tinah indar zo rawi ei tih" an ta.

5.

LALPA chu mihriemhai khawpui rel le an in insang bawl chu en dingin a zu tum a.

6.

LALPA chun, "Ngai ta u, mihai hi hnam khat, tong khat hmang an ni si a, tu hman hin an thaw tanna chauh a la ni hih; hieng hi a ni chun an tum reng reng thaw thei naw nei naw ni hai.

7.

Thaw ro, zu feng ei ta, tong an inhriet paw nawna dingin an tong zu sukhranpek ei tiu" a ta.

8.

Chuongchun, LALPAN anni chu chu taka inthok chun hnuoi hmun tinah a sukdar a, an khawpui rel chu an tawpsan ta a.

9.

Chuleiin chu hmun chu 'Babel' an ti a nih, chu hmuna chun khawvela tong po po inhre thei lo dinga LALPAN an tong a sukhranpek leiin. Chu taka inthok chun LALPAN hnuoi hmun tinah a sukdar a.

10.

Hieng hi Sema thla peihai chanchin chu an nih. Tui let hnung kum hninaa Sema chun kum za a tlingin naupa Arpaksad a nei a.

11.

Arpaksad pieng hnungin Sema chu kum zanga a la dam a, naupa le naunu dang khom a la nei a.

12.

Kum sawmthum le kum nga a niin Arpaksad chun naupa Sela a nei a.

13.

Sela pieng hnungin Arpaksad chu kum zali le kum thum a la dam a, naupa le naunu dang khom a la nei a.

14.

Kum sawmthum a niin Sela chun naupa Eber a nei a.

15.

Eber pieng hnungin kum zali le kum thum a la dam a, naupa le naunu dang khom a la nei a.

16.

Kum sawmthum le kum li a niin Eber chun naupa Peleg a nei a.

17.

Peleg pieng hnungin kum zali le kum sawmthum a la dam a, naupa le naunu dang khom a la nei a.

18.

Kum sawmthum a niin Peleg chun naupa Reua a nei a.

19.

Reua a pieng hnungin Peleg chu kum zahni le kum kuo a la dam a, naupa le naunu dang khom a la nei a.

20.

Kum sawmthum le kum hni a niin Reua chun naupa Serug a nei a.

21.

Serug pieng hnungin Reua chu kum zahni le kum sari a la dam a, naupa le naunu dang khom a la nei a.

22.

Kum sawmthum a niin Serug chun naupa Nahor a nei a.

23.

Nahor pieng hnungin Serug chu kum zahni a la dam a, naupa le naunu dang khom a la nei a.

24.

Kum sawmhni le kum kuo a niin Nahor chun naupa Tera a nei a.

25.

Tera pieng hnungin Nahor chu kum za le sawm le pakuo a la dam a, naupa le naunu dang khom a la nei a.

26.

Chun, kum sawmsari a niin Tera chun naupa Abram hai, Nahor hai, Haran hai a nei a.

27.

Hienghai hi Tera thlahai chu an nih. Tera chun naupa Abram hai, Nahor hai, Haran hai a nei a; chun, Haranin naupa Lota a nei a.

28.

Haran chu a piengna Kaldai ram Ur khuoah a pa Tera thi hmain a thi a.

29.

Abram le Nahor chun nuhmei an nei a, Abram nuhmei hming chu Sarai a na, Nahor nuhmei chu Haran naunu Milka a nih. Haran chu Milka le Iska thlatu a nih.

30.

Sarai chu a ching a, nau hrim a nei nawh.

31.

Tera chun a naupa Abram hai, a tupa Lota hai, a mo, a naupa Abram nuhmei Sarai hai chu a thuoi a, Kanan rama fe dingin Kaldai ram Ur khuo chu a suoksan a, Haran khuo an hung tlung a, chu taka chun umhmun an khuor a.

32.

Tera chu kum zahni le panga a dam a, Haran khuoa chun a thi tah a nih.

---

←  Genesis (11/50)  →