Genesis (1/50)  

1. A tira Pathienin hnuoi le van a'n umtir lai chun,
2. khawvel chu ruongam mumal la nei loa ruok el a ni a, tui inthuk tak chu inthimin a bawm a, tui chunga chun Pathien Thlaraua a'n leng vel a.
3. Pathienin, "Var hung um raw se" a ta, chuongchun var a hung um a.
4. Pathienin var chu a en a, tha a ti hle a, var le inthim chu a the hrang a.
5. Pathienin var chu 'sun' a'n buk a, thim chu 'zan' a'n buk a. Chuongchun, zan tieng a um a, zing tieng a um bok a, chu chu a ni khatna a nih.
6. Chun Pathienin, "Tui le tui inkarah boruok zau tak, van inkum kul um sien la, tui le tui chu the raw se" a ta.
7. Chuongchun, Pathienin boruok zau tak a'n umtir a, vankhup hnuoia tui le vankhup chunga tui chu a the a, chuong ang chun a hung um a.
8. Pathienin vankhup zau tak chu 'van' a'n buk a. Chuongchun, zan tieng a um a, zing tieng a um bok a, chu chu a ni hnina a nih.
9. Chun Pathienin, "Vankhup hnuoia tui po po chu hmun khatah intling khawm sien, khawmuol hung inlang raw se" a ta. Chuong ang chun a hung um a.
10. Pathienin khawmuol chu 'hnuoi' a'n buk a, tui intling khawm chu 'tuifinriet' a'n buk bok a. Pathienin a en a, tha a ti hle a.
11. Chun, Pathienin, "Hnuoiin thlai hring insuo sien la, anni ding ang senga mal neia ra chi hlo le thlai dam, anni ding ang senga mu neia ra chi thei kung dam, insuo raw hai se" a ta. Chuong ang chun a hung um a.
12. Chuongchun hnuoiin thlai hring insuoin, anni ding ang senga mal neia ra chi thlai dam, anni ding ang senga mu neia ra chi thei kung hai dam chu hnuoiin a hung insuo a. Pathienin a en a, tha a ti hle a.
13. Chuongchun, zan tieng a um a, zing tieng a um bok a, chu chu a ni thumna a nih.
14. Chun Pathienin, "Sun le zan thetu dingin vankhup zau takah elvartu um hai sien la, chuonghai chu hun bi hai, ni hai le kum hai inchikna ni hai sien la,
15. van zauah hnuoi elvartu dingin um raw hai se" a ta, chuong ang chun a hung um a.
16. Pathienin var ropui pahnih, a var lem chu sun roreltu ding le a var naw lem chu zan roreltu dingin, a siem a, arasi dam a siem bok a.
17. Chuonghai chu hnuoi elvartu ding dam,
18. sun le zan chunga roreltu ding dam le var le thim thetu ding damin Pathienin vanah a sie a. Pathienin a en a, tha a ti hle a.
19. Chuongchun, zan tieng a um a, zing tieng a um bok a, chu chu a ni lina a nih.
20. Chun Pathienin, "Tuiin thilhring insuo teu sien la, hnuoi chung boruok incham duoiah vate ruol vuong nuk nuk raw hai se" a ta.
21. Chuongchun, Pathienin tuipuia cheng thilhring lien tak tak le tuia cheng thilhring chi tin inzi mur mur elhai chu an ni um dan ding ang sengin a'n umtir a, thla neia vuong vate chi tinreng khom an ni um dan ding ang sengin a'n umtir bok a. Pathienin a en a, tha a ti hle a.
22. Pathienin, "Chi tam tak thlain hung pung unla, tuifinriet hi hung hluo sip unla, vate khom hnuoiah hung pung raw hai se" tiin mal a sawm a.
23. Chuongchun, zan tieng a um a, zing tieng a um bok a, chu chu a ni ngana a nih.
24. Chun, Pathienin, "Anni chi um dan ding ang senga siem thilhringhai, hnuoia tla chi ran hai, bokvaka invak thilhring chi tinreng hai le ramsa hai chu hnuoiin hung insuo raw se" a ta. Chuong ang chun a hung um a.
25. Chuongchun, Pathienin ram sahai chu anni chi um dan ding ang sengin, ranhai chu anni chi um dan ding ang sengin, hnuoia bokvaka invak chihai po po chu anni chi um dan ding ang sengin a siem a. Pathienin a en a, tha a ti hle a.
26. Chun, Pathienin, "Eini angin, eini angpuiin mihriem siem ei tiu, anni chu tuifinrieta ngahai chunga dam, chungleng vatehai chunga dam, hnuoi chung po poa ranhai le ram sahai chunga dam le hnuoi chunga bokvaka invak po pohai chunga dam thu inneitir ei tiu" a ta.
27. Chuongchun Pathienin ama angpuiin mihriem a siem a, Pathien angpuiin a nih pasal le nuhmei a siem.
28. Pathienin anni chu mal a sawm a: "Chi tam tak thlaa pungin, hnuoi hi hung hluo sip unla, in thu hnuoiah sie ro. Tuifinrieta ngahai chunga dam, chungleng vatehai chunga dam le hnuoi chunga invak thilhring po po chunga dam thu nei bok ro" a ta.
29. Chun, Pathienin, "Ngai ta u, in fak dingin hnuoia thlaihai, mal neia ra chihai le thing, mu neia ra chi taphothai chu ka pek cheu.
30. Chun, hnuoia sa tinreng, chungleng va tinreng, hnuoia bokvaka invak thilhring tinreng le hringna nei tinreng kuomah an bu dingin hna hring tinreng ka pek a nih" a ta. Chuong ang tak chun a hung ni a.
31. Pathienin a thilsiem tinrenghai chu a en a, ngai ta, tha a ti takzet a. Chuongchun, zan tieng a um a, zing tieng a um bok a, chu chu a ni rukna a nih.

      Genesis (1/50)