←  Galatians (6/6)    
1. Unauhai, miin suol a thaw lai in phawk pal chun, nangni thlarau mihai chun chu mi chu indoi takin tungding nawk tum hlak ro. Nangni khom inveng tha seng ro, thlemna tuok ve hlauh rawi in tih.
2. In phurrikhai insawk tuo hlak ro, chuongchun Krista dan in zawm ning a tih.
3. Ieng khom ni bar si loa mi lien tak nia inngai chun ama a'n hlem fawm a nih.
4. Mi tinin mani thilthaw inen fie lem sien, mi dang leh inkhi naw sien, in thaw tawk peiah lawmna ding nei thei in tih.
5. Mi tinin mani phur seng ei phur ding a nih.
6. Zirtirna thu dongtu chun a zirtirtu chu thil tha a nei ang ang pe ve raw se.
7. Hlemin um naw ro. Pathien chu nuisaw chi a ni nawh. Mi tinin a tu ang char a sik hlak.
8. Mani tisa chakna suklawmna dinga suol tutu chun sietna sik a ta; Thlarau lawmna tieng chi tutu ruok chun Thlarau tienga chatuon hringna sik a tih.
9. Thil tha thaw hi nghok nawng ei tiu, ei inthlada naw chun a hun takah ei la sik ding a ni si a.
10. Chuongchun, remchang ei hmu taphotah mi tin kuomah thil tha thaw inla, ringnaa ei sunghai chunga lem chu uor nawkzuolin thawng ei tiu.
11. En ta u, hawrop inhrol phura ziek hi keia kut ziek ngei a ni hi.
12. Tisa tienga a langa insukmawi tumhai chun Krista kraws leia sukdudana an tuor ding chu pumpelna dingin ser intan luitir cheu an tum a.
13. Sertanhai khom hin Dan chu an zawm kim bik chuong nawh. In taksaa inchikna um chu an uongpui theina dingin ser intantir cheu an tum a ni kha.
14. Kei ruok chun ei Lalpa Isu Krista kraws chauh naw chu uongpui ding hrim ka nei nawh. Chu kraws-ah chun ka lakah khawvel hi hemde a ni tah a, kei khom khawvel lakah hemde ka ni tah.
15. Miin ser a tan le tan nawin thu a phur nawh, siemtharna hi a poimaw tak chu a nih.
16. Hi thu zawmtu po po chungah inremna le zangaina tlung raw se, Pathien mi Israelhai chunga khom.
17. A tawp taka chun, ka taksaa hin Krista inchikna ka put ta si leiin tuta inthok chu tu khomin mi sukbuoi ta naw raw hai se.
18. Unauhai, ei Lalpa Isu Krista lungsietna chu in kuomah um raw se. Amen
←  Galatians (6/6)