| ← Galatians (5/6) → |
| 1. | Zalen dingin Krista chun a mi'n suoktir tah a, chuleiin ngir nghet unla, bawi ringkol bat nawk ta naw ro. |
| 2. | Ngai ta u, kei Paula ngei hin ka hril cheu hi, ser in intantir chun Krista chu in hlawkpui der nawh tina a nih. |
| 3. | Sertan taphot kuomah hi hi ka hril nuom: an tan a ni chun Danin a phut taphot khom thaw ve law law raw hai se. |
| 4. | Dan zawm leia thiemchang tumtuhai, Krista kuoma inthokin in intan fithla tah a, lunginsietna chu in tluksan tah a nih. |
| 5. | Keini ruok chun Thlarau zara ringna leia thiemchangna chu beiseiin kan nghak si a. |
| 6. | Isu Kristaah ei um phot chun sertan amanih tan lo amanih a dang chuong nawh; hmangainaa inlang suok ringna hi a nih a poimaw tak. |
| 7. | Hma in sawn that vei leh a tuin am thutak tluksan dingin a lo zawr hmang cheu a na? |
| 8. | Hi zawr hmangna hi a kotu cheua inthok a ni nawh. |
| 9. | Chol tlawmtein bei hlum tlang lien tak khom a fang suok thei ti a ni kha. |
| 10. | Lalpa pakhata um tlang ei ni leiin lungril dang in put hi kei chun ka la ring thei nawh. A chawkbuoitu cheu chun, tu khom ni sien, hrem la tuor a tih. |
| 11. | Unauhai, kei hin sertan a tul thu zirtir cheu dam chu ni lang, ieng leiin am mi sukduda zing hlak an ta? Chuong chu zirtir ni lang, kraws thu kan hril khom hi dodal der naw ni hai. |
| 12. | A chokbuoituhai cheu chun tan fithla law lawin mi tilreah insiem hai sien ka va ti de! |
| 13. | Unauhai, nangni chu zalen dinga ko in ni a, in zalenna chu tisa chakna suol thawna remchangah hmang naw unla, inhmangai tuoin rong inbawl tuo lem ro. |
| 14. | Nangma i'n hmangai angin i venghai khom hmangai rawh" ti thu kam khat hi in zawm chun Dan po po in zawm vong ning a nih. |
| 15. | Ran ang ela insechilh le inhliem ton lo dingin fimkhur ro, chuong naw chun insukram tuo hlauh rawi in tih. |
| 16. | Chuleiin, ka hril cheu hi, thlarauah um unla, tisa chakna suol chu suklawm da'l in tih. |
| 17. | Tisa nuomzawng chun thlarau tieng thil a kal tlat a, Thlarau hlakin tisa tieng thil a kal tlat bok a, an inkal ton tlat leiin in thaw nuom khom in thaw thei naw hlak a nih. |
| 18. | Thlarau thuoia in um ruok chun Dan hnuoia um in ni nawh. |
| 19. | Tisa mihai thaw hlak chu chieng takin inngaina suol hai, inthieng nawna hai, pawr taka chetna hai, |
| 20. | mi lem biekna hai, dawithiemna hai, innghirnghona hai, inthikna hai, lungturuk insuona hai, mani hmasielna hai, inngei nawna hai, pawl hranga inkei bingna hai, |
| 21. | inhnarna hai, zu rui ching hai, risiea inrui pawr ching hai le chuong ang thil thaw hlak mihai chu an nih. Chuong ang mihai chun Pathien ram hluo top naw ni hai ti ka hril tah cheu ang khan ka hril non nawk cheu a nih. |
| 22. | Thlarau ra ruok chu hmangaina dam, lawmna dam, inremna dam, dawtheina dam, ngilneina dam, thatna dam, ringumna dam, |
| 23. | zaidamna dam le insum theina hai dam hi a nih. Chuong ang kal zawng chu Dan a um nawh. |
| 24. | Isu Kristaa umhai chun tisa chakna le nuomna hai an hemde tah a nih. |
| 25. | Thlaraua hring ei ni ta chun Thlarau thuoi ang peiin um ei tiu. |
| 26. | Inngaihlu loin, incho tuo loin, inthik tuo bok nawng ei tiu. |
| ← Galatians (5/6) → |