←  Galatians (3/6)  →
1. Aw, Galati mi invethai, tuin am a dawi vet cheu a na? Mita in hmu ve ang khopa chiengin Isu Krista an hemde thu chu in kuomah tar lang a ni kha!
2. Nangnia inthokin thil pakhat char hriet ka nuom: Thlarau in dong kha Dan in zawm lei am Chanchin Tha in hrieta in ring tak lei?
3. Hieng lawm hin in lo invet el a ni maw? Thlaraua tan ta siin tisa thilah in tawp el ding a ni?
4. In thil tuor zozai kha iengmalo angin in tuor thlawn el ding a ni?
5. Pathienin Thlarau a pek cheu le nangni laia thil mak a thawhai kha Dan in zawm leia a thaw a ni, an naw leh in thu hriet chu in ring tak lei?
6. Abraham chun Pathien a ring a, thiemchanga pom a ni tah ti ang kha a ni lem.
7. Abraham nau indik takhai chu ringtuhai hi an nih ti hre ro.
8. Lekha Thu chun Jentelhai khom ringna leiin Pathienin thiem a la'n changtir ding a hmu lawk a, chuongchun Abraham kuomah, "Nangmaah hnam tin malsawmin um an tih" tiin Chanchin Tha chu a lo hril dai tah a nih.
9. Chuongchun, ringtu Abrahamin a ring anga ring ve taphotin malsawmna chu an dong tah a nih.
10. Dan zawm ringota innghathai chu tongsephur hnuoia um vong an nih; "Dan lekhabua chuong po po zawma an thaw vong naw chun tongsephur an nih" ti ziek a ni si a.
11. "Ringna leia thiem chang chu hring a tih" ti a ni si leiin, Dan zawm leiin tu khom Pathien hmaah thiem chang zo an um nawh ti a chieng.
12. Dan chun, "Thupek zawm kimtu chu hring a tih" a ti a, ringna a hril sa ve nawh.
13. Thinga hemde chu tongsephur a nih" tia ziek a ni ang khan Krista chun ei ta dingin tongsie chu phurin Dan tongsiea inthok chun a mi san suok tah a.
14. Chuongchun, Pathienin Abraham mal a sawmna chu Jentelhai kuomah Kristaa chun a hung tlung tah a, eini hin Thlarau pek a tiem chu ringna leiin ei lo dong tah a nih.
15. Unauhai, ni tina mihriem khawsak dan entirnaa hmangin hang hril inla. Mihriemin thuthlung ei namnghet tah chu thlak amanih belsa thei a ni nawh.
16. Abraham le a chi thla kuoma chauh a nih Pathienin thu a tiem kha. Pathien Lekha thuin "chi thlahai" ti loin "i chi thla" a ti lem a ni kha, chu a chi thla chu Krista hi a nih.
17. Ka hril tum chu hi hi a nih: Kum zali le sawmthum hnunga Dan a hung um khan Pathien thuthlung chu a thiek chuong nawh, a thutiem khom a sukdanglam chuong bok nawh.
18. Dan leia rohluotu nina chang thei a ni chun Pathien thutiema inthlung ni thei naw nih; Pathienin rohluotu nina chu Abraham kuomah thu tiemin a pek a ni kha.
19. Chuong a ni si chun Dan a pekna san chu iem ni tang a ta? Bawsietna hi ieng ang char am a nih ti suklangna dinga Abraham kuoma Chi Thlab a tiem kha a hung inlang hma poa dinga vantirkohai hmanga palaic kuoma a pek a nih.
20. Sienkhom, palai chu mi pakhat neka tam inkarah a ni hlak a, Pathien hlak chu pakhat chauh a ni si a.
21. An leh, Dan chun Pathien thutiem a kal am a ni? Kal lo e! Mi sukhring thei Dan chu pek ni sien, thiemchangna chu Dan zawm lei ni ngei a tih.
22. Nisienlakhom, Isu Krista ringna leia thutiem chu a ringtu taphot kuoma pek a ni theina dingin, khawvel pumpui hi suol thuhnuoia intang a ni thu Pathien Lekha thuin a hril a nih.
23. Ringna thu a hung tlung hma khan chu Dan hnuoiah ei intang a; ringna thu puong suoka a um hma chun a mi kal khum tlat hlak.
24. Ringna leia thiemchang ei ni theina dinga Krista tienga mi kei thuoitu chu Dan a nih.
25. Tu ruok hin chu ringna thu a hung tlung tak leiin Dan thu hnuoia kun ei ni ta nawh.
26. Krista Isu in ringna leiin in rengin Pathien nauhai in ni tah.
27. Kristaa baptisma chang taphot chu Krista chun in inthuom tah a nih.
28. Juda le Jentel, bawi le bawi lo, pasal le nuhmei a um chuong ta naw a, Isu Kristaa chun in rengin thutiem anga rohluotu, Abraham thlahai vong in nih.
29. (A um nawh)
←  Galatians (3/6)  →