Galatians (2/6)  

1. Kum sawmpali a'n voi hnungin Barnaba leh Jerusalemah ka hang fe nawk a, Tita ka thuoi bok a.
2. Pathien mi'n hriettirna leia hang fe ka ni a, Jentelhai laia Chanchin Tha ka hril hlak thu chu an hmaa hang tar lang dingin. Ka rongbawlna chu ka sawl thlawnpui el nawna dingin hotu lien deua an hrilhai chu a falin ka'n hmupui tawl a.
3. Ka mi thuoi Tita chu Grik mi ni sienkhom ser intan luitir an tum chuong nawh.
4. Isu Kristaa zalenna ei nei enthla dinga an ni laia mi enthlatu inzep rukhai ruok chun an suokah mi hren an tum a.
5. Amiruokchu, Chanchin Tha thutak chu in ta dinga hum a ni tlat theina dingin mit khap kar te khom ngirhmun kan intawl hrim hrim nawh.
6. Mi challang deua inlang (a tu khom ni hai sien ka ta dingin a danglam chuong nawh, Pathienin tu khom a en dang naw leiin), chuong mi poimawhai chun ka thuah ieng khom hril sap ding chuong an nei nawh.
7. Nei nek hmanin Peter chu Judahai laia Chanchin Tha hril sin inkoltir a ni ang bokin Jentelhai kuoma Chanchin Tha hril sin chu ka kuoma inkoltir a nih ti an hmu a.
8. Juda sertanhai laia tirko ni dinga Peter dandetu chun sertan lo Jentelhai laia tirko ni dingin a mi dande a nih.
9. Chuongchun, kohran bana an ngai tak Jakob hai, Peter hai le Johan hai khomin lunginsietna ka dongzie an hmuin, keinin Jentelhai lai rong bawl a, annin sertanhai lai rong bawl dingin Barnaba le kei chu inpawlna kut chang tieng an mi'n hlan ta lem a nih.
10. Anni laia mi retheihai ruok chu hre zing dingin thu an mi'n cha a, chu chu thaw kan lo tum sa hrim a ni si a.
11. Chun, Peter chu Antiokeia a hung khan a thaw indik naw leiin hmaisanah ka kal a.
12. Jentelhai ser intantir tuma Jakob kuoma inthoka mi thenkhat an hung hma chun Jentelhai lai bu a fak hlak a. An hung tlung phing leh sertan pawlhai chu a ti leiin a'n kei tim a, Jentelhai laka chun a'n thier fihlim ta dai a.
13. Juda danghai khom chun a lemderna chu an lo thlop a, Barnaba chen khom an lo thuoi kawi hman hiel a.
14. An thil thaw dan chu Chanchin Tha thutak leh a'n hme nawh ti ka hmuin, an renga hmaah hieng hin Peter chu ka hril a: "Nang Juda i na, Juda anga um loin Jentelhai angin i hang khawsa a, chuong sa khom chun ieng leia Jentelhai chu Juda mi anga inumtir i tum?
15. Eini chu Juda mi hrima pieng ei na, 'Jentel mi suol' an ti hlak hai ang ei ni nawh.
16. Amiruokchu, miin Dan a zawm lei ni loin Isu Krista a ring lei lemin Pathien hmaah thiem a chang thei chauh a nih ti ei hriet; Dan zawm lei ni loa Krista ring leia Pathien hmaa thiem ei chang theina dingin eini ngei khomin Kristaa chun ringna ei innghat a nih. Dan zawm leiin tu khom Pathien hmaah thiem an chang thei si nawh.
17. Nisienlakhom, Krista ei ring leia Pathien hmaa thiem chang tum einihai hi 'Jentel mi suolhai' ang chiea ngai ei ni si chun, Kristan suol rong a bawl tina am a ni ding? Teu lo e!
18. Ka lo thiek tah Dan bok inngir thar nawk ka tum si chun a bawsetu ka nih ti a chieng.
19. Kei chun Pathien tieng ka hring theina dingin, Dan fe thlengin Dan chu ka thisan tah.
20. Kei chu Krista kuomah kraws-a hemde ka ni tah a, ka hring zing ta naw a, Krista chu keimaah a hring ta lem a nih. Tuta taksaa ka hring hi mi hmangai a, ka ta dinga hringna petu Pathien Naupa ringa hring ka nih.
21. Pathien lunginsietna hi hnawl ka tum nawh. Dan zawm leia thiem chang thei a ni chun Krista thina hi a thlawn el ning a tih" tiin.

  Galatians (2/6)