Galatians (1/6)  →
1. Kei Paula, mihriem tir ni lo, mihriem zar khom ni lo, Isu Krista le mithi laia inthoka ama keithotu P� Pathien ruot hin,
2. kan kuoma unau umhai po po leh hin Galati rama kohranhai chibai kan buk cheu.
3. Pathien ei Pa le Lalpa Isu Krista kuoma inthoka lunginsietna le inremna chu in kuomah um raw se.
4. Ei Pa Pathien ditzawng chu zawmin tu lai hun tha naw taka inthoka mi san suok ding le ei suolhai mi sawp faipek dingin ama Krista ngei chu an pe ta si a.
5. Pathien kuomah ropuina chatuonin um raw se. Amen
6. Krista lunginsietnaa kotu cheu kha maksana 'chanchin tha' chi dang tieng in pakai thut el hi mak ka ti a nih!
7. Chanchin Tha chi dang a um naw a, nangni sukbuoi tumtuhaiin Krista Chanchin Tha an her kawi lei chauh a nih ti a chieng.
8. Keini khom ni inlang, vana inthoka hung tum vantirko khom ni hai sien, kan hril ta sa ni lo Chanchin Tha dang hrim hrim hung hriltu chu tongsephurin um raw se.
9. Ka hril ta cheu ang khan tu hin ka hril nawk cheu a nih: tu khomin Chanchin Tha in pom tah ti lo a dang an hril cheu chun chatuonin tongsephurin um mol raw se.
10. Mihriem tlon lungawi am ka tum Pathien lem? An naw leh, mihriem lawm zawng hril tumin ka'n lang hrim hrim am a ni? Mihriem suklawm tum ni lang chu Krista siehlaw ni naw ning.
11. Unauhai, Chanchin Tha ka hril cheu kha mihriem thu phuokfawm a ni nawh ti in hriet ka nuom.
12. Mihriem kuoma inthoka ka dong a ni naw a, tu khomin an mi'n chuktir bok nawh; Isu Krista ngeiin ka kuoma a puong a ni lem.
13. Juda mi fir ka ni laia ka um dan kha in hriet, khanga rawng taka Pathien kohran suknomnaa rawt chimit ka tum hlakzie hai kha.
14. Kan thlatuhai thurosie vong chungchangah ka ruolpui Judahai lai chu a kul a taia thahnem ngai bik le chu konga Judahai laia a turu tak ka ni hlak a.
15. Nisienlakhom, Pathien chun ka nu sula ka um laia inthokin a mi'n ser hrang a, a lunginsietnain a mi ko a.
16. Jentelhai lai a Chanchin Tha ka hril theina dinga a Naupa ka kuoma a hung inlartir lai khan mi dang tu khom ka'n rawnpui nawh.
17. Tirko ka ni hmaa tirko lo ni tah, Jerusalema umhai kuomah ka hang fe bok nawh. Arabia ramah ka fe nghal a, chu taka inthok chun Damaskaah ka hung kir nawk chauh lem a nih.
18. Chun, kum thum a'n voi hnungin Petera inhmelhrietpui dingin Jerusalemah ka hang fe a, a kuomah ni sawmpanga ka cham a.
19. Lalpa unau Jakob ti chauh naw chu tirko dang tu khom ka'n hmupui nawh.
20. Ka thu ziekhai hi a'n dik, Pathien hmaah khel ka hril nawh.
21. Chu hnung chun Suria ram le Kiliki ram ka sir a.
22. Judai rama Kristaa kohranhai lem chun mi mal takin an mi la hmel hriet tawl nawh.
23. "Kha hmaa mi suknomnatu khan nuoi chimit a tum ringna thu a hril ve tah" ti mi hril ruok chu an lo hriet a.
24. Keima leiin Pathien an inpak a.
      Galatians (1/6)  →