←  Ezra (9/10)  →
1. Chuong thil po po zoa chun an thuoituhai chu ka kuomah an hung a, " Israel mi tam tak chu, thiempuhai le Levihai chenin, hi rama chenghai laka hin an inthier fihlim chuong naw a, Kanan mi hai, Hit mi hai, Periz mi hai, Jebu mi hai, Amon mi hai, Moab mi hai, Aigupta mi hai le Amor mihai thil ching tirdakum tak chu an thaw ve a.
2. Anni ngei le an nauhaiin hnam danghai chu nuhmeiah an nei a, ei chi thienghlim tak chu hi rama mihai chi leh an chok pol a, mi lien le mi lalhai chu hi bawsietna thila hin a zuolkai tak an nih" tiin an mi hung hril a.
3. Chu thu chu ka hriet phing leh ka silfenhai ka pot thler a, ka sam le ka khakhmul ka vaw kol a, hrilhai takin ka thung tlok tlok a.
4. Saltang hung kir laia mi, LALPA Israel Pathien thu hrea ti le poisa taphot chu ka kuomah an hung tlan khawm a, zan tieng inthawi hun chenin a ngaina tak hre loin ka thung tlok tlok a.
5. Zan tieng inthawi huna chun thuomhnaw inek neng nunga lungngai taka inthung lai chu ka tho a, dingthathuona ban pharin LALPA ka Pathien kuomah ka tongtai a,
6. "Aw ka Pathien, ka hmai a va hang mawk tawpkhawk ngei de aw! Nangma tieng ka hung ngha ringot khom hi inzakum ka ti a nih. Aw Pathien, kan bawsietnahai chun a mi chim pil a, kan thiem nawna chun van a tong a nih.
7. Kan pi le puhaia inthok tah khan tu chen khom hin nasa takin kan suol a, kan suol lei tak chun kan lalhai le thiempuhai khom ram dang lalhai kawlhnama that le sala thuoiin an um a, an rok a, an sukmuolpho a, voisun chena kan um dan ang hin.
8. "Tu hin hun tawite sung chu zangaina mi pein, LALPA kan Pathienin mi a tlawma zawng dama i mi la hlahai chu i Hmun Thienghlima hin i mi'n umtir a, kan mitmeng i sukhar a, kan saltangnaa inthokin i mi sawk zang a.
9. Sala kan intang lai khomin kan LALPA chun i mi thlathlam ngai naw a, Persia lal lunginsiet i mi'n hlawtir a. LALPA in chu indin thar nawk ding le a sietnahai siem tha dingin hringna thar i mi pek a, Judai ram le Jerusalemah himna bangin i mi'n huol a.
10. " Tu hin aw kan Pathien, ieng am hril tang kan ta le? I thupekhai chu kan lo nghatsan ta si a.
11. I siehlaw zawlneihai hmanga, 'In va fena ding, in va hluo ding hmun chu a ram mihai suolnain a sukporche ta a, thil tirdakum an ching chun a ram kil le kap a sukporche a.
12. Chuleiin, in naunuhai chu an naupahai nuhmei dingin inneitir naw unla, in naupahai khom an naunuhai pasalah inneitir bok naw ro. In hrat zing a, a ram tharsuok thahai tlan a, a ram chu in thlahai kuoma kumkhuoa in inrochungtir theina dingin, ieng lai khomin anni chu inruol thatna thu thlungpui ngai naw ro' tia thu i lo pek tah kha a ni si a.
13. "Kan chunga thil hung tlunghai hi kan thil suol thaw lei le kan thiem nawna nasa tak lei vong a nih. Chuong sa khom chun kan Pathien, kan suol ang phua mi hrem loin hieng zat hi damin i mi la hla ta rop a ni hi!
14. Hieng hi hre zing siin i thupekhai bawse nawkin, thil tirdakum thawtuhai leh kan innei pol pei ding am a ni? A dam khawsuok um lo le hla hrim nei loa mi sukram vong hiel khopin kan chungah i lung a sen naw dim a ni?
15. Aw LALPA, Israelhai Pathien, nang chu i fel a, voisun chen hin dama hla sun chu i mi la nei a ni hi. Kan bawsietna leia i hmaa ngir thei hrim hrim um naw inlang khom, kan thiem nawna pumin i hmaah kan hung a nih" ka ti a.
←  Ezra (9/10)  →