Ezra (7/10)  

1. Kum tam tak hnung, Persia lal Artazerzia inlal laiin mi pakhat a hming Ezra a um a. Ama chu Seraia naupa a na, ama chu Azaria naupa a na, ama chu Hilkia naupa a na,
2. ama chu Salum naupa a na, ama chu Zadok naupa a na, ama chu Ahitub naupa a na,
3. ama chu Amaria naupa a na, ama chu Azaria naupa a na, ama chu Meraiot naupa a na,
4. ama chu Zerahia naupa a na, ama chu Uzi naupa a na, ama chu Buki naupa a na,
5. ama chu Abisua naupa a na, ama chu Finehas naupa a na, ama chu Eleazar naupa a na, ama chu thiempu lal Aron naupa a nih.
6. Hi Ezra hi lekha ziektu a na, LALPA, Israelhai Pathienin Mosie hmanga Israel mipuihai kuoma a pek danhai chu hre tak el a nih. Babulona inthokin Jerusalemah a hung a, LALPA a Pathienin a ditsak leiin lal chun a hni po po chu a pek pei a.
7. Lal Artazerzia inlala inthoka kum sarinaah Israel mi iemani zat chu thiempu hai, Levi chia mi hai, hla saktu hai, kotkhar vengtu hai le tempula thoktu thenkhathai chu thuoiin Jerusalemah a hang fe a.
8. Chu kum thla khatna ni, Artazerzia inlala inthoka kum sarinaa chun Jerusalem a hang tlung a.
9. Babulona inthokin thla khatna ni khat niin a suok a, Pathienin ama chu a veng pei a, thla ngana ni khat ni chun Jerusalem a tlung a.
10. Ezra chu LALPA Dan inchuk le zawm tum tlat mi, a danhai le thupekhai chu Israelhai inchuktir dinga inpe zo mi a nih.
11. Chun, hi hi lal Artazerzia-in thiempu Ezra, lekha ziektu, Israelhai ta dinga LALPA thupekhai le thuruothai hrietna tienga mi thiem kuoma lekha a thon chu a nih:
12. Lalhai lal Artazerzia-in thiempu Ezra, van Pathien Danhai zirtirtu chu chibai ka buk.
13. "Tu hin ka ram sunga Israel mi po po le thiempuhai le Levihai tu khom a nuom taphot chu nangma le fe thei dingin thu ka pek.
14. I kuta i kol, in Pathien Danhai chungthua Judai ram le Jerusalem ngirhmun chu hang thlithlai dingin lal le a khawnbawl pasarihaiin kan tir che a nih.
15. Kei le ka khawnbawlhaiin mani lung puoka phal taka Israelhai Pathien, Jerusalema Tempul neitu ta dinga thilpek an inhlan tangkaruo le rangkachakhai hi chawi la,
16. Babulon rama inthoka i hmu thei zat taphot tangkaruo le rangkachakhai le mipuihai le thiempuhaiin Jerusalema an Pathien ta dinga mani lung puoka an inhlan thilpek po po khom chu chawi bok rawh.
17. Hi sum hin bawngchal dam, beramchal dam, beramte dam le fak le dawn thilhlan dinghai chu inchaw nghal i ta, Jerusalema in Pathien Tempula maichama chun i hang inhlan ding a nih.
18. "Chun, tangkaruo le rangkachak hmang banghai chu in Pathien dit zawng nia in hriet dan ang angin nang le i unau Judahaiin hmang ro.
19. In Pathien Tempula rongbawlnaa hmang ding bur le belhai ruok kha chu a kimin Jerusalema in Pathien Tempula chun inhlan rawh.
20. In Pathien Tempula dinga mamaw le chuong ang thila dinga sum in tul zat zat chu lal sum ina inthokin lo hmang pei rawh.
21. "Tu hin kei, lal Artazerzia ngeiin Eufretis vadung thlang tieng biela lal sumkoltu po po kuomah thiempu le van Pathien danhai zirtirtu Ezra-in a hni taphot chu lo pe pei dingin thu ka pek a nih.
22. An pek thei zat ding chu tangkaruo kilogram sangthum zali, huit kilogram singkhat, uoiin litar sanghni, hriek litar sanghni le machi chu tiem chin nei lo ning a tih.
23. Van Pathienin thaw dinga a ti taphot chu van Pathien Tempula dingin thaw ngei ro. Ieng leiin am Pathien lungsenna chu lal le a naupahai ram chunga hin a tla ding a na?
24. Chun, thiempu hai, Levi hai, hla saktu hai, kotkhar vengtu hai le tempula rongbawltu hai le Pathien ina sinthawtu hrim hrim hai chu sie amanih, an thil nei man amanih le leiman ieng khom in inchawitir ding a ni nawh ti ka'n hriettir bok cheu.
25. "Chun, nang Ezra, Pathienin varna a pek che kha hmangin, Eufretis vadung thlang tieng biela mipuihai chunga indik taka roreltu dingin in Pathien dan hre mi hotu le roreltu dinghai chu ruot la, a hre nawhai chu inchuktir rawh.
26. Tu khom in Pathien dan le lal dan zawm naw taphot chu sukhlum amanih, a rama inthoka hnot suok amanih, a thil neihai lakpek amanih le lung ina intangtir amanih a ni nghal ngei ngei ding a nih" tiin.
27. Hieng anga Jerusalema LALPA Tempul chawimawi nuomna lal lungrila inneitirtu LALPA, ei pi le puhai Pathien chu inpakin um raw se.
28. Ama chun lal le a khawnbawlhai le a hnuoia thuneituhai po po hmaah a hmangaina chuoi ngai lo chu ka chungah inlangtirin a mi chawimawi a. LALPA ka Pathien zangaina kut chu ka chungah a um leiin a mi sukhuoi a, Israelhai laia lukhaitu deu deuhai chu ka ruola Jerusalem tienga kir tung ve dingin ka hawr khawm thei tah a nih.

  Ezra (7/10)