←  Ezra (6/10)  →
1. Lal Daria chun Babulona ro hlu le thil hlui an sie khawmna in chu dap dingin thu a pek a.
2. Media biela Ektabana kulbing sanga chun lekhabu ziel an hmu suok a, chu taka chun hieng hin a'n ziek a:
3. "Thufun: Lal Kura inlal tan kuma Jerusalema Pathien Tempul chungchanga lal thupek insuo chu: Judahaiin inthawina an inhlanna hlak hmuna bok Tempul chu bawl nawk ni sien la, a thut lungphum khom a pangngai charah phum nawk ni raw se. A in insangzie chu meter sawmhni le pasari ning a ta, a khang chu meter sawmhni le pasari bok ning a tih.
4. Lung chei thuo thum inkarthlak peiah thingphek rem pei ding a na, a bawlnaa sengso chu lal sum ina inthoka pek ding a nih.
5. Jerusalem Tempul, Pathien ina mi rangkachak le tangkaruoa siem bur le belhai, Nebukadnezzarin Babulona a hawn po pohai chu a umna hmunah thak kir nawk vong a, Pathien ina hlu lut nawk ding a nih" tiin.
6. Chuongchun, lal Daria chun hieng ang hin thu a thon a: "Eufretis vadung thlang tieng optu Tatenai le Sethar-Bozenai le nangni a biela thoktuhai, lo inthier fihlim ro.
7. Hi Pathien in an bawl nawknaa hin lo inrol naw ro. Judahai optu le Juda upahaiin Pathien in hi a hmun pangngaiah bawl tha nawk raw hai se.
8. Chun, hi thu hi ka pek cheu: Juda upahaiin Pathien Tempul an bawl nawknaa hin lo thangpui unla, an sin a chai nawna dingin hieng mihai sengso po po hi in biel sung, Eufretis vadung thlang tienga sie le leiman in khon, lal sum ina inthoka pek nghal vat pei ding a nih.
9. Van Pathien kuoma pumraw thilhlana hmang ding an mamaw taphot bawngchal tuoi hai, beramchal hai, beramte hai, bu le bal hai, machi hai, uoiin hai le hriek hai chu, Jerusalema thiempuhaiin an hung hni ang peiin in lo pek ngei ngei ding a nih.
10. Chuonga in thaw chun van Pathien lawm zawng inthawina chu inhlan thei an ta, lal le a naupahai dam sawtna dingin tongtai thei bok an tih.
11. "Tu khom hi thupek lo thlak danglamtu chu a in chung insun pot dok unla, a hmor inzum unla, chu chun ama chu thil tlang unla, a in chu ek durah inchangtir ro.
12. Hi ka thupek thlak danglamtu amanih le Jerusalema Tempul sukse dinga kut lektu hnam le lalhai chu ama hming chengna dinga hi hmun thlangtu Pathien chun sukbohmang vong raw se. Kei Daria hin in zawm thlap dingin hieng thupekhai hi ka pek a nih" tiin.
13. Lal Daria thupek chu hlen suok dingin Eufretis vadung thlang tieng ram optu Tatenai le Sethar-Bozenai le a thawpuihai chun taima takin thang an lak a.
14. Chuongchun, Juda upahai chun Tempul bawl chu an sunzom pei a, zawlnei Hagai le Iddo naupa zawlnei Zekaria hai thu hril chun nasa takin a sukphur tawl a. Israelhai Pathien thupek ang le Persia lal Kura le Daria le Artazerzia hai thupek ang chun an bawl a, Tempul chu bawl zo a ni ta a.
15. Lal Daria inlala inthoka kum rukna, Adar thla ni thumahc Tempul chu an bawl zo vong hman a nih.
16. Chuongchun, Israel mipui hai, thiempu hai, Levi hai le mi dang saltang hung kirhai po po chun Pathien Tempul inhlanna chu hlim takin an hmang a.
17. Pathien Tempul an inhlan ni chun bawngchal tuoi zakhat, beramchal zahni le beramte zali an inhlan a. Israel hnam sawm le hnam hnihai suol thawina dingin kelchal sawm le pahni an inhlan bok a.
18. Mosie dan bua ziek angin, thiempuhai le Levi chihai chu Pathien Tempula an sin ding seng an siem felpek a.
19. Chuongchun, thla khatna, ni sawm le ni linaahd saltang hung kirhai chun fekan kut an hmang a.
20. Thiempuhai le Levi chihai chun an rengin inthienna an nei a, an hung inthieng ta a. Levihai chun saltang hung kirhai po po ta ding le thiempu danghai le anni ta dingin fekan kut beramte chu an that a.
21. Israel thla, saltang hung kir nawkhai le hnam dang umhai, an thil ching tirdakum laka inthier fihlima LALPA, Israelhai Pathien pomtuhai leh fekan ruoi chu an kil tlang a.
22. LALPAN Asuria lale lungril chu anni tieng a'n thlektir a, Pathien, Israelhai Pathien in an bawlnaah nasa takin a thangpui a. Chuonga LALPAN lawmnaa a sung sip tawl lei chun chol thang lo bei kut chu hlim takin ni sari sung an hmang a.
←  Ezra (6/10)  →