←  Ezra (5/10)  →
1. Chuong lai chun zawlnei Hagai le Ido thlaa mi zawlnei Zekaria hai chun Judai ram le Jerusalema Juda umhai kuomah Israelhai Pathien hmingin thu an hril hlak a.
2. Sealtiel naupa Zerubabel le Jozadak (Jehozadak) naupa Jesua hai chun an thu chu zawmin, Jerusalema Pathien Tempul bawl chu an sunzom nawk ta a, an kuoma Pathien zawlnei pahni umhai chun an thangpui a.
3. Chu phing leh Eufretis thlang tieng ram optu Tatenai le Sethar-Bozenai le a thawpuihai chu Jerusalemah an hung a, "Hi tempul hi bawl tha ding le a kulhai indin thar nawk dingin tuin am thu a pek cheu a?" an ta.
4. Chun, anni bok chun, "Hi in bawltuhai hi tuhai am an na?" tiin an indon bok a.
5. Sienkhom an Pathienin Juda upahai chu a veng tlat leiin, lal Daria kuoma an chungthu an intlun sung le a donna an hmu hma khat chu an in bawl chu an inchawltir chuong nawh.
6. Eufretis vadung ral thlang tieng ram optu Tatenai le Sethar-Bozenai le an sinthawpuihai chun Lal Daria kuomah lekha an thon a,
7. hieng ang hin an ripawt a: "Lal Daria, i chungah thlamuongna um raw se.
8. Judai ram biela Pathien ropui Tempul an bawlna hmun kan sir thu i kuomah kan hung ripawt a nih. Mawi taka lung ser nama bawl a na, a bang chunga chun thing nawt nam an khang a. Taima taka anni ngei inrawina hnuoia anni kut ngeia an bawl a na, hma khom a sawn hrat hle.
9. " 'Hi tempul hi bawl ding le a kulhai indin thar dingin tuin am thu a pek cheu a na?' tiin an upahai kan indon a.
10. An hotuhai hming inchika i kuoma kan hung ripawt theina dingin an hminghai khom kan indon bok a.
11. Hi hi an mi donna chu a nih: 'Keini hi hnuoi le van Pathien siehlawhai kan ni a, Israel lal ropui takin kum tam tak liem taa a lo bawl zo tah kha kan indin thar nawk el a nih.
12. Kan pi le puhaiin vana Pathien an suklungsen leiin anni chu Kaldai mi Babulon lal Nebukadnezzar kutah a pek a, ama chun hi tempul hi a suksiet a, mihai chu Babulon tieng salah a thuoi a.
13. Amiruokchu, Babulon lal Kura hung inlal tan kum chun Pathien in hi bawl tha nawk dingin Lal Kura chun thu a pek a.
14. Nebukadnezzarin Jerusalema an Pathien ina inthoka rangkachak le tangkaruoa siem bur le bel a lakhai, Babulona ama tempula a siehai chu lal Kura chun a lak suok vong a. Chun, lal Kura chun mi pakhat a hming Sesbazar chu keini mi optu dingin a mi pek a, a kuomah,
15. Hieng bur le belhai hi la la, fe la, Jerusalema Tempulah sie la, Tempul chu a hmun ngaiah bawl nawk ni raw se' tiin.
16. "Chuongchun, Sesbazar chu a hung a, Jerusalema Pathien in lungphum khom a hung phum a. Chu nia inthoka voisun ni chen hin bawl zom a la ni zing a, sienkhom bawl zo a la ni nawh.
17. Chuleiin, lalin tha a ti zawng a ni chun Babulon lal ina thil hlui sie khawmnaah lal Kura'n Jerusalema Pathien in indin thar nawk dinga thupek a lo insuo chu zong suok ni raw se. Chu hnungah hi chungthua thu tlukna chu lalin mi hung hril raw se" tiin.
←  Ezra (5/10)  →