Ezra (3/10)  

1. Mani khuo senga Israelhai an inbengbel nawk hnungin, thla sarina favang intan hlim chun inthuruol takin Jerusalemah an pung khawm a.
2. Jozadak naupa Jesua le a thiempu chanpuihai le Sealtiel naupa Zerubabel le a rongbawlpuihai chun Pathien mi Mosie Dan bua inziek angin pumraw thilhlana inthawina ding Israelhai Pathien ta dingin maicham an siem a.
3. An kawl le kienga mihai chu ti hle hai sienkhom, maicham chu a hmun pangngaiah an indin thar nawk a, zing tieng le zan tieng pumraw thilhlan an inhlan a.
4. Chun, Mosie dan bua inziek angin, Bawkte Kut an hmang a, ni tina pumraw thilhlan inhlan dinga bituk ang thlapin an inhlan a.
5. Pumraw thilhlan bakah thla thar lawmnaa thilhlanhai dam, LALPA ta dinga kut ni an ruot an inser changa thilhlanhai dam, mani lung puoka thilhlanhai dam chu an inhlan bok a.
6. LALPA Tempul lungphum chu la phum tan naw hai sienkhom, thla sarina ni khat nia inthok chun pumraw thilhlanhai chu an inhlan tan nghal a nih.
7. Persia lal Kura'n phalna a pek angin, lung sertu le themthiemhai an ruoi a, Tura le Sidon mihai chu Lebanona inthokin Jopa kaiah sidar thing an hung intoltir a, a manah bu le uoiin le hriek an pek a.
8. Jerusalema Pathien in an tlunga inthoka a kum hnina le thla hninaa chun Sealtiel naupa Zerubabel hai, Jozadak naupa Jesua hai le an unau dang thiempuhai, Levi chia mihai le Jerusalema saltang hung kir po po chun tempul bawl chu an tan a, Levi chia mi, kum sawmhni le a chung tienga upa chinhai chu LALPA in bawla sinthawhai inrawitu dingin an ruot a.
9. Chuongchun, Jesua naupahai le a unauhai, Kadmiel le a naupahai, Hodavia thlahai chun LALPA tempula sinthawtuhai chu an inrawi a; Levi chia mi Henedad sungkuohai chun an thangpui bok a.
10. In bawltuhaiin LALPA tempul lungphum an phum zo chun, Israel lal Davida-in thaw dan ding a lo ruot angin, thiempuhai chun thuom an inbel a, tawtawrawt mut dingin an umna ding hmunah an ngir a, Levi chia mi Asaf thlahai khom LALPA inpakna hla sak dingin darbenthek leh an ngir bok a.
11. Chuongchun lawmthu hrilin,"Ama chu a tha si a,A ngilneina chu kumtluongin,Israelhai chungah a um zing"tiin LALPA chu an inpak a. LALPA in lungphum an phum tak lei chun lawm taka LALPA inpakin mipui chu an khek dur dur a.
12. Nisienkhom thiempuhai, Levihai le sungkuoa lukhaitu upa tieng, Tempul hmasa hmu phakhaiin tempul thut an rem lai an hmu chun, mi tam tak hlima an khek dur dur laiin, inring takin an lo tap ve thung a. Hlima an khek ri le tap ri thlier hran thei lo khopa nasaa infawk khawm chu hla taka inthok khoma hriet phak a nih.
13. (A um nawh)

  Ezra (3/10)