←  Ezra (10/10)    
1. Chuonga Pathien tempul tuolah bokkhup a, tap puma thupha chawi a, Ezra a tongtai lai chun Israel mipui tam tak, pasal le nuhmei le naupanghai chu a kuomah an hung pung khawm a, nasa takin an tap ve a.
2. Elam thlaa mi Jehiel naupa Sekania chun Ezra kuomah, "Hi rama hnam dang minuhai hi nuhmeiah kan lo nei leiin ei Pathien chungah thil suol kan lo thaw takzet a nih ti kan inpuong a. Amiruokchu, Israelhai lai ei la'n siem tha thei tho annawm.
3. Thaw ro, hnam dang mi nuhmeia ei neihai le an laka pieng po pohai chu the dingin Pathien kuomah thu thlung thar nawk ei tiu. I thurawn le ei Pathien thupek inzatuhai thu angin thawng ei ta, Pathien dan chu zawm ei tiu.
4. Tho raw khai, hi thil siem that dan ding mi kawkhmu chu i mawphurna a nih. Huoi takin um la, thaw rawh, nangma tieng thang tlat kan tih" a ta.
5. Chu phing leh Ezra chu a tho a, thiempuhai le Levihai laia an hotu un deu deuhai le Israel mipui po po chu Sekania hril anga thaw dingin intiemkamna a'n neitir a.
6. Chu zoah Ezra chu LALPA Tempul tuola inthok chun a suok a, Eliasib naupa Jehohanan pindanah a fe a, chu taka a um sung chun saltang suokhai suolna leia lungngaiin ieng khom fain a dawn nawh.
7. Chuongchun, Judai ram po po le Jerusalema saltang hung kirhai po po chu Jerusalema hung inkhawm dingin a'n cha a,
8. tu khom ni thum sunga hung inlang ve lo chu, mi lienhai le upahai thu rel angin, a thil nei po po hrenpek a, ama chu saltang hung kirhai laia inthoka hnot suok ding a ni thu chu a puong a.
9. Chuongchun, Juda le Benjamin thlahai rama um po po chu ni thum sungin Jerusalemah an fe khawm ta vong a. Thla kuona ni sawmhninaaf chun an inkhawm a, mipui po po chu Pathien Tempul tuolzawla chun an thung khup a, an thu chai ding rik lei le ruo a sur bok leiin an inthin hlop hlop a.
10. Thiempu Ezra chu a hung ngir suok a, an kuomah, "Thil suol in lo thaw ta a, hnam dang minuhai chu nuhmeiah in nei a. Kha hma nek hmana nasa nawkzuola thiemnaw chang ei lo ni tah.
11. LALPA, in pi le puhai Pathien hmaa chun in suolhai inpuong unla, a dit zawng angin thaw ta ro. A ram mihai le hieng hnam dang minuhai laka hin inthier fihlim ro" a ta.
12. Mipui po po chun rawl inring takin, "I hril indik ie! I ti ang tak chun thawng kan tih.
13. Amiruokchu hi taka ngir mipuihai lai hin hnam dang nuhmeia nei tam tak kan um a, hi thil hi ni khat ni hni sunga ching fel el thei ding a ni nawh. Tu hi raw sur hun a ni bok si a, tuola hin sawt tak ngir zing ngaina a um nawh.
14. Kan hotuhai hin keini aiawin thaw lem raw hai se. Hi chungthua eini laka ei Pathien lungsenna nasa tak chu a'n kieng theina dingin, hnam dang mi nuhmeia neihai po chu an khuo chita hotu le roreltuhai leh hun ruotah hung inlang lem raw hai se" an ta.
15. Asahel naupa Jonathan le Tikva naupa Jahzeia hai chun chu rotna chu an kal a, Levi chia mi Mesulam le Sabethai hai khomin an remti nawh.
16. Chuongchun, saltang hung kirhai chun an rot dan ang chun an thaw a, Ezra chun sungkuo tin aiawtu ding hming suot meuin a thlang suok a, an chungchang ngaituo dinga hotu ruothai chun thla sawmna ni khatg ni chun an thok tan a.
17. A kum nawk thla khatna ni khatnah ni chun hnam dang mi nuhmeia neihai chungchang chu an sut fel hman a.
18. Hienghai hi thiempuhai laia hnam dang minu nuhmeia neihai chu an nih: Jehozadak naupa Jesua le a unauhai sungkuoa inthokin Maaseia, Eliezer, Jarib le Gedalia an nih.
19. An nuhmeihai ma dingin thu an intiem a, an thiem nawna leiin beramchal pakhatin an inthawi seng a.
20. Chun, Imer sungkuoa inthokin Hanani le Eliezer le Zebadia;
21. Harim sungkuoa inthokin Maaseia, Elija, Semaia, Jehiel le Uzia;
22. Pasur sungkuoa inthokin Elionai, Maaseia, Ismael, Nethanel, Jozabad le Elasa an nih.
23. Levi thlaa mi thiem naw changhai chu: Jozabad, Simei, Kelaia (Kelita tia an ko bok), Pathahia, Juda le Eliezer an nih.
24. Hla saktu thiem naw chang chu Eliashib a nih. Kotkhar vengtu laia thiem naw changhai chu Salum, Telem le Uri an nih.
25. Israel mi danghai laia thiem naw changhai chu: Paros sungkuoa inthokin Ramia, Izia, Malkija, Mijamin, Eleazar le Benaia;
26. Elam sungkuoa inthokin Matania, Zekaria, Jehiel, Abdi, Jeremot le Elija;
27. Zatu sungkuoa inthokin Elioenei, Eliashib, Matania, Jeremot, Zabad le Aziza;
28. Bebai sungkuoa inthokin Jehohanan, Hanania, Zabai le Athlai;
29. Bani sungkuoa inthokin Mesulam, Maluk, Adaia, Jasub, Seal le Jeremot;
30. Pahat-moab sungkuoa inthokin Adna, Kelal, Benaia, Maaseia, Matania, Bezalal, Binui le Manase;
31. Harim sungkuoa inthokin Eliezar, Isija, Malkija, Semaia, Simeon,
32. Benjamin, Maluk le Semaria;
33. Hasum sungkuoa inthokin Matenai, Matata, Zabad, Elifelet, Jeremai, Manase le Simei;
34. Bani sungkuoa inthokin Maadai, Amram, Uel,
35. Benaia, Bedeia, Keluhi,
36. Vania, Meremot, Eliasib,
37. Matania, Matenai le Jaasu;
38. Binui sungkuoa inthokin Simei,
39. Selemia, Nathan, Adaia,
40. Maknadebai, Sasai, Sarai;
41. Azarel, Selemia, Semaria,
42. Salum, Amaria le Josefa;
43. Nebo sungkuoa inthokin Jeiel, Matithia, Zabad, Zebina, Jadai, Joel le Benaia an nih.
44. Hienghai po hi hnam dang minu nuhmeia neihai chu an na, a thenin anni lakah nau an nei bok.
←  Ezra (10/10)