| Ezra (1/10) → |
| 1. | Persia lal Kura inlal kumina LALPAN a thu zawlnei Jeremia hmanga a lo hril tah chu a hung intlung kimtir a. A ram sung po poa puong dar dingin hieng ang hin thupek ziek ngeia insuo dingin LALPAN Persia lal Kura lungrilah sin a thaw a: |
| 2. | "Hi hi Persia lal Kura thusuok a nih: Hnuoia ram po po hi LALPA, van Pathien chun a mi pek ta a, Judai ram Jerusalemah a Tempul bawl dingin a mi ruot a. |
| 3. | Israelhai Pathien, Jerusalema um, LALPA Tempul chu bawl dingin ama mi nangni laia tu khom Judai ram Jerusalem tieng kir thei in tih. Pathien chu in kuomah um raw se. |
| 4. | Chun, mi tu khom, khaw lai hmuna umhai khomin Jerusalema Pathien tempul bawlna dinga mani lung puok ang dungzuia thil an pek bakah saltang dam khawsuok la um sunhai chu tangkaruo hai, rangkachak hai, hmangruo hai le ran hai pein thangpui raw hai se" tiin. |
| 5. | Chuongchun, Juda hnam le Benjamin hnama lukhaituhai, thiempuhai le Levihai le tu khom LALPAN an lungrila sin a thaw taphothai chu Jerusalema LALPA Tempul hang bawl dingin an inthok suok a. |
| 6. | An kawl le kienga mihai chun mani lung puoka an thaw bakah tangkaruo le rangkachaka siem bur le bel dam, an inzin sunga an fak le dawn ding dam, ran dam le thilpek hlu tak tak dam pein an thangpui a. |
| 7. | Chu bakah, lal Kura chun kha hmaa Nebukadnezzarin Jerusalem LALPA Tempula inthoka bur le bel a lak le hawn, a pathien ina a siehai chu a'n lak suoktir a. |
| 8. | Lal Kura chun a sum enkoltu Mithredat chu tiem vong ding le Judai ram tienga kir pawlhai thuoitu Sesbazar kuta inhlan dingin thu a pek a. |
| 9. | Chuonghai chu rangkachak thleng sawmthum, tangruo thleng sangkhat, tangkaruo berbu sawmhni pakuo, |
| 10. | rangkachak thlengkum sawmthum, tangkaruo thlengkum zali le sawmkhat le bur le bel chi hrang hrang sangkhat a nih. |
| 11. | Babulona inthoka saltanghai Jerusalema an hung kir nawk tuma Sesbazar kuta rangkachak le tangkaruo bur le bel an hawn tung po po chu sangnga le zali a nih. |
| Ezra (1/10) → |