←  Ezekiel (9/48)  →

---

1.

Chun, LALPA chun rawl rapum takin, "Khawpui hremtu dinga ruothai khan an hriemhrei seng chawiin hung hnai ta raw hai se" tiin a ko khek a.

2.

Hmar tieng kotkhar chunghnunga inthok chun mi paruk, an kuta thina hriemhrei chawiin, an hung a. Anni laia puon zai inhmi siltu chun lekhatui bur a pai a, a hung lut a, dar maicham bula chun a ngir a.

3.

Israel Pathien ropuina chu a umna cherub-hai chunga inthok chun a tho a, tempul tuongah a hung tum thla a, puon zai inhmia inthuom lekhatui chawitu chu a ko a.

4.

LALPA chun a kuomah, "Khawpui chu fang la, Jerusalem chu fang suok rawh; a sunga thil tirdakum an thaw leia lungngai taka taphai chu an chalah inchik pei rawh" a ta.

5.

Mi danghai kuoma chun ka hriet ngeiin, "Ama hi khawpuiah zui lut unla, tu khom lunginsietna le zangaina nei der loin that ro.

6.

Pu tar le naupanghai, tlangval le nunghakhai, nuhmei le naupang po pohai, an chala inchikna put naw taphot chu, that fai vong ro. Ka tempula inthokin bei tan ro" a ta. Chuongchun, tempul kota upahaia inthok chun an that tan ta a.

7.

Chun, ama chun an kuomah, "Hi tempul hi sukporche unla, mithi ruongin suksip ro. Fe ro leh!" a ta. Chuongchun an fe suok a, khawpui sung po poa chun an che ta a.

8.

Chuonga an that lai chun ka khat chauin an mi maksan a, ka bokkhup a, "Aw Lalpa PATHIEN, Jerusalem chunga i lungsenna i bun thlak hin Israelhai laia i la hla sunhai khom i sukram vong el ding am a ni?" tiin ka khek a.

9.

Ama chun ka kuomah, "Israel le Juda sungkuohai suolna hi a nasa tah bek bek a, a ram hi thisen insuonain a sip a, khawpui hi hlemhle taka rorelnain a sip zo ta a, 'LALPAN ram chu a maksan ta a, LALPAN ieng khom a hmu nawh' an ti a.

10.

Chuleiin, lunginsietna mitin en ta nawng ka ta, hla nei tawl bok naw ning. An suol maw chu an thaw dan ang charin an lu chungah ka bun thlak ding a nih" a ta.

11.

Chun, puon zai inhmia inthuom, lekhatui paitu khan, "I thu mi pek angin ka thaw zo tah" tiin thu a hung intlun a.

---

←  Ezekiel (9/48)  →