←  Ezekiel (8/48)  →
1. Sala lal Jehoiachin an thuoia inthoka kum rukna, thla rukna le ni nganac chun ka inah ka um a, Juda upahai chu ka hmaah an inthung a, chuong lai chun Lalpa PATHIEN kut chu ka chungah a hung innghat a.
2. Ka hang en chun mihriem ni awm tak hi ka hmu a. A kawng hnuoi tieng po chu meichok angin ka hmu a, a kawng chung tieng chu thihna sen lar angin a eng phut el a.
3. Kut ni awm tak hin ka lu sip samah a mi tham a, thlarau chun hnuoi le van karah a mi chawi kang a, Pathien inlarna chun Jerusalemah a mi'n thum a. Tempul inhuonna sung hmar tienga kotkhar bul chu a mi tlungpui a, chu taka chun pathien lim hnamum, Pathien lung kheitu chu a ngir a.
4. Phaizawla inlarna ka hmu ang el khan, ka hmaa chun Israel Pathien ropuina chu a um a.
5. Chun, ama chun ka kuomah, "Mihriem naupa, hmar tieng saw en rawh" a ta. Ka hei en chun, maicham panna kotkhar bula lung sukkheitu lim chu ka hmu a.
6. Chun, ama chun ka kuomah, "Mihriem naupa, an thilthaw saw i hmu am? Israel sungkuohaiin thil tirdakum tak an thaw lei son ka in hi suoksan loin ka um zing ding maw? Sienkhom, hieng neka tirdakum lem dai hi la hmung i tih" a ta.
7. Tempul tuolzawl lutna kotsuoa chun a mi thuoi a. Ka hei en a, bang awng ka hmu a.
8. Ama chun ka kuomah, "Mihriem naupa, bang kha hang ver lien ta" a ta. Bang awng chu ka hang ver lien a, kotkhar a lo um a.
9. Ama chun, "Lut la, a sunga thil rilo le tirdakum an thawhai chu va en rawh" a ta.
10. Chuongchun, ka lut a, ka ngha vel a, banga chun thil tirdakum rul lem hai, ramsa porche lem hai le Israel sungkuohai biek milem tinreng chu an ziek tlar dul a.
11. Chuonghai hmaa chun Safan naupa Jazania rawiin Israel inpuia upa sawmsarihai chu an ngir a, mi tinin an kutah rimtui rawna berbu an chawi a, rimtui chu a khu tung lui lui a.
12. Ama chun ka kuomah, "Mihriem naupa, Israel inpuia upahaiin thim hnuoia an milem seng pindana an biek saw i hmu am? 'LALPAN a mi hmu nawh; LALPAN ram chu a zamsan tah annawm' an ti a ni saw!
13. Sawng neka an thilthaw tirdakum lem khom la hmu pei i tih" a ta.
14. Chuongchun, hmar tienga inthoka LALPA tempul lutna kotkhara chun a mi thuoi a, chutaka chun nuhmei thenkhat, Tamuzd pathien zun ngaia inthung le tap ka hmu a.
15. Ama chun, "Mihriem naupa, hi thil hi i hmu maw? Hieng nek daia tirdakum lem hi la hmung i tih" a ta.
16. Chuongchun, LALPA tempul tuolpuka chun a mi thuoi a, tempul bathlar le maicham inkara chun mi sawmhni le panga inthung ka hmu a. Anni chun tempul chu an hnung nghat a, suo tieng an ngha a, sak tieng kawla nisa chu an biek a.
17. Ama chun ka kuomah, "Mihriem naupa, hi thil hi i hmu am? Hieng ang thil tirdakum Juda sungkuoin hi hmuna an thawhai hi thil mei mei am a ni? A ram hi inpawngneknaa suksipin, lungsen dingin an mi cho phawk zing el ding am a ni? En ta, thing hnain an hnar an hup saw!
18. Chuleiin, kei khomin lungsen takin thaw veng ka ta, lunginsietna inentir nawng ka ta, indoi tawl bok naw ning. Ka na bulah khekhai sien khom, ngaithla tawl naw ning" a ta.
←  Ezekiel (8/48)  →