Ezekiel (7/48)  

1. LALPA thu chu ka kuomah a hung tlung nawk a:
2. "Mihriem naupa, Israel ram chungthua Lalpa PATHIEN thu chu hi hi a nih: Hun tawp, tawpna chu a ram kil tinah a hung tlung ie.
3. Tawpna chun a hung nang ta che a, i chungah ka lungsenna ka bun thlak ding a nih. I um dan ang peiin i chungah ro rel ka ta, i tirdakumna po po laka chun thungrul ka ti che.
4. Lunginsietna mitin en tah nawng ka ti che a, indoi nawng ka ti che a, i nungchang le khawsak dan ang le nangni laia tirdakum thaw in ching ang dungzuiin thungrul ka ti che. Chu pha chun kei hi LALPA chu ka nih ti hung hre tang i tih.
5. "Lalpa PATHIEN chun hieng hin a tih: 'Kha hmaa sietna in la hriet ngai lo, sietna rapthlak tak chu a hung ie!
6. Tawpna chu a hung tlung a, ngai ta, a hung tlung ta rup el!
7. Aw nang ram hluotu, sietnan a hung tlak buok ta che ie! A hun chu a hung tlung a, a ni chu a hnai ta a, tlanga hai chun hlimna nekin chi-aina a'n leng.
8. In chungah ka lungsenna ka bun thlak tep a, ka hrikthla ding a na, in um dan ang peiin hrem ka ti cheu a, thil tirdakum in thaw dan ang dungzuiin ka thungrul ding cheu a nih.
9. Lunginsietna mitin en tah nawng ka ti cheu a, indoi nawng ka ti cheu a, in nungchang le khawsak dan ang le tirdakum thaw in ching dan ang dungzui peiin rul ka ti cheu. Chu pha chun kei hi LALPA, in chunga kut thlaktu chu ka nih ti hung hre tang in tih.
10. "Ngai rawh, ni chun a hung nang ta cheu a, a hung tlung der tah! Sietna chu a hung puok dar a, hmol chu a hung kumum a, chapona chu a hung par tah.
11. Ritlona hrem dingin inpawngnekna chu hmolah a hung inchang a, mi tu el khom a lakah him naw ni hai a, hausakna le thil hlu iengkim khom hla bok naw nih.
12. A hun chu a hung tlung ta a, a ni ding chun a hung nang ta cheu. Inchawtu chu hlim naw sien, zortu chu lungngai bok naw raw se, an renga chungah lungsenna chu a hung tlung ding a ni si a.
13. Ram zortu chun ama le a'n chawtu dam sungin hmu kir nawk ta ngai naw nih. An renga chungthua inlarna chu thlak danglam ni naw ni a, an suolnahai leiin tu khom dam khawsuok um naw ni hai.
14. Tawtawrawt mutin, indo dingin inpeihai sien khom, indo dingin tu khom inthok suok naw ni hai, ka lungsenna chu an renga chungah a um si a.
15. "Tuolah kawlhnam, insungah hripui le tam inleng a ta, rama umhai chu kawlhnamin thing an ta, khawpui sunga umhai chu tam le hripuiin lem zo a tih.
16. Dama tlanga tlan suokhai chu an suolna leiin chul ram vathu angin inrieng takin um an tih.
17. Mi tin ban tha chu zoi thlang a ta, an khuphai chu tui angin innem a tih.
18. Saiip sil an ta, titnain tuom vel a ta, hmaimawknain sip an ta, an samhai tla kol vong a tih.
19. An tangkaruohai chu kotthlerah pei suok an ta, an rangkachakhai chu thil tirdakumah inchang a tih. LALPA lungsen nia chun an tangkaruo le rangkachakin san suok naw ni a, suola intluktirtu a ni leiin fak le dawn inchawkna ding khomin hmang naw ni hai.
20. An inbel mawina thilhai chu an chapopui a, chuong thilhai hmang chun milem rilo le tirdakumhai an siem a. Chuleiin, an ta dinga thil tirdakumah ka siem tah a nih.
21. Chuonghai chu rallaka dingin hnam danghai kuomah peng ka ta, hnuoia mi rilohai inroktir ka ta, annin lo sukporcheng an tih.
22. Anni chu nghatsan ka ta, ka hmun hlu chu sukporcheng an ta, a sungah roktuhai lut an ta, sukborbang an tih.
23. "A ram hi thisen insuona le a khawpui hi inpawngneknaa a sip leiin, thir khaidiet siem rawh.
24. Hnam laia khom hnam rawng tak hung thuoi ka ta, an inhai neipek an ta, mi ropuihai chapona chu suktawp ka ta, an hmun thienghlimhai chu sukborbangin um a tih.
25. Tium a hung tlung pha leh muongna zong an ta, sienkhom hmu naw ni hai.
26. Sietna ngot sietna ngot tlung a ta, thuthang ngot thuthang ngot inleng a tih. Zawlnei laka inthokin inlarna zong an ta; thiempuin inchuktir ding hre ta naw ni a; upahai khomin thurawn pek ding nei ta bok naw nih.
27. Lal chu lungngaiin um a ta, milienhai chun beidongna puon sil an ta, a ram mipuihai kut chu inthin hlop hlop a tih. An um dan ang peiin an chungah thawng ka ta, an thilthaw ang peiin an chungthu rel bok ka tih. Chu pha chun kei hi LALPA chu ka nih ti hre tang an tih" a ta.

  Ezekiel (7/48)