←  Ezekiel (6/48)  →
1. LALPA thu chu ka kuomah a hung tlung a:
2. "Mihriem naupa, Israel tlang tieng son mit inlen la, an chunga thil tlung dinghai chu hril rawh:
3. Israel tlanghai, Lalpa PATHIEN thu hi ngaithla ro. LALPA Pathien chun tlang le muol le ruom le kor dunghai kuomah hieng hin a tih: in chungah kawlhnam ka hung inlengtir tep a, hmun sanga in bawlhmunhai po po ka suksiet vong ding a nih.
4. In maichamhai sukchimin, rimtui in rawna maichamhai chu sukkoi vong ka ta, in milemhai hmaah in mihai chu sukhlum ka tih.
5. Israel nauhai ruong chu an milem biekhai bulah pei ka ta, an ruhai chu in maicham vela hai the dar ka tih.
6. In chengna taphota khawpuihai chu sukram ka ta, in bawlhmunhai sukchim ka ta, in maichamhai suksein sukram ka ta, in milemhai chu vaw koiin suksieng ka ta, in kutsuokhai sukbohmang vong ka tih.
7. Nangni lai in mihai ruong ngei chu inthal phungin zal a ta, chuongchun kei hi LALPA ka nih ti hung hrieng in tih.
8. "Amiruokchu, sukbohmang loa ka hla iemani zat la um in ta, chuonghai chun kawlhnam pumpelin khawvela hnam tin lai indar an tih.
9. Hnam danghai laia an saltang pha chun mi hung hre suok an ta, hnam danghai pathien beiseia, ka laka an lungril le mit a uiretna chunga poi ka hang tizie dam hung hre suok bok an ta, ritlona le thil theidaum thaw an chingna thuah anni ngei khom intirdak an tih.
10. Chun, LALPA ka nizie le an chunga sietna tlung ding thu ka hrilhai hi a thlawna ka hril mei mei a ni nawzie hung hre suok tang an tih.
11. "Lalpa PATHIEN chun hieng hin a tih: Kut ben la, i ke tet la, inring takin, 'Khai leh!' tiin khek suok rawh. Israel sungkuohai suol thaw leiin, tu hin indo le tam le hripuiin an thi ding a ni si a!
12. Ram hlaa umhai chu hripuiin thing an ta, a hnaia umhai chu kawlhnamin thing an ta, dama tlan suokhai chu tamin thing an tih. Chuong ang chun ka lungsenna chu an chungah hrikthlang ka tih.
13. Milem kuoma rimtui an inhlanna an hmunsanga hai, tlang sipa hai, thingbuk hnuoia hai le saisuo buk zar hnuoia milem an biekna maicham bul taphotah mithi ruong zal thlek thluk an hmu pha chun, kei hi LALPA ka nizie hung hrieng an tih.
14. An chungah kut inlet ka ta, thlalera inthoka an chengna Dibla hmun po po chu thlaler rausan hmunah siem ka tih; chu pha chun kei hi LALPA chu ka nih ti hrieng an tih" tiin.
←  Ezekiel (6/48)  →