←  Ezekiel (5/48)  →
1. "Tuhin, nang mihriem naupa, kawlhnam ngei tak la la, chu chu i sam le i khakhmul vawna dingin lu vawtu hmul metna chem angin hmang rawh. Bukna la la, i sam chu hmun thumah buk the rawh.
2. Jerusalem i'n huol ni a kim pha leh hmun thuma thea hmun khat chu khawpui lem map i siem sunga chun raw rawh. Hmun khat dang chu khawpuia chun the dar la, kawlhnamin sat nawi vong rawh. Hmun thuma thea hmun khat dang po chu thli inlen hmangtir rawh. Kawlhnamin ka hnot zui tawl ding a ni si a.
3. Sam tlawmte ruok chu hla la, i korfuol hmawrah inbawk rawh.
4. Tlawmte la umhai chu meiah pei la, raw hmang rawh. Chu taka inthok chun Israel insungah mei a suok ding a nih..
5. "Lalpa PATHIEN chun hieng hin a tih: Hi Jerusalem hi annawm a vela ram le hnam po pohai laia a lailung taka ka sie chu.
6. Sienkhom a ritlona leiin a vela hnam le ramhai nek khomin ka dan le thu ruothai lakah a hel nasa lem a; ka danhai a hnawl a, ka thu ruothai a zawm si nawh.
7. Chuleiin, Lalpa PATHIEN chun hieng hin a tih: In vela hnamhai nekin thunun in harsa lem a, ka thu ruothai in zawm naw a, ka danhai in vong bok nawh. In kawl le kienga hnamhai nun dan ang khomin in khawsa phak nawh.
8. "Chuleiin, Lalpa PATHIEN chun hieng hin a tih: Jerusalem, ngai rawh, kei meu khomin ka dodal che a, hnamhai mithmua ngei i chungah hremna ka hung intlungtir ding a nih.
9. I milem biek tirdakumhai leiin thil ka la thaw ngai der lo, a hnunga khom ka thaw ta ngai bok lo ding chu, i chungah ka thaw ding a nih.
10. Nangni lai ngei pahaiin an nauhai sa fang an ta, nauhaiin an pahai sa fa bok an tih. I chungah hremna intlungtir ka ta, a la dam sunhai po po chu thliin inlen hmangtir ka tih.
11. Chuleiin, ka hringna salin ka'n kham: i milem porchehai le i thil ching tirdakumhaia ka in thienghlim i sukporche leiin, ka ditsakna che la kir ka ta, lainatna mitin en ta nawng ka ti che a, hla bok naw ning che ti hi Lalpa PATHIEN thu suok a nih.
12. I sunga hmun thuma thea hmun khat hi hripui le tamin thing an ta; hmun thuma thea hmun khat chu kul puo tieng kawlhnamin thing an ta; hmun thuma thea hmun khat chu sukdar vong ka ta, kawlhnamin hnot zui ka tih.
13. Chu zoah ka lungsenna chu reng a ta, in kei dei ka tih, ka thungrul ding chu ka thungrul tah leiin. An chunga ka lungsenna ka hrik thlak pha chun, thahnemngai taka lo hril lom lom hlaktu cheu LALPA chu ka nih ti hung hre tang an tih.
14. "Chu bakah, i vela hnamhai lai le khuolzin invakhai mithmuah khaw rausan le hmutsitumah ka siem ding che a nih.
15. Na taka zil a, lungsen inlinga ka hrem pha che chu, i vela hnamhai po po cheksol, ti-el le pangzat, mi dang infuinaa thil rapthlaka an hmang chu hung ni tang i tih, ti hi kei LALPA hin ka hril a nih.
16. Thina le sietna thal, tamna thala ka kap pha cheu chu, sukse ngei dingin a nih ka kap ding cheu chu. In chungah tam nasa lem hung tir ka ta, bu hung lutna hnar khar vong ka tih.
17. Tam le ramsa kolhai hung tir ka ta, suonmongin siem an ti cheu. Hripui le thisen insuonain hrut fai a ti cheu a, nangni beitu dingin kawlhnam hung inlengtir bok ka tih ti hi LALPA, kei ngeiin ka lo hril ta sa a nih" tiin.
←  Ezekiel (5/48)  →