Ezekiel (48/48)    

1. "Hienghai hi hnam, an hnam hming senga inchika umhai chu an nih: Hmar tieng ramri,Hethlon fe thlenga Hamat lutna kawn chen; Hazar Enan le Hamat khela Damaska hmar tieng ramri chen, sak le thlang zawngin chan khat chu Dan hnam chan ning a tih.
2. Danhai chan le inri, sak le thlang zawnga chan khat chu Aser hnam chan ning a tih.
3. Aser-hai chan le inri, sak le thlang zawnga chan khat chu Naftali hnam chan ning a tih.
4. Naftali-hai chan le inri, sak le thlang zawnga chan khat chu Manase hnam chan ning a tih.
5. Manase-hai chan le inri, sak le thlang zawnga chan khat chu Efraim hnam chan ning a tih.
6. Efraim-hai chan le inri, sak le thlang zawnga chan khat chu Reuben hnam chan ning a tih.
7. Reuben-hai chan le inri, sak le thlang zawnga chan khat chu Juda hnam chan ning a tih.
8. "Judahai chan le inri, LALPA kuoma a bika ram in pek dinga ruot chu a khang kilometer sawmpahni le a chenve le a dung kilometer ngaa lien ning a ta, a laia chun Tempul um a tih.
9. LALPA kuoma in pek ding ram lienzie chu a dung kilometer sawmpahni le a chenve le a khang kilometer sawmg a nih.
10. Hi taka inthok hin thiempuhai chengna dingin hmun ser ruot in ta, chu chu sak tieng le thlang tieng kilometer sawmpahni le a chenve ning a ta, sim tieng le hmar tieng zawngin kilometer nga ning a tih. A lailunga chun LALPA Tempul um a tih.
11. Hi hmun thienghlim hi thiempua ser hrang bik, ka thu vongtu Zadok thlahai umna hmun ding a nih; Levi thla danghai chun Israelhai an invak hmang lai khan an lo zui ve a, anni ruok hin chu an zui ve nawh.
12. Chuleiin, Levi chihai leh inramriin, hmun thienghlim taka chun um an tih.
13. "Thiempuhai chan hrul peia chun Levi chihaiin chan nei an ta, chu chu sak tieng le thlang tieng zawngin a dung kilometer sawmpahni le a chenve le sim tieng le hmar tieng zawngin a khang kilometer nga ning a tih.
14. Ram chu an zor ding a ni naw a, mi le khom an inthleng ding a ni bok nawh. Hieng lai hi a ram laia a thatna tak a na, mi dang kuta pek awi a ni nawh, LALPA ta dinga hmun serh thienghlim a ni si a.
15. "Hi ram sunga ram sem mahla, a dung kilometer sawmpahni le a chenve le a khang kilometer hni le a chenvea lien chu vantlang chengna in hmun ding le ran tlatna hmun ding a ni leiin hmun serh a ni ve nawh. A lai takah khawpui chu um a tih.
16. Khawpui lien dan chu, hmar tieng kilometer hni le meter zahni sawmnga ning a ta, sim tieng, sak tieng le thlang tieng khom chuong ang vonga lien chu ning a tih.
17. Khawpui huol tuokin ram ruok um a ta, hmar tieng le sim tieng, sak tieng le thlang tienga a khang lienzie chu meter za le sawmhnipanga vong ning a tih.
18. Chun, ram ruot sunga hmun serh hrula ram ruok la um, sak tieng kilometer nga le thlang tieng kilometer nga chu khawpui sunga umhaiin huon le loah nei thei an tih.
19. Chu hmuna chun khawpui sunga um Israel hnam tu khomin huon siem thei an tih.
20. Ram ruota um po chu kil li nei a na, khawpui huom sung khom thang sain sir tin chu kilometer sawmpahni le a chenvea lien vong a nih.
21. "Ram ruot sunga hmun serhai le khawpui huom sung bak po, sak le thlanga ram la um po chu lal chan ding a nih. Sak tienga a dung seizie chu kilometer sawmpahni le a chenve ning a ta, thlang tieng khom kilometer sawmpahni le a chenve bok ning a tih. Hieng ramhai hi Israel chi hnamhai ram chan hrulah um a ta, hmun serh bik, hmun thienghlim umna chu a laili takah um a tih.
22. Chuong ang chun Levi chihai chan le khawpui chan chu lal chan inkarah um a ta, lal chan chu Juda chan le Benjamin chan leh inring an tih.
23. "Hnam dang la umhai chan insem dan ding chu: sak le thlang zawngin chan khat chu Benjamin hnam chan ning a tih.
24. Benjamin-hai chan le inriin sak le thlang zawngin chan khat chu Simeon hnamin chang an tih.
25. Simeon-hai chan le inriin sak le thlang zawngin chan khat chu Isakar hnamin chang an tih.
26. Isakar-hai chan le inriin sak le thlang zawngin chan khat chu Zebulun hnamin chang an tih.
27. Zebulun-hai chan le inriin sak le thlang zawngin chan khat chu Gad hnamin chang an tih.
28. Sim tienga Gad-hai ramri chu Tamar-a inthokin Meriba Kades tui chen feng a ta, chu taka inthokin Aigupta ruom zui thlain Mediterranean Tuipuiah tawp a tih.
29. Hieng ang hi Israel hnamhai rochan ding ram i sem dan ding le an ram chan seng chu a nih" ti hi Lalpa PATHIEN thu suok a nih.
30. "Hienghai hi Jerusalem khawpuia lut le suokna kotkharhai chu a nih: hmar tieng chu kilometer hni le meter zahni le sawmngaa sei a na,
31. chu taka chun kotkhar pathum um a ta, chuonghai chu Israel thlahai hming chawiin Reuben kotkhar, Juda kotkhar le Levi kotkhar tia ko ning a tih.
32. "Sak tieng pang khom kilometer hni le meter zahni le sawmngaa sei a na, kotkhar pathum, Josefa kotkhar, Benjamin kotkhar le Dan kotkhar um a tih.
33. "Sim tieng pang khom kilometer hni le meter zahni le sawmngaa sei a na, kotkhar pathum, Simeon kotkhar, Isakar kotkhar le Zebulun kotkhar um a tih.
34. "Thlang tieng pang khom kilometer hni le meter zahni le sawmngaa sei bok a na, kotkhar pathum, Gad kotkhar, Aser kotkhar le Naftali kotkhar um a tih.
35. "Sir tin huopa a bang seizie chu kilometer kuo a nih. Chu nia inthok chun khawpui hming chu LALPA UMNA HMUN ti ni tang a tih" tiin.

  Ezekiel (48/48)