Ezekiel (47/48)  

1. Mi chun tempul kotkharah a mi thuoi kir nawk a, suo tieng ngha tempul kotkhar bula inthok chun tui a hung luong suok a, tempul chu suo tieng ngha a ni hrim a; tui chu tempul sim tienga luongin maicham chang tieng sira chun a hung luong thla a.
2. Hmar tienga inthoka lutna kotkhara chun a mi thuoi suok a, sak tienga inthoka lutna kotkhar bul chen a mi thuoi a, chang tieng koa chun tui chu a hung luong suok a.
3. Mi chun inkhina hmol chawiin sak tieng a pan a, meter zanga a'n khi chun tui chu a mi'n pal kaitir a, kemit chen a nih.
4. Chun, meter zanga a'n khi nawk a, tui chu a mi'n pal kaitir nawk a, khup chen a ni ta a. Meter zanga a'n khi nawk a, tui chu a mi'n pal kaitir nawk a, kawng chen a ni ta a.
5. Chun, meter zanga a'n khi nawk a, tui chu ka pal kai ruol loa lien le inhlieuna khopa inthuk, tu pal kai thei lo ding a hung ni ta a.
6. Mi chun ka kuomah, "Mihriem naupa, hi hi i hmu am?" a ta, vakam tieng chun a mi thuoi kir nawk a.
7. Vakam ka tlung chun a kam tuoka thing zing khup el chu ka hmu a.
8. Ama chun ka kuomah, "Hi tui hi khaw sak tieng a luong a, Jordan vadung a zuk fin a, Tuipui Thi-ah a luong lut a, tuipui tui chu tui thienghlimah a siem a nih.
9. Vadung hi a luongna taphotah thilhring chi tinreng pung an ta, nga hung tam em em an tih; hi tui hi tuipui al sukthienghlimna ding le a luongna taphota hring tinrengin an dam phana dinga hung luong a ni si a.
10. A kama chun ngamantuhai ngir khup an ta, Engedi kaia inthoka Eneglaim kai chenin len dengna hmun ning a ta, nga chi hrang hranghai chu Mediterranean tuipuia nga ang elin hung tam an tih.
11. Vakam chirdup le dumhai ruok chu chi khura hmang dingin la al zing tho a tih.
12. Vadung kam tuoka chun thei kung chi tinreng to a ta, a hna vuoi ngai naw ni a, kur tukin ra insuo zing an tih. Tempula inthoka tui luong suokin a chawm leiin thla kipin rang an tih. An ra chu bu ding a na, an hna chu damna ding a tih" tiin.
13. Lalpa PATHIEN chun hieng hin a tih: "Hieng ang hin Israel hnam sawm le hnam hnihai rochan ding ram chu thepek i ta, Josefa chun chan hnih chang a tih.
14. Ram chu chan inang sengin i sem ding a nih. In pi le puhai kuoma kut phar meua pek ka tiem tah a ni leiin, ram chu in rochan ning a tih.
15. Hi hi an ramri inthe dan ding chu ning a tih: Hmar tieng ramri chu Tuipui Lienaf inthoka Hethlon fe thlengin Hamat lutna kawnah Zedad khuo chen feng a ta,
16. Hamat le Berotha-a fe pei a ta, Hamat kawn le Damaska inrina laia um Sibraim fe thlengin, Hauran ramri bula um Hazer Hatikon chen feng a tih.
17. Chuongchun, hmar tieng ramri chu Tuipui Liena inthokin Damaska hmar tieng ramri bula Hazar Enan chen le Hamat ramri bul chen feng a ta, chu chu hmar tieng ramri chu ning a tih.
18. Sak tieng ramri chu Hauran le Damaska inrinaa inthokin sim tieng panin feng a ta, Jordan vadung zui a ta, thlang tieng chu Jordan vadung ning a ta, sak tieng chu Gilead ram ning a ta, ramri chu Tuipui Thiah fein Tamar chen tlung a tih. Hi hi sak tieng ramri chu ning a tih.
19. Sim tieng ramri chu Tamar-a inthokin sim tieng panin Meriba-Kades chen feng a ta, chu taka inthokin Aigupta Ruom hrawin Tuipui Lien chen tlung a tih. Hi hi sim tieng ramri chu ning a tih.
20. Thlang tieng chu Tuipui Lien leh inring an ta, Hamat lutna kawn zawn chenin feng a tih. Hi hi thlang tieng ramri ding chu a nih.
21. "Chuongchun, ram hi Israel hnam lai a chi chiin in insem ding a nih.
22. Nangni ta dinga rochan ding le nangni laia in sa phuna cheng ram dang mi, nau le te neia khawsahai khom an chan ding ram in sem ding a nih. Anni chu Israelhai anga a ram mi hrim anga ngaiin, Israel hnamhai lai nangni ang bokin chan an nei ve ding a nih.
23. Hnam dang mihai chu tu hnam laia lo khawsa khom ni hai sien, an khawsakna hmuna chun an chan ding ram in ruotpek ding a nih" ti hi Lalpa PATHIEN thu suok a nih.

  Ezekiel (47/48)