←  Ezekiel (46/48)  →
1. Lalpa PATHIEN chun hieng hin a tih: Suo tienga inthoka a chuonchung lutna kotkhar chu sinthaw hun ni ruk sung khar in ta, chawlni le thla thar nia ruok chu in hong ding a nih.
2. Lal chu chuonchung lutna bul tuolpuka chun lut a ta, kotkhar bula chun ngir a ta, thiempuhai chun pumraw inthawina le inremna inthawina thilhlanhai chu inhlan an ta, kotkhar bul tuolpuka inthok chun Pathien chawibiek a ta, chu zoah suok a ta, kot ruok chu zan tieng chen khar lo ding a nih.
3. Vantlang mipui khomin chawlni le thla thar niah kotkhar bul tuolpuka inthok chun LALPA an chawibiek ding a nih.
4. Chun, lalin chawlnia LALPA kuoma pumraw thilhlan a'n hlan ding chu beramte paruk le beramchal pakhat, hmel hem lo vong a ni ding a nih.
5. Beramchal pakhat peiah beiphit efa khat, beramte a ni ruok chun a pek thei ang ang, inhlan a ta, chun efa khatah hriek hin khat pei inhlan bok a tih.
6. Thla thar niah bawngchal tuoi pakhat, beramte paruk le beramchal pakhat, hmel hem lo vong, inhlan a tih.
7. Bu le bal thilhlana dingin bawngchal pakhatah beiphit efa khat, beramchal pakhat peiah efa khat, beramte a ni ruok chun a pek nuom zat zat peng a ta, hriek chu efa khat peiah hin khat ning a tih.
8. Lal chu a hung lut tieng kotkhar bul tuolpukah lut a ta, chu taka inthok bok chun suok nawk a tih.
9. "Vantlang mipui ruok chu kut nia LALPA hmaa an hung inlang pha leh, hmar tieng kotkhara luthai chu sim tieng kotkharah suok an ta, sim tieng kotkhara luthai chu hmar tieng kotkharah suok an tih. Tu khom a hung lutna tieng suok loin an hma zawn khing tienga kotkhara chun a suok ding a nih.
10. Lal khom anni ruolin lut veng a ta, an suok ruolin suok veng a tih.
11. "Kut ni le kutpuia bei an inhlan chu bawngchal tuoi pakhatah efa khat, beramchal pakhatah efa khat, beramte a ni ruok chun an pek thei ang ang le efa khat peiah hriek hin khat pei a ni ding a nih.
12. "Chun, lalin ama lung puok le nuom thua LALPA kuomah pumraw thilhlan amanih inremna thilhlan amanih a'n hlan ding chun suo tieng kotkhar chu ama ta dingin hongpek ning a tih. Pumraw thilhlan le inremna thilhlanhai chu chawlnia a thaw hlak angin inhlan a ta, chu zoah suok a ta, kotkhar chu khar ning a tih.
13. "Tuk tin LALPA kuomah pumraw inthawina dingin beramte kum khata upa, hmel hem lo in inhlan ding a nih.
14. Tuk tin beiphit inhlan ding buotsai in ta, efa hmun ruka thea hmun khat le a hmet zoina ding hriek hin hmun thuma thea hmun khat leh; chu chu kumkhuoa LALPA kuoma bei in inhlan dan ding chu a nih.
15. Hieng ang hin pumraw thilhlana inhlan rop dingin beramte dam, beiphit inhlan ding dam le hriek inhlan ding dam chu tuk tin in buotsai hlak ding a nih" a ta.
16. "Lalpa PATHIEN chun hieng hin a tih: Lalin a naupahai laia mi tu kuoma khom a rochana mi thilpek a pek chun a thlahai ta ning a ta, an rochan hung ni tang a tih.
17. Sienkhom, a rochana mi chu a siehlaw tu amanih kuomah a pek chun, bawi insuo kum chenin a siehlaw chun nei thei a ta, chu zoah lal kuomah a pekkir nawk ding a nih; lal ro pangngai chu a naupahai ta ding a nih.
18. Chun, lalin mihai rochan a lakpek ding a ni naw a, an in le loa inthokin a hnot suok ding a ni bok nawh. Mani in le loa inthoka ka mihai sukthlong an ni nawna dingin, lal chun ama chanpuol ngeia mi chu a naupahai kuomah rochanin a pek ding a nih" tiin.
19. Chun, sim tienga inthoka lutna bula thiempuhai umna pindan thienghlim, hmar tieng nghaa chun a mi thuoi a, a chawr, khaw thlang tienga hmun um chu a mi'n entir a.
20. Ama chun ka kuomah, "Hi hi thiem naw chang leia inthawina thilhlan dam le suol thawina thilhlan dam an suongna hmun le bu le bal thilhlana an beiphit hung pekhai an urna hmun chu a nih. Mipui chunga thil poi a tlung pal nawna dingin thil thienghlim hrim hrim a chuonhnuoi zawla lak thlak ding a ni nawh" a ta.
21. Chun, a chuonhnuoi tuolzawla mi thuoiin a mi fang kuolpui a, kil tina chun tuolzawl tekem a lo um vong a.
22. An huonna kil lia tuolzawl tekem, banga inhuon chu a dung meter sawmhni le a khang meter sawmpanga seng a nih.
23. Chuong tuolzawl tekem sir tuok chu lungrem vong a na, a hnuoia chun a velin thlai suongna ding thuk a um a.
24. Chun, ka kuomah, "Hienghai hi thlai suongna hmun, tempula rongbawltuhaiin mihai inthawina sa an suongna hmun chu a ni hih" a ta.
←  Ezekiel (46/48)  →