←  Ezekiel (45/48)  →
1. " Chu bakah, rochan dinga ram in sem pha leh LALPA chan ding ram bung khat, a dung kilometer sawmpahni le a chenvea sei le a khang kilometer sawma lien chu in ser hrang ding a nih; chu hmun pumpui chu hmun thienghlim ning a tih.
2. Hi hmuna hin tempul bawlna ding hmun kil li nei, sir tin meter zahni sawmnga senga sei ruot in ta, chu chu meter sawmhni le pangaa lienin sir tinah hmun ruokin a huol vel ding a nih.
3. Chun, hi inkhi ta saa inthok hin a dung kilometer sawm le a khang kilometer nga inkhi suok rawh. Chu sunga chun LALPA Hmun Thienghlimtak chu a um ding a nih.
4. Chu hmun ser chu LALPA rong bawl dinga a hmaa hung hnaitu thiempuhai chan dinga hmun ser a ni ding a nih. Chu hmun chu an in hmun ding le hmun thienghlim ta dinga hmun ser ning a tih.
5. Hi ram bula hin tempula rongbawltu Levihai puola ram ser, a dung kilometer sawmpahni le a chenve le a khang kilometer nga um a ta, an chengna khawpui ning a tih.
6. Ram ser hrang tah hrula hin khawpui hmun ding a dung kilometer sawmpahni le a chenve le a khang kilometer hni le a chenve inkhi suok unla, chu chu Israel sungkuo po po ta ding ning a tih.
7. Lal chanpuol ram chu ram ser hrang tah le khawpui hmun dinga ruot sir tuok ve ve chu ning a tih. Tlak tieng panga mi chu tlak tieng pangah inzar a ta, suo tieng panga mi chu suo tieng inzar bok a ta, Israel hnam pakhat chanpuol dinga ruot tiet a ni ding a nih.
8. Chu po chu Israel rama lal chanpuol bik ram chu ning a ta, ka lalhai chun ka mihai neksawr ta naw ni hai a, Israel sungkuohai chu an hnam dungzui peiin an chanpuol ram ding sempek lem an tih.
9. Lalpa PATHIEN chun hieng hin a tih: "Aw Israel lalhai, a huntawk tah! Inpawngnekna le inneksawrna po po bansanin, thil fel le indik thaw ching lem ta unla, ka mihai hi an rama inthokin nek suok ta naw ro" ti hi Lalpa PATHIEN thu suok a nih.
10. "Phahla indik le bukna lung le inkhina indik tak hmang seng ta ro. Thil hul inkhina efa le thil intui inkhina bat indik tak hmang ro.
11. Efa le bat hi an intluk char ding a nih. Thil inkhina homer-a inthoka inkhi ding a nih. Homer 1= Efa 10=Bat 10
12. Chun, in bukna lung chu hieng ang hin ning a tih: gera 20=shekel 1, shekel 60=mina 1
13. "Chun, in lo tharsuok in pek zat ding chu hieng ang hin a nih: huit le barli chu phur sawmruk peiah phur khat ning a ta,
14. oliv hriek chu buk zakhat peiah buk khat (chu chu bath 10=1
15. beram chu Israel ram tui le hlobet thatna hmuna ran ruol laia zahni peia pakhat ning a tih. Hieng ranhai hi bu le bal thilhlana dam, pumraw thilhlana dam, inremna thilhlana dam le mipui ta dinga suol thawina thilhlana dam in hmang ding a nih" ti hi Lalpa PATHIEN thu suok a nih.
16. "A rama mi po poin hieng thilhlanhai hi lal kuomah an hung pek ding a nih.
17. Chun, kut huna dam, thla thar lawmnaa dam, chawlnia dam le Israel sungkuo ta dinga ruot kut hmangna hrim hrima dam pumraw inthawina thilhlan hai, bu le bal thilhlan hai, dawn thilhlan hai, inremna thilhlan hai, mipui thatna dinga inthawina thilhlan hai le Israel sungkuo suol thawinaa hmang ding thilhlan hai po po chu lalin a tum ding a nih.
18. Lalpa PATHIEN chun hieng hin a tih: "Thla khatna ni khatnaah bawngchal tuoi hmel hem lo thatin tempul inthien rawh.
19. Thiempu chun suol thawina ran thisen chu lang a ta, tempul kotkhar bienga hai le maicham rei le a ki lia hai le a chuonchung kotkhar bienga hai chun tat a tih.
20. Chuong ang bokin a ni sarinaah suol thaw pal amanih le hriet naw leia thilsuol thawhai ta dingin tempul chu inthien nawk a tih.
21. "Thla hmasa tak ni sawm le ni lia chun fekan kut inser in ta, ni sari sung chu chol thang lo bei in fak ding a nih.
22. Chu ni chun lalin ama le a rama mi po po suol thawina dingin bawngchal tuoi tumpek a tih.
23. Kut hun ni sari sung po chun ni tin pumraw inthawina dingin bawngchal tuoi pasari le beramchal pasari, hmel hem lo tumpek a ta, suol thawina dingin kelchal pakhat tum zie bok a tih.
24. Beiphit inhlan ding khom bawngchal pakhat peiah efa khat le efa khat peiah hriek hine khat a tumpek ding a nih.
25. Thla sarina, ni sawm le ni nga nia kuta chun ni sari sung chuong ang bok chun thawng in ta, suol leia inthawina dam, pumraw inthawina dam, bei inhlanhai le hriek inhlanhai khom tumpek vong a tih" a ta.
←  Ezekiel (45/48)  →