←  Ezekiel (44/48)  →
1. Suo tienga inthoka Hmun Thienghlim chuonhnuoi lutna kotkhara chun a mi thuoi kir a, a lo inkhar a. LALPA chun ka kuomah, "Hi kotkhar hi inkhar zing a ta, hong ni naw ni a, tu khom lut naw ni hai.
2. LALPA, Israel Pathien hung lutna a ni leia inkhar zing a nih.
3. Lal ruok chu LALPA hmaa ruoi kil dingin bathlar hi hrawin ama chauh lut thei a ta, chu a hungna lampuia bok chun hung kirin suok nawk a tih" a ta.
4. Chun, mi chun hmar tienga inthoka lutna tempul kota chun a mi thuoi a. LALPA tempul chu LALPA ropuinain a sip a, bokkhupin ka tlu a.
5. LALPA chun ka kuomah, "Mihriem naupa, fimkhur takin en la, LALPA tempul hmang dan ding chungthua dan ka hrilhai po po che hi chik tak le lung lut takin ngaithla rawh. Tempula lut dan le hmun thienghlima inthoka suok danhai hi i lungrilin inchik rawh.
6. Hel hmang Israel sungkuohai kuomah hieng hin hril rawh: 'Hi hi Lalpa PATHIEN hril chu a nih: Aw Israel sungkuohai, in ching dan tirdakum hi ka nghok tawk tah.
7. In ching dan tirdakum chu la dit tawk loin, lungril le taksaa ser tan lo ram dang mihai chu ka hmun thienghlimah hung thuoiin ka tempul in sukporche a, bu le bal le thau le thisen in inhlan lai zingin ka thuthlung in bawsiet zing bok a.
8. Ka hmun in vong thienghlim naw a, a vongtu dingin hnam dang mi in sie lem a.
9. Lalpa PATHIEN chun hieng hin a tih: 'Lungril le taksaa ser tan lo hnam dang mi tu khom, Israelhai laia chenghai chen khom, ka hmun thienghlimah an lut ding a ni nawh.
10. "Milem hnota Israelhai an invak hmang lai khan Levi thlahai khomin an mi hlat a, an bawsietna maw chu tuor an tih.
11. Ka Hmun Thienghlimah rong bawlin, kotkhar vengtu ning an ta, mipui pumraw thilhlan ding le inthawinaa an ran inhlanhai chu thatpek an ta, an lo thangpui ding a nih.
12. Mipuiin milem an biek lai khan an thil inhlanhai lo inhlanpektu an ni a, suola Israel sungkuohai intluktirtu bul an ni leiin, an thil suol thaw maw an phur ngei dingzie kut phar meuin thu ka lo intiemkam tah a nih ti hi Lalpa PATHIEN thu suok a nih.
13. Thiempu angin ka hmaah rong bawlin an hung inlang ding a ni naw a, ka thil serhai le thilhlan thienghlim takhai hnaia khom an hung ding a ni bok nawh; an thil ching tirdakum leiin inzakna tuor an tih.
14. Chuong sa khom chun tempul vengtu le thaw ding um taphot thaw dinga tirtawnah ka sie tawl a nih.
15. "Thiempu, Levi chia mi, Zadoka thlahai ruok chu ka laka Israelhai an invak hmang lai khoma ringum taka ka Hmun Thienghlim vongtuhai an ni leiin, anni chauh ka rong bawlin ka hmaah inlang thei an ta, thau le thisen ka kuomah hung inhlan an tih, ti hi Lalpa PATHIEN thu suok a nih.
16. Anni chauh ka Hmun Thienghlimah lut an ta, ka dawkan hung hnai an ta, ka rong bawl an tih.
17. " Tempul chuonchung an hung lutin pat zai inhmi hmanga khawng korfuol hak an ta, a chuonchung zawl amanih tempul sung amania rong an bawl laiin sahmula siem silfen hrim hrim an inbel ding a ni nawh.
18. Pat zaia inthoka khawng lukawm kawm an ta, pat zai inhmi hmanga khawng kekor bun bok an ta, thlan suksuok thei chi ieng khom an inbel ding a ni nawh.
19. Chuonhnuoi zawla vantlang umnaah an fe pha leh an silfen inthlak an ta, a siena dinga pindan ser hrana chun maksan an ta, silfen dang inbel an tih. Chuong naw chun an silfen thienghlim chu mipuiin tawk palh an ta, tuor rawi an tih.
20. "An lu an invaw koltir ding a ni naw a, an sam an hla sei ding a ni naw a, an invawtir hlak ding a nih.
21. Tempul chuonchung sung lut hnungin thiempu tu khomin uoiin an dawn ding a ni nawh.
22. Hmeithai amanih mi mak hnung amanih nuhmeiah an nei ding a ni naw a, Israel thlaa mi nunghak thienglam amanih le thiempuhai thisan hmeithaihai chauh nuhmeiah an nei ding a nih.
23. Thiempuhai chun thil ser thienghlim le thil naran danglamzie le thil porche le thil inthieng thlier hrang dan ka mihai an inchuktir ding a nih.
24. "Thubuoi hrim hrimah thiempuhai chu roreltu ning an ta, ka dan thusuok angin an rel ding a nih. Kut hmang dinga ka ruothai po poa chun ka danhai le thupekhai kengkawin, ka chawlnihai an vong thienghlim ding a nih.
25. "Mithi ruong hnaia fein thiempu chu a'n sukporche ding a ni nawh; mithi chu a nu le pa amanih, a naunu le naupa amanih, a unaupa amanih, pasal la nei lo a farnu amanih a ni ruok chun insukporche thei a tih.
26. A'n thienfai hnungah ni sari sung a la nghak ding a nih.
27. Hmun Thienghlim chuonchunga hmun thienghlima rongbawl dinga a lut ni chun, ama ta dingin suol thawina a'n hlan ding a nih ti hi Lalpa PATHIEN thu suok a nih.
28. "Thiempu chun rochan ieng khom a nei ding a ni nawh; a rochan nei sun chu keima chauh hi ka ni ding a nih. Israelhai lai chanpuol ieng khom in pek ding a ni nawh; keima hi an chanpuol chu ka nih.
29. Fak ding an hung inhlanhai, suol thawinaa an thil inhlanhai le bawsietna chungah an thil inhlanhai le Israel ram sunga LALPA ta dinga an thil serhai po po chu an ta ding a nih.
30. Ra hmasa laia a tha takhai, in thil inhlan tinrenga a tha takhai chu thiempuhai ta ding a nih. Fak dinga beiphit thar in hmet hmasa tak chu thiempu kuomah inhlan ro, in insungah malsawmna a cham zing theina dingin.
31. Thiempuhai chun sa tlaw hrim hrim, vate amanih, ran amanih, ram sain a se le amaa thi amanih sa hrim hrim an fak ding a ni nawh.
←  Ezekiel (44/48)  →