←  Ezekiel (43/48)  →

---

1.

Chun, mi chun suo tieng kotkharah a mi thuoi a.

2.

Ngai ta, suo tienga inthoka LALPA ropuina hung chu ka hmu a. A rawl chu tuipui insok ri ang a na, a ropuina leiin hnuoi chu a eng phut a.

3.

Inlarna ka hmua a'n lang dan chu, khawpui sukse dinga a hung tum le Kebar vadung kama inlarna ka hmua mi ang bok kha a na, bokkhupin hnuoiah ka tlu a.

4.

Suo tieng kotkhara inthokin LALPA ropuina chu tempula chun a hung lut a.

5.

Chun, Thlarauin a mi chawi kang a, tempul chuonchunga chun a mi'n thum a, LALPA ropuinain tempul chu a sip a.

6.

Mi chu ka bula a ngir laiin tempul sunga inthokin tuin amanih mi hung bein ka hriet a.

7.

Ama chun, "Mihriem naupa, hi hi ka lalthungpha umna hmun, ka kepha innghatna, Israel nauhai laia kumkhuoa ka chengna ding hmun chu a nih. Israel sungkuohai leh an lalhai chun ka lakah uirein, hringna nei lo an lalhai milem biek chu zuiin ka hmun thienghlim hi sukporche ta ngai naw ni hai.

8.

Ka sumphuk bulah an sumphuk rem a, ka kotkhar bieng le an kotkhar bieng intawka rem a, kan inkarah bang chauh an intlaktir lai khan an thilthaw tirdakum tak chun ka hming thienghlim an sukporche a; chuleiin, ka lungsenin anni chu ka hrem a nih.

9.

Tuta inthok hin chu an nawchi zorna bansan hai sien, an lalhai lembiek, hringna nei lo milemhai chu sie hmang bok hai sien, anni lai kumkhuoin cheng ka tih.

10.

"Nang mihriem naupa, Israel sungkuohaiin an thil suol thaw an inzakna dingin tempul lem ka'n hmutir che le a ruohmang kha inentir tawl rawh.

11.

An thil suol thawhai leia inzak nachang an hriet chun, tempul um dan ding hai, a lut le suokna ding hai, a riruong iengkim, a hmang dan ding le vong dan dinghai inentir rawh. An mithmua ngei ziek thla diem rawh, ringum taka a riruong ang chu zui a, a thaw dan dinghai chu an zawm theina dingin.

12.

Hi hi tempul dan chu a nih. Tempul ngirna tlang sipzawl chen hi hmun thienghlim a nih. Hi hi tempul dan phung chu a nih.

13.

"Tong seic hmanga inkhiin maicham lienzie chu hieng ang hi ning a tih: a hnuoi thut chu lung rem, centimeter sawmngaa sa, a khang lienzie chu centimeter sawmnga, a kotlang chu puo tienga inthoka inkhiin centimeter sawmhni le pangaa insang a ni ding a nih.

14.

Maicham thuta chun a sersuon, meter khata insang le centimeter sawmngaa lien chu innghat a ta, chu chunga chun meter hnia insangah a sersuon lien lem, centimeter sawmngaa lien chu innghat a tih.

15.

Meter hnia insang maicham tap zawl kil lia inthok chun ki pali a hung dawk suok ding a nih.

16.

Maicham tap zawl chu kil li nei ning a ta, a dung meter ruka sei le a khang meter ruka lien a ni ding a nih.

17.

Maicham tap inthutna tuong chu kil li nei, a dung le a khang meter sari ve vea lien, a rei tlang chu centimeter sawmhni le pangaa insang a ni ding a nih. A thuta chun a velin tui luong suokna centimeter sawmngaa lien a um ding a nih. Maicham tapa lawn kaina ding suo tieng pangah kailawn a um ding a nih.

18.

Chun, ama chun, "Mihriem naupa, Lalpa PATHIEN chun hieng hin a tih: maicham in bawl phaa maichama pumraw thilhlahai in inhlan dan ding le thisen in the dan ding chu hieng ang hin a nih:

19.

Thiempu, Levi chia mi Zadok thlahai chauh ka hmaah hung thei an ta, suol thawinaa an inhlan ding bawngchal tuoi i pek hlak ding a nih" ti hi Lalpa PATHIEN thu suok a nih.

20.

"Ran thisen chu iemani zat lang i ta, maicham ki li le a rei po po le a thut sordawk kil li le a rei po poah tat i ta, maicham chu inthienin inremna i siem ding a nih.

21.

Suol thawina bawngchal tuoi chu lang i ta, tuolah, Tempul tuola hmun ruot bika chun i raw hmang ding a nih.

22.

"Chun, a ni hninaa chun kelchal, hmel hem lo chu suol thawina dingin in inhlan ding a nih. Bawngchal tuoi thisena maicham in inthien ang bok khan maicham chu in inthien ve ding a nih.

23.

Maicham inthien chu in thaw zo hnungah ran ruol laia mi bawngchal tuoi, hmel hem lo le beramchal, hmel hem lo chu in inhlan ding a nih.

24.

LALPA hmaah inhlan in ta, thiempu chun machi phul a ta, LALPA kuoma pumraw thilhlanah inhlan a tih.

25.

"Ni sari sung chu ni tin suol thawina dingin kelchal inhlan in ta, ran ruol laia mi bawngchal tuoi le beramchal, hmel hem lo chu in inhlan bok ding a nih.

26.

Maicham inthien faina dingin ni sari sung awng a ta, chu zoah sawp fai in ta, maicham chu ser thienghlim hung ni tang a tih.

27.

Chuonghai chu thaw zo a ni pha leh, a ni riet nia inthokin thiempuhaiin pumraw inthawinahai le inremna inthawinahai chu maichamah inhlan an ta, keiin lo pom ka tih ti hi Lalpa PATHIEN thu suok a nih" a ta.

---

←  Ezekiel (43/48)  →