Ezekiel (42/48)  

1. Chun, mi chun tempul hmar tieng kota inthok chun a mi suokpui a, a chuonhnuoiah kan lut a, a chuonchung bang le inzoma hmar tienga pindan tam tak an bawlna hmuna chun a mi fepui a.
2. Hieng hmar tieng nghaa pindan intlar hi a dung meter sawmnga le a khang meter sawmhni pangaa lien a nih.
3. Pindan thler khat chun a chuonchung tuolzawl meter sawma lien tieng chu a ngha a; pindan thler dang chun a chuonhnuoi thlera lungrem tieng chu a ngha a, sawng thuma sawng tin bathlar chu an inhmaton a.
4. Hmar tieng ngha pindan kotkhar hmaa chun inlonna meter ngaa lien le meter sawmngaa sei a um a.
5. Pindan chunghnung tak chu inlonna ding bathlarin hmun a aw lien leiin a lailung le a hnuoi tienga pindan nekin a chin lem.
6. Sawng thum ni sien khom in dang anga ban nei ve lo a ni leiin a, a hnuoi pindan nekin a chung tieng pindan chu a chin hret hret pei a nih.
7. Pindan hrula chun bang, meter sawmhni le pangaa sei, tuolzawl puo lem hnaia chun a um a.
8. Tuolzawl puo lem hnaia pindan tlar chu meter sawmhni pangaa sei a na, tempul ep tienga pindan thler seizie chu meter sawmnga a nih.
9. A chuonhnuoi tuola inthoka pindana kai tungna kailawn suo tieng panga chun a um.
10. Sim tieng khom tempul chuonhnuoi bang hrul, tuolzawl bul, bang puo tieng epin pindan tlar a um a,
11. hmar tienga mi ang charin pindan tlar inkara chun lampui a um a, a dung le khang, a lutna le suokna kotkhar lienzie khom inang vonga bawl a nih.
12. Pindan tlar ep bang hrula chun suo tienga inthoka lutna kotkhar a um bok a.
13. Chun, ama chun ka kuomah, "Tempul tuolzawl nghaa um sim tieng le hmar tienga pindanhai hi thiempuhai umna a na, LALPA hmaa inlang hlak thiempuhai chun inthawina sa thienghlim chu hi hmuna hin an fak ding a nih. Inthawina thil thienghlim, bu le bal thilhlanhai, suol thawina thilhlanhai le bawsietna thilhlanhai chu an sie khawm ding a nih, Hmun Thienghlim a ni si a.
14. Chu Hmun Thienghlima thiempuhai an lut tah chun, a chuonhnuoi tuolzawla an fe nawk ding pha an rongbawlna silfen an hlip hmasa zet naw chun an suok phal a ni nawh, an silfen khom chu thil thienghlim a ni si a. Mipui umnaa an fe ding chun silfen an inthlak hmasa zet ding a nih" a ta.
15. Tempul le a tuol vel po po a'n khi zo chun suo tieng kotkharah a mi suokpui a, tempul ram lienzie chu a velin a'n khi a.
16. Sak tieng bang chu a'n khi a, a'n khina hmol ang chun meter zahni sawmnga a nih.
17. Hmar tieng bang a'n khi a, a'n khina hmol ang chun meter zahni sawmnga bok a nih.
18. Sim tieng bang chu a'n khi a, an khina hmol ang chun meter zahni sawmnga a ni nawk a.
19. Thlang tieng bang chu a'n khi a, a'n khina hmol ang chun meter zahni sawmnga bok a nih.
20. Chuongchun, a bang kil li a'n khi zo chun a dung tieng meter zahni sawmnga, a khang meter zahni sawmnga a nih. Bang chu hmun thienghlim le vantlang umna tuolzawl daidantu a nih.

  Ezekiel (42/48)