←  Ezekiel (40/48)  →
1. Sala kan intanga inthoka kum sawmhni le kum ngana, Jerusalem sieta inthoka kum sawm le kum lina, kum bul ni sawmna ni tak,a chun LALPA kut ka chungah a um a, chu taka inthok chun a mi thuoi a.
2. Pathien inlarna chun Israel ramah a mi fepui a, tlang insang takah a mi thuoi a, chu sim tieng chun khawpui bawl thar ni awm tak hi a um a.
3. Chu hmuna chun a mi thuoi a, chu taka chun mi pakhat, a hmel dar anga tle hi ka hmu a; kotkharah a ngir a, a kutin hrui le thil inkhina hmol a chawi a.
4. Chu mi chun ka kuomah, "Mihriem naupa, i mitin en la, i nain ngaithla la, ka'n entir ding che po po hi lung lut takin inchik rawh, chu dinga hi taka hung thuoi i ni si a. I thil hmuhai po po chu Israel sungkuohai kuomah i hril ding a nih" a ti a.
5. Banga inhuon tempul ka hmu a. Miin inkhina hmol a chawi chu meter thumab sei a na, bang sazie le insangzie chu a'n khi a, meter thum ve ve a nih.
6. Chu zoah sak tienga inthoka lutna kailawna chun a lawn tung a, kailawn tawpa chun zawl, inkhina hmol tluk khata lien a um a.
7. Lut peina sir tuoka chun vengbuk pathum ve ve a um a, chuong vengbuk tin dung le khang chu inkhina hmol tluk khat vong a na, vengbuk inkar bang sazie chu meter hni le a chenve a nih. Tempul tieng ngha tuolpuk khela lutna kot bul tuong zawl khom chu inkhina hmol tluk khata lien a nih.
8. Chun, tempul lutnaa tuolpuk chu a'n khi bok a,
9. meter li le centimeter hnia inpuk a na, ban meter khat biela lien a um a, kotkharpui tuolpuk chu tempul tieng nghaa um a nih.
10. Sak tienga inthoka lutna sir khing ve vea vengbuk pathumhai chu an intiet vong a, an inkar bang seizie khom an inang vong bok.
11. Chun, a kotpui lutna khom chu a'n khi a, a khang chu meter nga a na, a seizie chu meter ruk le a chenve a nih.
12. Vengbuk lutna bang thut chu centimeter sawmngaa insang a na, a sung tieng ruok chu a sir tuokin meter thum vong a nih.
13. Chu zoah vengbuk epa lutna kotpui seizie chu vengbuk chawr tieng banga inthokin a hma tieng bang tawp chen chun a'n khi nawk a, a seizie chu meter sawmpahni le a chenve a nih.
14. A sung bang inkar chu a lutnaa inthoka tempul tuolzawl tienga ngha tuolpuk chen a'n khi nawk a, meter sawmthum a nih.
15. Lutna tontira inthoka a suokna chen inkar seizie chu meter sawmhni panga a nih.
16. Vengbuk chawr tieng bang tina chun tukver chin pakhat pei a um a, a sunga pindan le pindan inkara chun tukver pakhat seng a um bok a. Lampui hrula pindan bang tina chun tum thing lim an ziek a.
17. Mi chun tempul inhuonna sung tuolzawl tontira chun a mi thuoi a. Tuolzawl sir tuokin, kul puo tieng bang ringin pindan sawmthum an rem kuol a, chuong pindan tuol tuong chu lung rem vong a nih.
18. Chu lutna kot zawn sir ve vea chun lungrem, a dung le khang intiet char a um a, chu chu a chuonhnuoi tuolzawl chu a nih.
19. Tempul chuonchung le chuonhnuoi inkar chu a'n khi nawk a, suo tieng le hmar tieng chu meter sawmnga ve ve a nih.
20. Chun, hmar tienga inthoka lutna kot, tempul inhuonna sunga tuolzawl tontir zuk pawtu chu a dung le khang a'n khi bok a.
21. A lutna sir tuoka vengbuk pathum ve ve le an inkar bang seizie le tempul tuolzawl nghaa tuolpuk chu a'n khi vong a, suo tieng kotkhara mi leh an intiet char a, a dung meter sawmhni panga le a khang meter sawmpahni le a chenve a nih.
22. A tukver hai, a bathlar hai le tum thing lim banga an ziek hai khom chu suo tieng kotkhar le inang char bok a nih. Kai tungna sirbi pasari a um a; tuolzawl a va pawna sira chun tuolpuk a sung tieng a um bok a.
23. Suo tieng kot ang charin tempul inhuonna sunga chun hmar tieng khom kot a um a. A chuonhnuoi le a chuonchung lutna le suokna kot inkar chu a'n khi a, meter sawmnga a nih.
24. Chun, sim tieng pangah a mi thuoi a, sim tieng nghaa um a lutna kot chu ka hmu a, kot bienga inthok chun a tuolpukhai chu a'n khi vong a, a danghai leh thuhmun char a nih.
25. A sung tieng banga chun tukver chikte te a um a, tempul inhuon sung tuolzawl va pawna sira chun tuolpuk a sung tieng a um a. A dang ang bokin a dung chu meter sawmhni panga a na, a khang chu meter sawmpahni le a chenve a nih.
26. Kai tungna sirbi pasari a um a, a sung tieng chun tuolpuk a um a, a lutna bang khing tieng khing tieng chun tum thing lim an ziek a.
27. Tempul inhuonna tuolzawl chun sim tieng kot a nei a, a chuonhnuoi le chuonchung lutna kot inkar chu a'n khi a, meter sawmnga a nih.
28. Sim tienga inthoka a chuonchung lutna kota chun a mi thuoi a, a kot bienga inthok chun a tuolpukhai chu a'n khi a, a danghai leh an inang char a.
29. Vengbuk hai, a bang inkar hai le a tuolpuk hai chu kotkhar danga mihai leh an intiet char bok a. A bang sir tuok le a tuolpuk tina chun tukver a um vong a. A dung seizie chu meter sawmhni panga le a khang chu meter sawmpahni le a chenve a nih.
30. A vela chun tuolpuk a dung meter sawmpahni le a chenvea sei le a khang meter hni le a chenvea lien a um a.
31. A tuolpuk chu a chuonchung tuolzawl tieng a ngha a, banga chun tum thing lim an ziek a. A chuonhnuoia inthoka a chuonchung kai tungna sirbi chu pariet a nih.
32. Suo tienga inthoka a chuonchung lutna kota chun a mi thuoi a, a hang inkhi a, a danghai tiet bok a nih.
33. Vengbuk hai, bang inkar hai le a tuolpuk hai chu a danga ang bok a nih. Tukver le tuolpuk a um ve vong a, a dung meter sawmhni panga le a khang meter sawmpahni le a chenve a nih.
34. A tuolpuk chun a chuonhnuoi tieng a ngha a; khing tieng khing tienga pindan sung tieng banga chun tum thing lim a um a, a hnuoia inthoka a chuonchung tieng kai tungna sirbi pariet a um a.
35. Chu zoah hmar tienga inthoka a chuonchung lutnaa chun a mi thuoi a, a'n khi a, a danghai tiet bok a nih.
36. Vengbuk hai, a kar bang hai, tuolpuk hai le tukver inhonghai chu a danghai ang char a nih. A dung chu meter sawmhni panga le a khang chu meter sawmpahni le a chenve a nih.
37. A tuolpuk chun a chuonhnuoi tieng chu a ngha a, a banga chun tum thing lim a um a, a hnuoia inthoka a chuonchung tieng kai tungna sirbi pariet a um bok a.
38. Hmar tienga inthoka a chuonhnuoi lutna sira chun a lutnaa inthoka lut el thei in pakhat a um a, chu pindan chu pumraw inthawinaa inhlan dinghai an sawp faina hmun a nih
39. Kotkhar bul tuolpuk khing tieng khing tieng chun dawkan pahni ve ve a um a, chuonghai chu pumraw inthawina dam, suol inthawina dam le thiem naw changna laka inthawina thilhlanhai dam an thatna hmun a nih.
40. Pindan puo tieng, hmar tienga inthoka lutna tuolpuk khing tieng khing tieng chun dawkan pahni ve ve a um bok a.
41. Chu taka pumraw inhlan ding ran an thatna le buotsaina dawkan um zat chu pariet, a sung tieng pali, a puo tieng pali a nih.
42. Chun, pumraw inhlanna ding dawkan pali, lung sera siem a um bok a, a'n sangzie chu centimeter sawmnga le a chung biel vel lienzie chu centimeter sawmsari le panga seng a nih. Dawkan chunga chun pumraw inthawina le inthawina dang danga hmang ding ran thatna hmangruohai chu an sie a.
43. Tuolpuk banga chun a velin sa khaina ding thir zum kuoi inkak, centimeter rieta sei an khai fur bok a. Dawkanhai chu inthawina sa siena ding a nih.
44. A chuonchung zawla hmar tienga inthoka lutna le sim tienga inthoka lutnaa chun in a um ve ve a, pakhatin sim tieng a ngha a, pakhatin hmar tieng.
45. Ama chun, "Hmar tienga um, sim tieng ngha in hi tempula rongbawltu thiempuhai umna a ni a;
46. sim tienga um hmar tieng ngha in hi maichama rongbawl thiempuhai umna a nih; chuonghai chu Zadok thlahai an ni a, Levi chihai lai khom anni chauh hi LALPA hmaah hung inlang a, a rong bawl theihai chu an nih" tiin a mi hril a.
47. Chun, a chuonchung zawl chu a'n khi a, a dung meter sawmnga, a khang meter sawmnga a ni a; tempul tuolzawl laili taka chun maicham a um a.
48. Tempul tuolpuka chun a mi thuoi a, a dona banhai chu a'n khi a, meter hni le a chenve biel vel senga lien a nih. A lutna kot chu a khang meter saria lien a na, a sira banghai chu meter khat le a chenvea sa a nih.
49. A tuolpuk chu meter sawma sei le meter ruka inpuk a na, a kai tungna dingin sirbi sawm a um a, a sira chun sutpui pakhat ve ve a ngir a.
←  Ezekiel (40/48)  →