←  Ezekiel (4/48)  →
1. "Nang mihriem naupa, teklei phek la la, i hmaah rem khawm la, chu taka chun Jerusalem khawpui lem ziek rawh.
2. A vela inhuolna ding hlan daw kuol la, muol deng pawng siem huol la, sipai riebuk siem la, kul bang sut hongna ding a velin siem bok rawh.
3. Chun, thir phek la la, chu chu nang le khawpui inkara kul bang angin sie la, chu tieng pang chun ngha rawh. Khawpui chu inhuolin um sien la, nangman inhuol rawh. Chu chu Israel sungkuo ta dinga inchikna ning a tih.
4. "Chun, i voi tieng sir delin zal la, i chungah Israel sungkuohai suolna po po innghat rawh. A sira i zal sung po po chun an suolnahai chu i phur ding a nih.
5. An suol sung po po kum khat pei kha ni khat pei anga tiemin ni zathum le sawmkuo sung Israel sungkuohai suolna chu phurin i zal ding a nih.
6. Chuong anga i thaw zo pha leh i chang tieng sir delin, Juda sungkuohai suolna chu phurin ni sawmli sung zal nawk i ta, ni khat pei chu kum khat pei anga tiem ning a tih.
7. Chu zoah Jerusalem tieng nghain inhuol la, i kuttum inletin, a siet ding thu hril mol mol rawh.
8. Inhuol dinga ka ti sung a tlingtlak hma khat chu che son thei der loin hruolin ka khuop de ding che a nih.
9. "Chun, huit le barli, bete le dailuo, butun le huit tha naw chi la la, bel pakhatah sie la, beiin siem rawh. I pang sir khat chauh dela i zal sung, ni zathum le sawmkuo sung chu, chuonghai chu i ring ding a nih.
10. I fak ding chu inkhi vong ding a na, ni khatah gram 228
11. Tui khom inkhi vongin dawn i ta, litar ruk inleng bela mi chu hmun rukin inkhi suok i ta, a hun tak peiah i dawn ding a nih.
12. Ni tinin i bu dingin barlia siem bei i ur ding a nih. Chu chu mi um lai le an hmu lai ngei, mihriem ek tawl thinga hmangin i ur ding a nih.
13. Hieng ang hin Israel mihai chun ka hnot hmangna ding hnamhai lai bu porche fang an tih" tiin LALPA chun a mi hril a.
14. Chu phing leh kei chun, "Ni lo e, Lalpa PATHIEN! Ka nun hi ka sukporche ngai naw a. Ka tleirawl laia inthoka tu chen hin ran thi sa amanih, sa tlaw amanih ka la fak ngai naw a, sa thieng lo hrim hrim ka baua hin a la lut ngai bok nawh" ka ta.
15. Ama chun ka kuomah, "Chuong a ni leh mihriem ek aiah bawng ek peng ka ti che, chu chun i fak ding bei chu i ur hmin ding a nih" a ta.
16. Chun, ama bokin, "Mihriem naupa, ngai rawh, Jerusalema fak le dawn an lak lut ding po po chu ka charchil vong ding a ni leiin, mihai chun beidong takin an bu fak ding tawk inkhing an ta, an tui dawn ding khom inkhi bok an tih.
17. Bu fak ding le tui dawn ding a vang em em ding a nih. An inhmu pha khom hrilhai takin inen an ta, an suolna leiin zur hmang an tih" a ta.
←  Ezekiel (4/48)  →