←  Ezekiel (39/48)  →
1. "Chun, mihriem naupa, Gog chungthu hieng hin hril rawh: Lalpa PATHIEN chun hieng hin a tih: Aw Gog, Mesek le Tubal hnamhai hotu lu tak, ka khing che a nih.
2. Kei herin fen leng ka ti che a, hmar tawp rama inthokin Israelhai tlangah thuoi ka ti che.
3. I kut voi tienga i thalngul chu suktliek ka ta, i kut chang tienga i thal chawi chu pei thlang ka tih.
4. Israel tlanga hai chun nang le sipai ruol po po le hnam i hung thuoihai po po hai chu tlung in ta, sa fa mi chungleng vatehai le ram sakolhai fak dingin pe suok ka ti cheu.
5. Ram palailengah tlu phung in tih ti hi Lalpa PATHIEN thu suok a nih.
6. Magog chunga le tuipui kama muong taka chenghai chunga chun mei insuoktir ka ta, LALPA chu ka nih ti hre tang an tih.
7. "Chun, ka mi Israelhai lai ka hming thienghlim inhriettir ka ta, ka hming thienghlim an sukporche nawk phal ta nawng ka ta, chu pha chun hnam tinin kei hi LALPA, Israel Mi Thienghlim chu ka nih ti hre tang an tih.
8. Ngai ta, hun hung tlung ding ka hril kha a hung hnai tah ie! Hung tlung ngei a tih ti hi Lalpa PATHIEN thu suok a nih.
9. Israel khawpuia umhai chu fe suok an ta, an ralthuom tinreng phaw hai, awmphaw hai, thalngul hai, thal hai, hmoltum hai le fei hai chu thing dingin la khawm an ta, thing tiah hmang an ta, kum sari sung thingin ring an tih.
10. An ralthuom tlansanhai chu thing tia an hmang ding a ni leiin rama thing an fom ngai naw ni a, thing an phur ngai bok naw nih. Anni suomtuhai chu suom let an ta, anni roktuhai chu rok let ve thung an tih ti hi Lalpa PATHIEN thu suok a nih.
11. "Chu ni chun Gog ta dingin Tuipui Thi sak tieng, 'Khuolzin Ruom' an ti, Israel rama chun thlan hmun ruotpek ka ta, chutaka chun Gog le a mi hung thuoihai po po phum an ta, an thlan hmun chun khuolzinhai lampui dang a ta, chu ruom chu Hamon Gog tia ko hung ni tang a tih.
12. Israel mihai chun a rama inthoka ruong inthiel faina le phumna dingin thla sari sung awng an tih.
13. A ram mipuihai chun phum an ta, chu ni, chawimawia ka um ni chu an ta dinga ni inchik tlak ning a tih ti hi Lalpa PATHIEN thu suok a nih.
14. "A ram inthiel faina sin thaw ngar ngartu ding mi ruot hiel an tih. A then ruong zongin invak vel an ta, a thenin ruong phum loa hnuoia la zalhai chu phum an tih. Thla sari a hung invoi hnungah phum thelh ruong zong pawl ruot an ta, an sin thaw tan an tih.
15. Ruong zong pawlin mithi ruro an hmuna taphotah inchikna siem an ta, a phumtuhaiin Hamon Gog ruomah phum an tih.
16. Chu bula chun khuo pakhat a hming Hamona tia ko um bok a tih. Chuong ang chun a ram chu inthiel fai an tih.
17. "Mihriem naupa, Lalpa PATHIEN chun hieng hin a tih: Vate le ramsa tinreng ko suok la, an kuomah, 'Inhawr khawm unla, Israel muol le tlanga inthawina ruoi ropui tak in ta dinga ka buotsai chu kil dingin kil tina inthokin hung ro. Chu taka chun sa fain, thisen dawn in tih.
18. Beramchal le beramte, kelchal le bawngchal sa ang topin mi ropuihai sa fang in ta, hnuoia hotuhai thisen dawn in ta, an rengin Basan rama ran chawm thau tak tak ang vong an nih.
19. Inthawina ka buotsaipek cheua chun luok suok bur khopin in fa thau in ta, thisen khom inrui khopin dawn in tih.
20. Ka dawkana chun sakor le a chunga chuonghai sa dam, mi ropuihai le ral do mi chi tinreng sa dam in dit tawkin fang in tih' ti hi Lalpa PATHIEN thu suok a nih.
21. "Hnam tin kuomah ka ropuina tar lang ka ta, an chungthu ka rel tah anga ka hremzie le an chunga kut ka thlakziehai hmung an tih.
22. Chu nia inthok chun Israel sungkuohai chun LALPA an Pathien ka nizie hung hre tang an tih.
23. Chun, sala Israelhai an intangna san chu ka chunga ringum loa an suol lei a nizie hnam danghai chun hung hre tang an tih. Anni chu ka nghatsan a, an hmelmahai kutah ka pek a, kawlhnamin an that ta vong a.
24. An tirdakumzie le bawsietna ang peiin ka hrem a, ka nghatsan a nih.
25. "Chuleiin, Lalpa PATHIEN chun hieng hin a tih: 'Tu hin saltangnaa inthokin Jakob chu thuoi kir ka ta, Israel sungkuohai chu lunginsiet nawk ka ta, ka hming thienghlim hi thahnemngai takin humhal tlat ka tih.
26. Tu khom ti loa an ramah muong taka an cheng nawk pha chun an muolphona le ka chunga an ringum nawnahai chu theinghil tang an tih.
27. Hnam dang, an hmelmahai rama inthoka ka hung thuoi kir pha chun, hnam tam takhai mithmuah anni hmangin ka thienghlimzie inentir ka tih.
28. Hnam tin lai salah intangtir tawl lang khom, tu khom maksan nei loa an rama ngeia ka hung thuoi khawm nawkzie an hmu pha chun LALPA an Pathien chu ka nih ti hung hre tang an tih.
29. An lakah ka hmel thup ta nawng ka ta, Israel sungkuohai chungah ka thlarau buok ka tih" ti hi Lalpa PATHIEN thu suok a nih.
←  Ezekiel (39/48)  →