←  Ezekiel (38/48)  →
1. LALPA thu chu ka kuomah a hung tlung a.
2. "Mihriem naupa, Mogog rama mi, Mesek le Tubal hnamhai lu tak Gog chu hmason la, a chungthu ding hrilpek rawh.
3. Lalpa PATHIEN chun hieng hin a tih: 'Aw Gog, Mesek le Tubal hnamhai hotu tak, ka khing che a nih.
4. Tuoi vir ka ti che a, i khakah ngakuoiin kuoi ka ti che a, ralthuom kima inthuom i sipai ruol, sakor le sakor chungchuong hai, mi tam tak, phaw lien le phaw chin chawituhai le kawlhnam viliktuhai po po le chun khai suok ka ti che.
5. Persia mihai, Sudan mihai le Libya mihai chu phaw chawia thir lukhum khumin nang leh hung an ta,
6. Gomer le a sipai ruolhai dam, hmar tieng hla taka mi Bet Togarmat le a sipai ruolhai dam le hnam tam tak chu nangma ruolin hung bok an tih.
7. "Chuleiin, inralring la, inpei la, i mi hawr khawmhai chunga thu petuah thang rawh.
8. Ni iemani zat hnungah ral bei dinga ko ning i tih. Indonaa inthoka san suoka um le hnamhai laia inthoka lak khawma umhai chengna Israel tlang, rausana um hlak chu la hung bei i tih. Anni chu hnamhai laia inthoka thuoi suok an ni hnunga thlamuong taka an rama khawsa an nih.
9. Chun, nang chu thlipui ang elin hrang tung i ta, a ram chu sum angin bawm khum i tih.
10. "Lalpa PATHIEN chun hieng hin a tih: Chu ni a hung tlung pha chun lungril tha naw hung put i ta, thil tha lo tak phier i tih.
11. Chuongchun, 'Ram, kul khom nei ve lo khuohai chu run ka ta, him taka um tok tok, kul nei loa cheng, kul kotkhar le a kalna thirhai khom nei ve lohai chu bei ka tih.
12. Chuong hnamhaia inthoka thuoi khawm, khaw ram tahnung hung hluo nawktu, ram lailia cheng, ran ruol le sum hung hau nawkhai chu runin rok ka ta, an chungah kut inlet ka tih' ting i tih.
13. Seba le Dedan le Tarsis sumdawnghai le an khuohai po po chun, "Mi rok dingin i hung a ni maw? Tangkaruo hai, rangkachak hai, ran ruol hai le sum tam tak nuom tawka roka phur hmang dingin maw i mihai i hawr khawm chu?" ting an ti che.
14. "Chuleiin, mihriem naupa, Gog chungthu chu hieng ang hin hrilpek rawh: Lalpa PATHIEN chun hieng hin a tih: Chu ni, ka mi Israelhai him taka an um hun ding chu i hriet kar a.
15. I chengna hmar tieng ram tawpa inthokin hung i ta, i ruolin hnam tam taka mi sakor chungchuong ngot, sipai nawlpui ropui tak hung thuoi bok i tih.
16. Sumpuiin ram a tuom mup mup angin ka mi Israelhai chu hung tuom i tih. Chu ni hung tlung dinga chun aw Gog, nangma hmanga hnamhai mithmua keima ngeia ka thienghlimzie ka'n entir theina ding chein, ka ram bei dingin hung thuoi ka ti che.
17. "Lalpa PATHIEN chun hieng hin a tih: 'Anni do dinga mi hung inthok ding thu, tiena tlanga inthoka kum tam tak sung ka siehlaw Israel zawlneihai hmanga ka lo inhril lawktir tah hlak kha, nang hi i ni naw maw? Chuong lai chun anni ka la'n dotir ding che thu hi kum tam tak an lo puong ngat ngat tah a nih.
18. Chu ni chun hieng ang hin ning a ta, Israel ram bei dinga Gog a hung pha chun ka lungsen suksosang a tih ti hi Lalpa PATHIEN thu suok a nih.
19. Ka lungsen sosangin ka hril a nih: chu ni chun Israel ramah lir nasa takin inhning a tih.
20. Tuia cheng nga hai, chungleng vate hai, ramsa hai le hnuoi chunga invak thilhring tinreng hai le hnuoi chunga mihriem po po hai chu ka hmaah inthin hawp an tih. Tlanghai inletkhup a ta, rawlhai chim a ta, kul bang po po hnuoiah tlu rem rum a tih.
21. Gog-hai bei dingin tlang tina inthokin kawlhnam ko khawm ka ta, mi tinin an kawlhnam chu an unauhai chungah inlet an tih ti hi Lalpa PATHIEN thu suok a nih.
22. Hripui le thisena hremna chu a chungah intlungtir ka ta, ruopui vanawn le rielin nuoi a ta, ama le a sipaihai le hnam tam tak a hung thuoihai chunga chun mei le kat insurtir ka tih.
23. Chuong ang chun ka ropuina le thienghlimna chu inentir ka ta, hnam tam takhai mithmuah keima chu inhriettir ka tih. Chu pha chun LALPA chu ka nih ti hre tang an tih.
←  Ezekiel (38/48)  →