←  Ezekiel (37/48)  →
1. LALPA kut chu ka chungah a um a, LALPA thlarau chun a mi thuoi suok a, ruom lai takah a mi sie a; chu ruom chu ru ngotin a sip a.
2. Ruom chu a mi fangpui a, ruom dapin ru a'n hlum rem rum a, ru tawl vong a nih.
3. Ama chun ka kuomah, "Mihriem naupa, hieng ruhai hi hring nawk thei a ti?" a ta. Kei chun, "Lalpa PATHIEN, nang chauin i hriet" ka ta.
4. Ama chun ka kuomah, "Hieng ruhai chunga hin thu hril la, an kuomah, 'Aw nangni ru tawlhai, LALPA thu hi lo ngai ro.
5. Hieng ruhai kuoma Lalpa PATHIEN hril chu hi hi a nih: Ngai ro, nangniah thuok inluttir ka ta, hring in tih.
6. Chun, nangniah thahrui sieng ka ta, taksain tuom ka ti cheu a, vunin inkhum ka ti cheu; chun, in sungah thuok inumtir ka ta, hring in tih. Chu pha chun LALPA chu ka nih ti hrieng in tih' ti rawh" a mi ti a.
7. Chuongchun, thu a mi pek ang chun ka hril a. Ka hang hril chun ri a hung um a, a hung inri rok rok a, ruhai chu mani inzompui senga chun an inchuktuo khawm a.
8. Ka hei en chun, ngai ta, anni thahrui seng an hung put a, taksain a hung tuom a, vunin a hung inkhum a, thuok ruok chu annia chun a um nawh.
9. Chuongchun, ama chun ka kuomah, "Mihriem naupa, thli kuomah thu hril la, hril ngei ngei la, hieng hin ti rawh: 'Lalpa PATHIEN chun hieng hin a tih: Aw Thuok,z kawl kil lia inthokin hung la, hieng thata um tahai hi an hring theina dingin hung mut rawh' ti rawh" a mi ti a.
10. Chuongchun, a thupek ang chun ka hril a, thuok chun a hung mut a, an hung hring a, mani ke sengin an ngir a, sipai ruol ropui tak an hung ni ta a.
11. Ama chun ka kuomah, "Mihriem naupa, Israel sungkuo pumpui hi hieng ru tawl ang hi an nih. Ngai ta, anni chun, 'Kan ruhai a tawl zo a, kan beisei a bo zo ta a, sat thlakin kan um tah' an lo ti hlak a.
12. Chuleiin, an kuomah thu hril la, Lalpa PATHIEN chun hieng hin a ti a nih: 'Ka mihai ngai ro, in thlanhai hong ka ta, in thlana inthokin insuoktir ka ti cheu a, Israel ramah thuoi lut nawk ka ti cheu.
13. In thlanhai honga kan suoktir pha cheu chun, aw ka mihai, LALPA chu ka nih ti hre tang in tih.
14. Chun, nangniah ka Thlarau sieng ka ta, hring in ta, in ram ngeiah sie nawk ka ti cheu' tiin kei LALPA hin ka hril ta a, thaw ngei bok ka tih ti hrieng in tih, ti hi LALPA thu suok a nih" a ti a.
15. Chun, LALPA thu chu ka kuomah a hung tlung a.
16. "Mihriem naupa, hmol pakhat la la, hmola chun 'Juda le a zompui Israel nauhai ta' tiin ziek rawh. Chun, hmol dang la bok la, chu hmola chun, 'Efraim hmol, Josefa le a zompui Israel sungkuo po po ta' tiin ziek rawh.
17. Chu hmol pahni chu hmet thlop la, hmol pakhatin siem rawh.
18. "Chun, i mihaiin, 'Hi hi ieng tina am a nih ti mi hril thei i tim?' tia an indon che chun,
19. an kuomah 'Lalpa PATHIEN chun hieng hin a tih: Efraim kuta um Josefa hmol chu lang ka ta, a zompui Israel sungkuohai hmol chu la bok ka ta, Juda hmol leh hmet thlop ka ta, hmol pakhatah siem ka ta, ka kutah hmol pakhat hung ni tang an tih' i ti ding a nih.
20. An mithmua ngei thu i ziekna hmol pahni chu hmet thlop la,
21. an kuomah hieng ang hin hril rawh: Lalpa PATHIEN chun hieng hin a tih: Israelhai chu an fena hnam danghaia inthok chun la suok ka ta, hmun tina inthokin thuoi khawm ka ta, an ramah hung thuoi kir nawk ka tih.
22. Chu ram, Israel tlangahai chun hnam pakhatah indin ka ta, roreltu lal pakhat nei an ta, hnam hni le ram pahnia inthe hlak kha hnam khat le ram khat ni tang an tih.
23. Milem biek le thil tirdakum an thawhai le thil poi chi hrang hrang an tawk hlakhai chun insukporche ta naw ni hai a, an hnungtol ding veng ka ta, tleng fai tawl ka tih. Ka mihai ning an ta, kei hi an Pathien ning ka tih.
24. "Ka siehlaw Davida ang lal nei an ta, roreltu pakhat hnuoiah um tang an ta, ka danhai zui an ta, ka thu ruothai fimkhur takin vong tang an tih.
25. Ka siehlaw Jakob kuoma ka pek, in pi le puhai chengna rama chun cheng an ta, anni le an nauhai, an nauhai nauhai khom kumkhuoin cheng tang an ta, ka siehlaw Davida ang chu an lal ni kumkhuong a tih.
26. Inremna thuthlung siempui ka ta, chu chu an ta dingin kumkhaw thuthlung ning a tih. Anni chu suknghet ka ta, sukpung bok ka ta, anni lai ka biekbuk kumkhuoin indin ka tih.
27. Anni lai cheng ka ta, an Pathien ning ka ta, ka mihai ning an tih.
28. Kumkhuoa anni lai ka biekbuk a um pha chun kei, LALPA hi Israelhai sukthienghlimtu chu ka nizie hnamhaiin hre tang an tih' ti rawh" tiin.
←  Ezekiel (37/48)  →