←  Ezekiel (36/48)  →
1. "Mihriem naupa, Israel tlanghai chungthua chun hieng ang hin hril rawh: 'Aw Israel tlanghai, LALPA thu hi lo ngaithla ro.
2. Lalpa PATHIEN chun hieng hin a tih: 'I hmelmahai chun esel takin, "Sei leh! Tlang hluihai chu ei chang nawk an ta hi" an ti a.
3. Chuleiin, hieng ang hin an kuomah hril rawh: 'Hi hi Lalpa PATHIEN thu suok chu a nih: In vela hnamhai chun in ram chu an nei theina dingin an bei cheu a, an sukram cheu a, an cheksol cheu a nih.
4. Chuleiin, Israel tlanghai, Lalpa PATHIEN thu hi lo ngaithla ro: tlang hai, muol hai, ruom hai, hmun rausan le rok tuok, in kawl le kienga hnamhai hmusit hlawhai, Lalpa PATHIEN chun hieng hin a tih:
5. Ka thahnemngai sosangin in se vela hnam danghai chu demin ka hril a nih. Edom lem chu ka dem nawkzuol. Dit tawka ka ran tlatna hmunhai suosam tumin, hlim tak le lungril se takin ka ram chu a lak a.
6. Chuleiin, Israel ram chungchang thu chu muol le tlang le ruom le phaihai kuomah hieng hin hril rawh: Lalpa PATHIEN chun hieng hin a tih: Hnamhai hmusit i tuor leiin ka thikthu lung intar takin ka hril a nih.
7. I se vela cheng hnamhai chun muolphona tuok veng an tih tiin Lalpa PATHIEN hin kut hlang meuin ka'n tiemkam a nih.
8. "Aw Israel tlanghai, nangni ruok chu in kauhai hung inder tharin, ka mi Israelhai ta dingin ra insuong in tih, in tieng an hung kir vak ding a ni si a.
9. Ka'n voi cheu a, ditsakna mitin en ka ti cheu. Ram chu inlet nawk an ta, thlai chi thlak an tih.
10. A hluotuhai chu sukpung ka ta, Israel sungkuo hung pung tuol tuol an tih. Khuohai chu hluo nawk an ta, hmun tlu ram tahai chu tungding nawk an tih.
11. Nangni laia khawsa mihriem le ranhai chu sukpung ka ta, hung hmuingil an ta, tam tak hung ning an tih. Kha hma ang bok khan ram chu hluo nawk an ta, a hmaa neka hmuingil lemin siem ka tih. Chu pha chun LALPA chu ka nih ti hre tang in tih.
12. Ka mihai, ka mi Israelhai ngei tuol lengnaah siem ka ta, hluong an ti cheu a, an rochan ning in ta, in nauhai chu chan nawk ta ngai naw ti niu.
13. "Lalpa PATHIEN chun hieng hin a tih: Mihaiin, 'Hi ram hi mihriemhai fa zotu le an nauhai insuntirtu a nih' an ti hlak.
14. Sienkhom mihriemhai fa ramtu le nauhai sunna ram ni ta ngai naw nih' ti hi Lalpa PATHIEN thu suok a nih.
15. Hnam danghai eselna le hmusitna tuor ta naw ni hai a, an hnam phurthlutu ni ta ngai bok naw ni hai' ti hi Lalpa PATHIEN thu suok a nih, tiin hril rawh" a ta.
16. "Chun, LALPA thu chu ka kuomah a hung tlung nawk a.
17. Mihriem naupa, Israel sungkuohai chu an rama an cheng lai khan an um dan le thilthawin a ram chu an sukporche a. Ka mita chu an um dan hi nuhmei thla pal lai anga tirdakum a nih.
18. A ramah thisen insuo a, milemhai biea an insukporche leiin ka hnot suok tawl a ni kha.
19. Hnam tin lai ka sukdar a, ram tinah an um dar a; an um dan ang le thilthaw dan angin an chungah ro ka rel a nih.
20. An fena taphota hnamhai lai ka hming thienghlim an sukpawi a, mihaiin 'Hienghai hi LALPA mihai an nia chu a rama inthokin a hnot suok tawl a ni hi!' an ti hlak si a.
21. Israelhaiin an fena taphot hnamhai laia ka hming thienghlim an sukpawi hi ka lai a na a nih.
22. "Chuleiin, Israel sungkuohai kuomah hieng hin hril rawh: 'Lalpa PATHIEN chun hieng hin a tih: Aw nangni Israel sungkuohai, nangni ka lainat cheu lei ni loin, in fena taphot hnamhai laia in sukpawi hlak ka hming thienghlim chu ka lainat lei lemin hieng thilhai hi ka thaw ding a nih.
23. Ka hming ropui tak, hnam danghai laia sukpawia um, nangni ngeiin in sukpawi chu, a thienghlimzie inhmutir ka ti cheu. An mithmu ngeia nangni hmanga ka thienghlimna ka'n entir pha chun LALPA chu ka nih ti hung hre tang an tih ti hi Lalpa PATHIEN thu suok a nih.
24. "Hnam danghai laia inthokin thuoi suok ka ti cheu a, ram tina inthoka thuoi khawmin in ramah thuoi kir ka ti cheu.
25. Tui fimin buok ka ti cheu a, hung inthieng tang in ta, tirdakum in kaihai po po le in milem bieknaa inthokin tleng fai ka ti cheu.
26. Lungril thar peng ka ti cheu a, in sungah thlarau thar sieng ka ta; in lungril, lung anga ngar chu la suokin, pangti anga innem lungril peng ka ti cheu.
27. In chungah ka thlarau sieng ka ta, ka thu suokhai inzawmtirin ka danhai fimkhur takin invongtir a ti cheu.
28. In thlatuhai kuoma ka pek rama chun cheng in ta, ka mihai ning in ta, in Pathien ning ka tih.
29. In porchena po poa inthokin san suok ka ti cheu a; fang ko ka ta, a tontawin bu hau in ta, tam intlaktir ta naw ning.
30. Thing rahai sukpung ka ta, in lohma sukthang ka ta, tam leiin hnamhai lai muolphona tuok ta naw ti niu.
31. Chu pha chun in nun dan suolziehai le in thilthaw riloziehai hung hrieng in ta, suolna le thil tirdakum in lo chinghai lei chun nangni chen intirdak in tih.
32. Hieng thil hi nangni leia ka thaw a ni nawh ti hre ro ti hi Lalpa PATHIEN thu suok a nih. Aw Israel sungkuohai, in um dan chu inzapuiin, inphalam tlok tlok ro.
33. "Lalpa PATHIEN chun hieng hin a tih: In suolnahaia inthoka ka sawp fai pha cheu leh in khawpuihai inhluotir nawk ka ti cheu a, hmun ram ta hnunghai chu indin thar nawk ka tih.
34. Chun, ram rausan ta hnunghai chu inlet nawk in ta, inzin inlonhai mithmuah rausan ram ni zing ta naw nih.
35. Anni chun, "Rausan ram ni hlak kha Eden huon ang elin a hung inchang nawk ta hi! Khawpui tlu ram hnung, rausan le suksieta umhai khom kha kula inhuonin an hluo nawk tah" ting an tih.
36. Chu pha chun, a tiek ta hnunghai tungding nawk a, a tlaran ta hnunghai phun thar nawktu chu kei LALPA hi ka nih ti in kawl le kienga hnam la umhai chun hung hre tang an tih. Chu thu chu kei LALPA hin ka puong a, ka hril ang takin thaw ngei ka tih.
37. "Hi hi Lalpa PATHIEN hril chu a nih: Israel sungkuohai thil hni chu ngaithlapek nawkin, hi hi thawpek ka tih: Israel sungkuohai chu ran ruol anga tamin sukpung ka tih.
38. Jerusalema kut hmang huna inthawinaa inhlan ding ran ruol ang topa tamin khawpui tlu ram tahai chu mipuiin hung hluo sip nawk an tih. Chu pha chun kei hi LALPA chu ka nih ti hre tang an tih" a ta.
←  Ezekiel (36/48)  →