←  Ezekiel (35/48)  →

---

1.

LALPA thu chu ka kuomah a hung tlung a.

2.

"Mihriem naupa, Seir tlang tieng ngha la, a chungthu ding hieng hin hrilpek rawh:

3.

Lalpa PATHIEN chun hieng hin a tih: Seir tlang, nang hi ka khing che a, i chungah kut inlet ka ta, hmun rausanah siem ka ti che.

4.

I khawpuihai intluk ramtir vong ka ta, rausanin um i ta, chu pha chun LALPA chu ka nih ti hung hre tang i tih.

5.

"Tiena inthoka Israelhai i theidana kha la pai zingin, an ngirhmun siet lai, hremna vawrtawp an hmasuon lai khan kawlhnamin i lo bei lem a.

6.

Chuleiin, thisen insuotu kutah inhlan ka ti che a, chu chun hnot thlur a ti che ti hi kei, Lalpa PATHIEN hin ka hringna salin ka hril a nih. Thisen insuo i chak a, thisen chun hnot thlur a ti che.

7.

Seir tlang chu ram se tawngah siem ka ta, tu khomin sir ta naw nih.

8.

I tlanghai chu mithi ruongin suksip ka ta, i muol hai, phai hai le ruom haia chun kawlhnama an thathai ruong inhlum rem rum a tih.

9.

Rausan ram ni song i ta, i khawpuihai chu tu khomin hluo ta naw ni hai. Chu pha chun kei hi LALPA chu ka nih ti hung hre tang i tih.

10.

Kei LALPA hi ka um zing laiin, 'Hieng hnam pahnihai le an ramhai hi ka ta hung ning a ta, nei ka tih' dam i ti vel a.

11.

Anni chu theida a, an chungah lungsen a, an ram i'n hnar ang char hin i chunga khom thaw veng ka ta, i chungthu ka rel pha chu keima hi an kuomah inhriettir ka tih ti hi kei Lalpa PATHIEN hin ka hringna salin ka hril a nih.

12.

Israel tlanghai diriem khum a, "Sukramin a um ta a, dol el dingin kan kuomah pekin a um tah" i tihai po po kha kei LALPA hin ka lo hriet vong a nih ti, chu pha chun hre tang i tih.

13.

I mi uongkhum a, insum der loa i mi tong khumhai kha ka hriet vong.

14.

Hnuoi pumpui lawmah sukram ka ti che ti hi Lalpa PATHIEN hril a nih.

15.

Israel sungkuohai rochan ram sukrama a um khan i hlim hle a, chuong ang char chun thaw veng ka ti che. Aw nang Seir tlang, Edom ram po po leh sukram ka ti che. Chu pha chun LALPA chu ka nih ti hung hre tang an tih.

---

←  Ezekiel (35/48)  →