←  Ezekiel (34/48)  →
1. LALPA thu chu ka kuomah a hung tlung a.
2. "Mihriem naupa, Israelhai vengtu berampuhai chungthu chu an kuomah hieng ang hin hril rawh: 'Lalpa PATHIEN chun hieng hin a tih: Israel berampuhai, mani chauh inngaisaktuhai chung chu a pik! Berampuhai chun beram ruol an ngaisak lem ding a ni naw maw?
3. An thau in sawk a, an hmulin in inthuom lum a, a thau thau in that a, sienkhom beram ruol chu in enkol si nawh.
4. A songnawihai in keitlei naw a, natna neihai in ngaisak naw a, hliem tuorhai in tuompek naw a, pet hmanghai in thuoi kir naw a, inhmanghai in zong bok nawh. Khauh tak le rawng takin an chungah lal in hrawt a.
5. Berampu an um naw leiin sukdarin an um a, a tlan darhai chu ramsa kolhai bu remchangah an inchang a.
6. Ka beramhai chu tlang tin le muol tinah an indar a, hnuoi hmun tinah an invak dar a, zongtu le enkaitu tu khom an um nawh' tiin hril rawh" a ta.
7. "Chuleiin, nangni berampuhai, LALPA thu hi ngaithla ro.
8. Ka beramhaiin berampu an nei naw leiin suomin an um a, ramsa kolhai bu an inchang a; ka berampuhaiin ka beramhai chu an zong naw a, beram ruol nekin anni hmakhuo chauh an ngaituo lem a nih ti hi kei Lalpa PATHIEN hin ka hming meu salin ka hril a nih.
9. Chuleiin, aw berampuhai, LALPA thu hi lo ngaithla ro:
10. Lalpa PATHIEN chun hieng hin a tih: Berampuhai chu khing ka ta, ka beramhai maw chu anni inphurtir ka tih. Beram vengtu an nina chu suktawp ka ta, mani inchawmnan hmang thei ta naw ni hai. An baua inthokin ka beramhai chu inchu thlapek ka ta, an ta dinga bu ni ta naw ni hai' tiin.
11. "Lalpa PATHIEN chun hieng hin a tih: 'Keima ngeiin ka beramhai chu zong suok ka ta, enkol tawl ka tih.
12. Berampuin a beram tla darhai enkola a umpui angin ka beramhai chu enkol ka ta, sumpui zing le inthim hnuoia khom ka beramhai chu an tlat darna hmuna inthokin san suok ka tih.
13. Hnam tin laia inthokin la suok ka ta, ram tina inthokin hung thuoi khawm ka ta, an ramah hung thuoi kir ka ta, Israel tlang le ruom le a rama umhmun an khuorna hmuna hai chun intlattir ka tih.
14. Hlo thatna hmuna hai thuoi ka ta, Israel tlang sanghai chu an tlatna hmun ning a tih. Chuong tlatna hmun inhoia chun bok an ta, Israel tlanga hlo tha thahai chun inchawm an tih.
15. Keima ngeiin ka beramhai chu enkol ka ta, inboktir ka tih ti hi Lalpa PATHIEN thu suok a nih.
16. Beram inhmanghai chu zong ka ta, a pet hmanghai chu hung thuoi kir ka tih. Hliem tuokhai tuompek ka ta, a chauhai sukhrat ka ta, a thauhai le a hrathai sukbo ka ta, beram ruol chu indik takin enkol ka tih.
17. "Nangni ka beram ruolhai chungthua chun, Lalpa PATHIEN chun hieng hin a tih: Ka beramhai inkar thu chu relpek ka ta, beramchal le kelchal inkar thuhai khom.
18. Tlatna hmun thaa tlat hi in ta dingin a hun tawk an naw maw? Ieng leiin am tlatna hmun tha danghai chu kein in chil siet ding a na? Tui inthieng in dawn hi a hun tawk an naw maw? Ieng leiin am tui danghai chu kein in pal nu ding a na?
19. Ka beramruolhai chun kea in sir sop hnung hlo chu petin, in pal nu ta hnung tui bal chu an dawn ding am a ni?
20. "Chuleiin, Lalpa PATHIEN chun an kuomah hieng hin a tih: Ngai ro, keima ngeiin beram thau le beram cher inkar thu chu rel ka tih.
21. A hrat nawhai in nek per a, in nor leng a, in kiin in sik a, in phin dar hlak.
22. Kei ruok chun ka beram ruolhai chu hum ka ta, tu khomin suom ta naw ni hai. Beram le beram inkar chungthu chu keiman rel ka tih.
23. Anni enkoltu dingin berampu pakhat, ka siehlaw Davida ang chu sieng ka ta, ama chun enkol a ta, an vengtu ning a ta, anni chu chawm a tih.
24. Kei LALPA hi an Pathien ning ka ta, ka siehlaw Davida ang chu an chunga hotu ning a tih ti hi kei LALPA thu suok chu a nih.
25. "Chun, anni leh inremna thuthlung siem ka ta, sakolhai chu a rama inthokin sukbo ka ta, thlalera hai khom him takin cheng an ta, ramngaw hnuoia khom ngaingam takin in bor bor thei tang an tih.
26. Anni chu mal sawm ka ta, an vela tlanghai khom mal sawm bok ka tih. A hun takah ruo insurtir ka ta, malsawmna ruopui sur a tih.
27. Rama thinghai chun ra insuong an ta, hnuoiin ra insuong a ta, a rama chenghai chu him an tih. An ringkolhai suktliekpek a, bawia siemtuhai kuta inthoka ka san suok tawl pha chun kei hi LALPA chu ka nih ti hung hre tang an tih.
28. Hnam danghaiin rok ta naw ni hai a, ramsa kolhaiin se ta bok naw ni hai a, him takin khawsang an ta, tu khomin sukti ta naw ni hai.
29. Thlai thatna hmuna mi hril chu peng ka ta, a ram sungah tam tuor ta naw ni hai a, hnam danghai hmusitna tuor ta bok naw ni hai.
30. Chu pha chun kei, LALPA an Pathien hi an kuomah ka um ti le Israel sungkuo hi ka mihai an nih ti hung hre tang an tih ti hi Lalpa PATHIEN thu suok a nih.
31. Nangni ka beramhai, ka ran tlatna hmuna beramhai hi ka mihai chu in na, keima hi in Pathien chu ka nih' ti hi Lalpa PATHIEN thu suok a nih" tiin.
←  Ezekiel (34/48)  →