←  Ezekiel (33/48)  →
1. LALPA thu chu ka kuomah a hung tlung a.
2. "Mihriem naupa, i hnam chanpuihai kuomah hieng hin thu hril rawh: 'A ram sunga indona ka'n tlungtir ding pha leh, mipuihaiin anni laia mi pakhat ralvengtuah ruot sien la,
3. ama chun ral hung a hmu pha leh mipui inralringna dingin tawtawrawt a mut ding a nih.
4. Tu khom tawtawrawt ri chu hrea, poisa nawtu chu ral kuta a lo thi a ni khomin a thisen maw chu ama chungah tlang a tih.
5. Tawtawrawt ri chu a hriet a, a poisak naw leiin a thisen maw chu amain a phur a nih; poisa sien chu thi pumpel thei a tih.
6. Amiruokchu, ralvengtu chun ral hung a hmu a, mipui inralring theina dinga tawtawrawt a mut si naw chun, ralin mi pakhat khom that sien, chu mi chu ralvengtu suol leia thiah ngai ka ta, a thisen phuba chu ralvengtu chungah lang ka tih.
7. "Chuong ang chun nang mihriem naupa, Israel sungkuo ta dingin ralvengtuah ka ruot che a, chuleiin ka thu suokhai hi ngaithla la, an inralringna dingin hril tawl rawh.
8. Chun, keiin mi rilo chu thi ngei ngei a tih ti lang, inlamlet a, a hringna hum dinga i hril si naw chun mi rilo chu a suolnaah thing a ta, a thisen phuba chu i chungah lang ka tih.
9. Amiruokchu, mi rilo chu inlamlet dingin i hril a, a poisa si naw chun a suolnaah thing a ta, nang ruok chu fihlim i tih.
10. "Chun, mihriem naupa, Israel sungkuohai kuomah hieng hin hril rawh: 'Ei bawsietnahai le suolnahai chun an mi del a, chuonghai lei chun ei ongrop zo tah a nih. Hieng ringot hin chu iengtin am ei hring zo ding a na?' in ti hlak a.
11. Chuleiin an kuomah, 'Mi rilo thi hin lawmna hrim ka nei naw a, inlamleta a dam hi ka lawmna lem chu a nih ti hi kei Lalpa PATHIEN hin ka hringna salin ka hril. Chuleiin, inlamletin, in nun dan suola inthokin kir ro! Aw Israel sungkuohai, ieng leiin am in thi el ding a na?' tiin hril tawl rawh.
12. "Mihriem naupa, i hnam chanpuihai kuomah hieng hin hril rawh: 'Mi fel felna chun a bawsiet niah san him naw ni a, mi rilo ritlona chun a lamlet niah sukse bok naw nih. Mi felin a bawsiet chun a hmaa a felna leiin hring naw nih.
13. Mi fel kuomah, 'Hring ngei i tih' ti ka hril a, a felna ringa thil suol a thaw chun a thil tha thaw tah pakhat khom hriet zing ni naw ni a, a thil suol thaw lei chun thi lem a tih.
14. Chun, mi rilo kuomah, 'Thi ngei i tih' ti ka hril a, a suolna inlamlet a, thil tha le indik thaw a,
15. a thil inpuktir leia dakhama a lak chu pe kir a, a thil inruk thak kir a, hringna petu dan thusuokhai chu zawm a, thil tha lo ieng khom thaw loa a um chun hring ngei a ta, thi naw nih.
16. Suol a lo thaw tahai po po khom hriet zing ni ta naw nih. Thil tha le indik a thaw leiin, matheiloin hring a tih.
17. "Amiruokchu, i hnam chanpuihaiin, 'LALPA thaw dan hi a felfak nawh' an ti a, sienkhom anni thaw dan a nih a felfak naw lem chu.
18. Mi felin felna lampui nghatsana suol a thaw chun thi ngei a tih.
19. Mi riloin a ritlona nghatsana thil tha le indik a thaw chun, a thilthaw leiin hring a tih.
20. Chuong sa khom chun, aw Israel sungkuohai, 'LALPA thaw dan hi a felfak nawh' in la ti zing tho. Mi tinin in thilthaw dan ang peiin in chungthu ka rel ding a nih' tiin hril rawh" a ta.
21. Babulon sala kan intanga inthoka kum sawm le pahnina, thla sawmna, ni nganaay chun Jerusalema inthoka hung tlan suok mi pakhat a hung a, "Khawpui chu an lak tah!" tiin a mi hung hril a.
22. Chu mi hung tlung ni zan tieng chun ka lu chungah LALPAN kut a hung innghat a; a tuk zingkara mi tlan suokin a mi hung hmu hma chun ka bau a mi hongpek a, ka hung tong thei ta a.
23. Chun, LALPA thu chu ka kuomah a hung tlung a.
24. "Mihriem naupa, Israel rama khawpui tlu ram hnunga chenghai chun, 'Abraham chu makhat chauh khom ni sien ram pumpui a pek a, eini ruok chu tam tak ei ni ta a, ram chu ei rochung dingin a mi pek ngei chu a lo nih' an ti a.
25. Chuleiin an kuomah, 'Sa thisen in fak a, milem biekna tieng mit in inlen a, thisen in insuo si chun nangnin ram chu in chang dinga maw?
26. In kawlhnam in ringsan a, thil tirdakum tam tak in thaw a, in tuolbawmhai nuhmei in sukporche a. Chuong sa khom chun ram chu in hluo ding maw? ti hi Lalpa PATHIEN thu suok a nih' tiin hril rawh.
27. "Hieng ang hin an kuomah hril rawh: 'Lalpa PATHIEN chun hieng hin a tih: 'Hmun ram ta hnunga chenghai chu kawlhnamin thing an ta, ram hnuoia umhai chu sakolhai fak zo dingin peng ka ta, kul nghet le puka umhai chu hripuiin thing an tih ti hi kei Lalpa PATHIEN hin ka hringna salin ka hril.
28. Ram chu rausan ramah siem ka ta, an hratna an suong em em hlak chu suktawp ka ta, Israel tlanghai chu rausan an ta, tu khomin sir ta naw ni hai.
29. Thil tirdakum tak tak an thaw leia a ram ka suktlaran pha chun LALPA chu ka nih ti hung hre tang an tih.
30. "Chun, nang, mihriem naupa, i mihai chun kul bang bul le kotkhar bula hai an intuokna taphotah i chungchang thu an hril nak nak a, mi tinin an unauhai kuomah, 'Hung ro, LALPA thu a hril chu va ngaithlang ei tiu' an tih.
31. An thaw dan pangngaiin a hon honin i kuomah hung an ta, ka mihai ni awm takin i hmaah inthung an ta, i thu ngaithlang an ta, sienkhom a takin zawm chuong naw ni hai. An bau chun an inpek zozie hril an ta, an lungril ruok chun hlepruka hausak dan ringot a nih an ngaituo.
32. A nih, rawl mawi taka hla lenglawng sak thiem le rimawi tum thiem tak ang lekah an ngai che a nih. I thuhai chu an hriet a, sienkhom anniah a takin hmang an tum nawh.
33. Hieng thilhai po po hi a hung tlung pha, a hung tlung ngei bok ding a na, anni lai zawlnei a lo um takzet a nih ti hung hre chauh an tih' a tih, tiin hril tawl rawh" a ta.
←  Ezekiel (33/48)  →