←  Ezekiel (32/48)  →
1. Babulon sala Jehoiachin intanga inthoka kum sawm le kum hnina, thla sawm le thla hnina le ni khatnaw chun LALPA thu chu ka kuomah a hung tlung a.
2. "Mihriem naupa, Aigupta lal Faraw sunna hla inzawt la, a kuomah hieng hin hril rawh:"Hnamhai lai chun nang chu,Sakeibaknei angin i'n ngai a,Tuipuiah dragon angin i'n ngai;I chengna va hnarah inper velin,I kein tui i chok phul buon buon a,Vadung tuihai i suknu zo.
3. "Lalpa PATHIEN chun,I chungthu hieng hin a tih:'Lena mantu ding chein,Mi tam tak hung tir ka ta,Lenin khai suok an ti che.
4. Khawmuolah pei ka ti che a,Khaw hnawmah pei suok ka ti che,Chungleng vatehai po po chu,A tlan ding che'n hung tir ka ta, Hnuoia ramsahai po poin,Fain pot chen neng an ti che.
5. I ruong hmon chu tlang le ruomah,The dar phengphung ka tih.
6. I chengna muol le tlangah,I thisen inluongtir ka ta,Kor tin le ruom tinhai chu,I ruongin hnaw sip ka tih.
7. Ka sukchimit pha che chun,Vanhai khi inkhum ka ta,Arasihai sukthim ka ta,Nisa chu sum inhlietir ka ta,Thlain var insuo naw nih.
8. Van sanga var po pohai,I chungah sukthim ka ta,Thimin i ram bawm a tih,Lalpa PATHIEN chun a tih.
9. I siet ni ka'n tlun pha chun,I hriet ngai lo rama chen,Mi tam tak chi-ai an tih.
10. Mihai pangzat huoi huoiin,An hmaah siem ka ti che a,Ka kawlhnam ka vilik pha,Nangma leiin lalhai khom,Thlabarin inthin an tih.I siet ni ka'n tlun pha chun, Mi tinin nun chan inlauin,Tiin inthin hawp an tih.
11. "Lalpa PATHIEN chun hieng hin a tih:'Babulon lal kawlhnam chun,A hung bei ding che a nih.
12. Mi ralhranghai kawlhnamah,I mihai intluktir ka tih,Hnam tibaium tawphai kutah.Aigupta ropuina suksein,A mipuihai po po chu,Ka sukbohmang ding a nih.
13. Tui tam tak kama tla,A ran ruolhai sukbo ka ta,Mihriem ke le ran kein,Tui chu pal nu ta naw nih.
14. Tuihai chu sukvar ka ta,An vadung chu hriek angin,Luong del del ta lem a tih,Lalpa PATHIEN chun a tih.
15. Aigupta suktlaran a,A iengkim sukram vong a,A chenghai ka sukhlum pha,Kei hi LALPA chu ka nih,Ti hi hung hre tang an tih,'tiin.
16. "Hi hi a sunna hla ding chu a nih. Hnam tin naunuhai chun hi tap hla hi insamin, Aigupta le a mihai chu tang an tih' ti hi Lalpa PATHIEN thu suok a nih.
17. Babulon sala Jehoiachin inlala inthoka kum sawm le kum hnina, ni sawm le ni nganax chun LALPA thu chu ka kuomah a hung tlung a.
18. "Mihriem naupa, Aigupta ruol chu tap khum rak rak la, ama le hnam ropui tak tak naunuhai chu khuorkhuruma liem thla tahai kuom tieng hnuoi rilah thon thla tawl rawh.
19. An kuoma chun, 'Mi nekin ditsak i hlaw bik ding maw? Fe thla la, sertan lohai lai khun zu zal rawh'tiin hril rawh.
20. Kawlhnama thathai lai chun zal veng an tih. Kawlhnam chu phawi a ni ta a; a mihai rawi leh hnuk hmang rawh.
21. Thlan khur nghaka um thuoitu hrathai chun Aigupta le a thloptuhai chungthu chu hrilin, 'An hung thla a, kawlhnama that, sertan lohai lai an zal' la ting an tih.
22. "Thlana chun Asuria chu a sipaihai po po leh a um a, kawlhnama a mi thathai thlan chun a'n huol vel a.
23. An thlanhai chu khuorkhurum inthuk taka um a na, a sipaihai thlan chun a thlan chu an inhuol vel a. Mihring rama thlabarna siem hlaktuhai po po chu kawlhnama that vong an nih.
24. "Chu taka chun Elam khom chu a zal ve a, a mihai thlanin a'n huol vel a. An reng chun kawlhnama that vong an nih. Anni chu mihring rama thlabarna siem hlaktu le sertan lohai laia zal dinga khuorkhurum monga fe thla an nih. Thlana chun khuorkhuruma liem tahai leh an muolphona chu an zalpui a.
25. Thata umhai lai chun ama le a rawihai zalna ding chu an siempek a. An reng chun sertan lo, kawlhnama thi vong an nih. Mi hring rama thlabarna siemtu an ni leiin, thathai lai inzaltirin, khuorkhuruma liem tahai leh an muolphona chu an phur tlang a nih.
26. "Mesek le Tubal hai khom chu taka chun an rawihai leh an zal a; an rawihai thlanin an thlan chu a'n huol vel a. An rengin sertan lo an na, mi hring ramah thlabarna an siem hlak leia kawlhnama thi vong an nih.
27. Anni chu tiena sertan lo mi ralhrat tlu tah, an ralthuomhai leh thlanah liema, an phawin an ruhai inkhuma, an kawlhnam lukhama zal tahai le chun hmun khatah an zal an naw am a ni? Hieng ralhrathai titamumna chun mihring ram lo inhuol vel hlak sien khom, anni hremna chu an lu chungah a tla ta si a.
28. Nang khom aw Faraw, kawlhnama that, sertan lohai lai chun bong rem rumin zal veng i tih.
29. "Chu taka chun Edom khom a lalhai le hotuhai po po leh a um ve a, an hrat hle hlaka chu kawlhnama thihai lai an rengin an inzaltir a, sertan lo, khuorkhuruma liem tahai lai chun an sie a nih.
30. "Chu taka chun hmar tienga hotuhai chu an rengin, Sidon mihai po po, thathai laia liem thla tahai le chun an um a, an hratnain mi sukthlabar hlak sienla khom kawlhnama thi, sertan lohai lai muolpho takin an zal a, khuorkhuruma fe tahai leh an muolpho tlang tah a nih.
31. " 'Farawin a mihai po po, ama le kawlhnama that tah, a sipai ruol po po leh, a lo hmu pha chun thlamuong pha hiel a tih' ti hi Lalpa PATHIEN thu suok a nih.
32. Faraw le a rawihai chu mi hring rama thlabarna inlengtir dinga ka hmang ni hai sien khom sertan lo, kawlhnama thihai lai chun zal veng an tih' ti hi Lalpa PATHIEN thu suok a nih" a ta.
←  Ezekiel (32/48)  →