Ezekiel (30/48)  

1. LALPA thu chu ka kuomah a hung tlung a.
2. "Mihriem naupa, hril lawk la, 'Hieng hin Lalpa PATHIEN chun a tih' tiin hril rawh:'E khai! Chungrikna ni tak hi chu aw!'Tiin tap khek chel chul ro.
3. Chu ni chu a hnai ta a,LALPA ni chu a hnai tah,Sumpui hung zingna ni ding,Hnamhai sietna ni ding chu.
4. Aigupta chungah chemsen inlengin,Lungngainan Ethiopia tlak buok a tih: Aiguptaah ruong zal thluk a,A hausaknahai tol hmangpek a,A lungphumhai a chim ni chun.
5. Ethiopia, Put, Lydia le Arabia,Libya le thuthlung rama cheng po po,Aigupta leh chemsenin tlung an tih.
6. LALPA chun hieng hin a tih:Aigupta inkoppuihai po po khom,An rengin tlu vong an ta,A tha hrat a suong hlak chu,Chauin hung zur thlang a ta,Migdol a'nthok Aswan chenin,Kawlhnamin tlu vong an tih'Lalpa PATHIEN chun a tih.
7. Rausana um ramhai lai,Ram rausan ni veng an ta,An khawpui rausanhai khom,Khaw chul ram chang tang an tih.
8. Aigupta ka raw phaa,A thangpuituhai ka rawt ram pha,LALPA chu ka nih ti hrieng an tih.
9. "Chu ni chun ngai tha deua um Ethiopia mihai chu thawng tho dingin zuolkohai chu longin suok an tih. Aigupta siet tuok ni chun beidongnan hung nang tawl a tih; a hung tlung ngei ding a ni si a.
10. "Lalpa PATHIEN chun hieng hin a tih: Babulon lal Nebukadnezzar kut hmangin,Aigupta hausakna chu suktawp ka tih.
11. Hnamhai laia tibaium tak,Ama le a sipai ruolhai chu,Ram sukse dingin hung an ta,Aigupta lakah chemsen inlen an ta,A ram chu ruongin sip a tih.
12. Nile vadung hnarhai po po,A rengin sukkang ka ta,Ram chu mi suolhai kuomah,Ka zor hmang vong ding a nih.Ram dang mihai kut hmangin,A ram chu sukram ka tih,A sunga um po po leh, ti hiKei LALPA hin ka puong a nih.
13. "Lalpa PATHIEN chun hieng hin a tih:A lembiekhai suksieng ka ta,Memfis-aq a milemhai po po khom,Sukbohmang vong ka tih.Aiguptaah lal um ta nawng an ta,A ram pumah titna inleng a tih.
14. Aigupta chuonchung sukram ka ta,Zoanr chu meiin raw hmang ka ta,Thebes khom hrem bok ka tih.
15. Aigupta kulpui Pelusium chungah,Ka lungsenna buok khum ka ta,Thebe ruol chu rawt tawl ka tih.
16. Aiguptaah mei insuong ka ta,Pelusium chu na tuorin inkon a ta,Thebe chu thlipuiin nuoi a ta,Memfis chu buoinan tlung chil a tih.
17. Heliopolis le Bubastis tlangvalhai chu,Kawlhnamin tlu phung an ta,A khaw mihai chu salah thuoi an tih.
18. Aigupta ringkol ka suktliek pha,A chapopui hratna ka suktawp pha,Tahpanhest chan chu inthim a tih;Ama chu sumpuiin chim khum a ta,A khaw mihai chu salin thuoi an tih.
19. Chuong ang chun Aigupta chungah,Hremna chu intlungtir ka ta,LALPA chu ka nih ti hrieng an tih.
20. Babulon sala lal Jehoiachin intanga inthoka kum sawm le kum khatna, thla khatna le ni sarinau chun LALPA thu chu ka kuomah a hung tlung a.
21. "Mihriem naupa, Aigupta lal Faraw ban chu ka suktliek ta a, a hung dam nawk theina dinga tuom a ni naw a, kawlhnam chel thei khopa hung hrat nawk thei dinga ngar khuo a ni bok nawh.
22. Chuleiin, Lalpa PATHIEN chun hieng hin a tih: Ngai rawh, Aigupta lal Faraw chu ka khing a nih. A ban tliek nawna tieng khom suktliek ka ta, kawlhnam chel thei ta naw nih.
23. Aigupta mihai chu hnam tin lai sukdar ka ta, ram tinah deng dar ka tih.
24. Babulon lal ban chu sukhrat ka ta, a kutah ka kawlhnam inchawitir ka ta, Faraw ban ruok chu vaw bong ka ta, a hmaa chun thi suola na tuor inrum angin inrum a tih.
25. Babulon lal ban chu sukhrat ka ta, Faraw ban chu zur tlep a tih. Babulon lal kutah ka kawlhnam sie a, Aigupta lakah a vilik pha chun, LALPA chu ka nih ti hre tang an tih.
26. Aigupta mihai chu hnam tin lai sukdar ka ta, ram tinah um dar an tih. Chu pha chun LALPA chu ka nih ti hrieng an tih" tiin.

  Ezekiel (30/48)