←  Ezekiel (3/48)  →
1. Chun, ka kuomah, "Mihriem naupa, i hmaa lekhabu ziel hi fa rawh; chu zoah fe la, Israel sungkuohai kuomah thu va hril rawh" a ta.
2. Chuongchun, ka bau ka ka a, lekhabu ziel chu a mi'n faktir a.
3. Ama chun ka kuomah, "Mihriem naupa, lekhabu ziel ka pek che hi lem la, khop takin fa rawh" a ta. Chuong chun ka fak a, ka baua chun khuoizu angin a thlum a.
4. Chun, ama chun ka kuomah, "Mihriem naupa, tu hin fe la, Israel sungkuohai lai ka thu va hril rawh.
5. Tong dang le tong harsa hmang mi, an tong i hriet thiem nawhai kuoma tir i ni naw a, Israel sungkuohai laia tir i ni lem hih.
6. Chuong hnam danghai kuoma tir chu ni la, lo ngaithlang an ti che.
7. Israel sungkuohai ruok chun an ngaithlak naw ding che a nih, kei an mi ngaithlak nuom naw leiin. Israel sungkuohai po po chu mi lungril khau le lulul an nih.
8. Anni ang boka tawk khir le lungril khauin siem ka ti che.
9. I chal chu meitawk lung neka chang, lung chang tak angin siem ka tih. Hel hmang sungkuo ni hai sien khom, anni chu ti der naw la, an vaupumah zam naw rawh" a ta.
10. Chu baka chun ka kuomah, "Mihriem naupa, fimkhur takin ngaithla la, ka thu hril po po che hi i lungrilah khum rawh.
11. Tu hin i chipui saltanghai kuomah fe la, an ngaithlak ta'm, an ngaithlak naw ta'm, an kuomah, 'Lalpa PATHIEN chun hieng hin a tih' tiin hril tawl rawh" a mi ti a.
12. Chuongchun, thlarauin a mi chawi kang a, ka hnung tieng chun thum bul bula thu insamin, 'A chengna hmuna chun LALPA ropuina chu malsawmin um raw se' an ti ri ka hriet a.
13. Thilhringhai thla zap inkhak ri le an bula um tawlailir ri le thil inrum ri dur dur ka hriet bok a.
14. Chu zoah thlarauin a mi chawi kang a, a mi lak hmang a, lungsen tak le rin tak pumin ka fe a, LALPA kut hrat chu ka chungah a um si a.
15. Kebar vadung kama Israel saltanghai umna Tel Abib chu ka hung tlung a, chu hmuna chun anni lai hrilhai takin ni sari zet ka'n thung ve a.
16. Ni sari zoa chun ka kuomah LALPA thu a hung tlung a.
17. "Mihriem naupa, Israel sungkuohai vengtu dingin ka ruot che. Ka thu hril hi ngaithla la, anni chu zilhaupek rawh.
18. Mi rilohai kuomah, 'Thi ngei in tih' ti lang, inlamlet a, an suolna chu bansan a, an hringna chu hum dinga i zilhau tawl si naw chun an ritlona chu thipui an ta, an thina maw chu i lakah phut ka tih.
19. Amiruokchu, mi rilohai chu i zil lawk a, ritlona le suolna lampuia inthoka inlamlet nuom loa an suol lui pei a ni ruok chun, an suolna chu thipui an ta, an thina maw chu phur naw ti nih.
20. "Chun, mi felhaiin felna lampui bansanin thil tha naw an thaw a, an hmaah dalkham ka lo kham bok chun, chutaka chun tlu hlum an tih. Zilhauna i nei naw leiin an suolnaa chun thing an tih. Thil fel an lo thaw tahai kha hriet zing ni ta naw ni a, an thisen maw ruok chu i lakah phut ka tih.
21. Amiruokchu, mi felhai chu suol lo dinga i zilhau a, i zilna chu poisaa thil suol thaw loa an um chun hring ngei an ta, nang khomin tuor naw ti nih" a ta.
22. Chu taka chun LALPA kut chu ka chungah a um a. Chun, ka kuomah, "Tho la, phaizawlah fe la, chu taka chun inbiekpui ka ti che" a mi ti a.
23. Chuongchun, ka tho a, phaizawla chun ka fe a. Chu taka chun Kebar Vadung kama ropuina ka hmu ang bok kha LALPA ropuina chu ka hmaah a hung ngir a, hnuoiah ka bokkhup a.
24. Thlarau chu keimaah a hung lut a, ka kein a mi'n ngirtir a, a mi biek a, "Fe la, i inah inkhar khum rawh.
25. Nang mihriem naupa, anni lai leng suok thei ta lo dingin hrui hruolin an khuop ding che a nih.
26. I lei chu i dangah inkoptir ka ta, tong thei loin um i ta, hel hmang sungkuo ni hai sien khom kawk thei ta naw ti nih.
27. I kuomah thu ka hril pha ruok chu i bau inphongtir ka ti che a, an kuomah, 'Lalpa PATHIEN chun hieng hin a tih: A ngaithlain ngaithla hai sien, a ngaithla naw chun ngaithla naw el raw hai se; hel hmang sungkuo an ni si a' tiin i hril ding a nih.
←  Ezekiel (3/48)  →