←  Ezekiel (29/48)  →
1. Babulon sala lal Jehoiachin intanga inthoka kum sawmna, thla sawmna le ni sawm le ni hninao chun LALPA thu ka kuomah a hung tlung a.
2. "Mihriem naupa, Aigupta lal Faraw chu hmason la, a chungthu le Aigupta ram po po chungthu ding hrilpek rawh.
3. Hieng hin hril rawh: 'Lalpa PATHIEN chun hieng hin a tih:Nang Aigupta lal Faraw,Vadung suoa rulpui hreu bok hlak,Ka khing che a nih. "Nile vadung hi ka ta a na,Keimain ka siem a nih"I ti rop hlak a ni kha!
4. I khakah ngakuoiin kuoi ka ti che a,I phuhlipah nga inkopptir ka ta,I phuhlipa kai nga po po leh,Vadunga inthok pot suok ka ti che.
5. Nang le i vadunga nga po po,Thlalerah maksan ka ti cheu. Ram palailengah tla dar in ta,Rut khawm ni naw ti niu a,Ramsa le chungleng vatehaiTlan dingin pe suok ka cheu.
6. "Chu pha chun, Aigupta rama cheng po poin kei hi LALPA chu ka nih ti hung hre tang an tih. Israel sungkuo ta dingin luong hmol i lo ni hlak a.
7. An hang thun che leh i por ruop a, an dar an her pha a; an hang ringsan tum che leh i tliek buk a, an zang ru a'n pelsol a.
8. "Chuleiin, Lalpa PATHIEN chun hieng hin a tih: Nangma bei dingin kawlhnam leh hung inthok ka ta, i mi le sahai rawt ram vong ka tih.
9. Nile vadung hi ka ta a na, keima siem a nih' i ti hlak leiin, Aigupta chu rausan ram inchangtir ka ta, chu pha chun LALPA chu ka nih ti hung hre tang an tih.
10. Chuleiin, nang le i vadunghai hi ka do cheu a, Migdol-a inthoka Aswan chen le Ethiopia ramri chenin sukram vong ka ta, rausan ramah siem ka tih.
11. Kum sawmli sung chu mihriem khom ramsa khomin sir naw ni hai a, hluotu um naw ni hai.
12. Aigupta chu rausan ramah siem ka ta, a khawpui chu kum sawmli sung hluotu um loin tlu ram a tih. Aigupta mihai chu hnam tin lai hnot dar ka ta, ram tinah indar an tih.
13. Chuong sa khom chun, Lalpa PATHIEN chun hieng hin a tih: 'Kum sawmli a ral pha Aigupta mihai chu an tlan darna hnamhai laia inthok chun thuoi khawm nawk ka tih.
14. An saltangnaa inthokin thuoi kir ka ta, an pi le puhai ram, Aigupta chuonchungah thuoi kir ka ta, chu taka chun tlawm takin inlal an tih.
15. Lalram po po laia a mong dap ning a ta, hnam danghai chungah inlek ta ngai naw ni a, hnam dang chunga thu nei nawk ta lo dingin hrat naw takin siem ka tih.
16. Israelhai ringsan ni ta loin, thangpuitu dinga Aigupta tieng an ngha zata an suolzie lo inhriet nontirtu hung ni ta lem a tih. Chu pha chun Lalpa PATHIEN chu ka nih ti hung hre tang an tih a tih' ti rawh" tiin.
17. Babulon sala lal Jehoiachin intanga inthoka kum sawmhni le kum sarina, thla khatna le ni khatnap chun LALPA thu chu ka kuomah a hung tlung a.
18. "Mihriem naupa, Babulon lal Nebukadnezzar chun ngor taka Tura bei dingin a sipaihai a nor rak a, an lu kol rak khop le an dar vunhai inhlip neng nung khopin an bei a, sienkhom ama le a sipaihaiin Tura an beinaa inthokin hlawkna ieng khom an hmu si nawh.
19. Chuleiin, Lalpa PATHIEN chun hieng hin a tih: Aigupta ram chu Babulon lal Nebukadnezzar kutah peng ka ta, a hausaknahai chu hawn a tih. Rok a ta, a rama thil umhai chu rallak sumah lang a ta, chu chu a sipaihai hlawah peng a tih.
20. Ama le a sipaihaiin ka rong an bawl leiin Aigupta ram hi lawmmanah ka pek ding a nih ti hi Lalpa PATHIEN thu suok a nih.
21. "Chu ni chun Israel sungkuo chu sukhrat ka ta, an hmaah thu inhriltir ka ti che a, chu pha chun LALPA chu ka nih ti hung hre tang an tih" tiin.
←  Ezekiel (29/48)  →