←  Ezekiel (26/48)  →
1. Babulon sala lal Jehoiachin intanga inthoka kum sawm le kum khatna, chu thla ni hmasa takai chun LALPA thu chu ka kuomah a hung tlung a.
2. "Mihriem naupa, Tura mihai chun Jerusalem siet thuah, 'Eheu! sak ram le insumdawng tuona kotsuo Jerusalem chu a se tah ie! A siet tak leiin keinin hmuingil pha hlauh kan tih' an ti vel a.
3. Chuleiin, Lalpa PATHIEN chun hieng hin a tih: Aw Tura, ngai rawh, ka do che a nih. Tuipui fawn invor tung angin nangma beitu ding hnam tam tak hung tir ka tih.
4. Tura kul banghai chu nor chim an ta, a kulbing sanghai chu sukchim an ta, a tlu sophai po po phit fai vong an ta, lungpui fil ringotin siem ka tih.
5. Kei Lalpa PATHIEN hin ka hril tah angin, ngamantuhai len zar hulna hmunah inchang a ta, hnam danghai rok ramin um a tih.
6. Lobuka umhai po po chu kawlhnamin rawt ram an tih. Chu pha chun LALPA chu ka nih ti hung hre tang an tih.
7. "Lalpa PATHIEN chun hieng hin a tih: 'Tura beitu dingin hmar tienga inthokin Babulon lal Nebukadnezzar, lalhai lal chu hung tir ka ta, a sakor hai, tawlailir hai, sakor chungchuong mi hai le sipai tam tak leh hung a tih.
8. A kam ram lobuka chenghai po po chu kawlhnamin rawt ram a ta, inhuol a ti che a, muol pawng siem a ta, i kul chenin thamte dawng a ta, a phaw-in nek a ti che.
9. I kul banghai chu a sut hongnain sut hong a ta, a hriemhrei chawiin i kulbing sanghai chu sukchim a tih.
10. A sakorhai chu an tam em leiin an pilvut pal khuk chun vur khum a ti che. Miin kul bang vera khuoa a lut anga i kotkhara an hung lut hum hum pha chun indo sakor ruol inhnawt ri le tawlailir tlan ri chur chur lei chun i kul banghai chu inhning dur dur a tih.
11. I kotthler chu a sakorhaiin chil phit dur an ta; i mihai chu kawlhnamin that an ta, i lungphun detdo tak takhai chu hnuoiah tlu sop a tih.
12. I hausaknahai chu rallak sumah hawn a ta, i sumdawng thuomhnawhai chu rok a ta, i bang sukchim a ta, in i suong em em hlak hai chu thiek a ta, lung le thing le thil tlu hnophai chu tuipuiah pei a tih.
13. I hla sak ri suktawp ka ta, i tingtang tum ri hrim hriet ni ta ngai naw nih.
14. Lungpui fil ringotah inchangtir ka ti che a, len zar hulna hmunah inchang i tih. Indin ni nawk ta naw ti nih ti kei LALPA hin ka hril ta si a' ti hi Lalpa PATHIEN thu suok a nih.
15. "Hi hi Tura chungthua Lalpa PATHIEN hril chu a nih: 'I sunga mi an thathai, hliem tuor inrum ri le i tluk riin tuipui kama ramhai a nghor nghing pha chun an inthin hawp naw ding maw?
16. Chu pha chun chuong rama lalhai po po chu an lalthungphaa inthoka tumin, an silpuonhai the thlain, an silfen thuicheihai hlip an ta, thlabarna puon sil an ta, hnuoiah inthung biel an ta, i siet dan chu pangzatin inthin hlop hlop an tih.
17. I lusunna hla ding phuok an ta, hieng ang hin tang an ti che:Aw nang khawpui hmingthang,Tuipuia fak zonghai chengna,I siet dan a va rapthlak de!Nang le i sunga chenghai chu,Tuifinrieta thuneitu niin,Mi tisim in ni hlak vei le khan!
18. I hang tluk rum ni khan chu,Vakama chenghai inthin hawpin,I tluk sop nuoi chu pangzatin,Thlierkarhai an ai inchi'tiin.
19. Lalpa PATHIEN chun hieng hin a tih: Khawpui rausan ta hnung, tu khom hluo lo anga ka siem pha che chun, tuifinriet li mongah inpiltir ka ti che a, tui tam takin chim pil a ti che.
20. Tiena tlanga mihai lutna khur inthuk takah thlak ka ti che a, hmakhawsanga tlu ram tah hnuoia zalhai angin hnuoi pilrilah anni leh inchengtir ka ti che a, mihring ramah hung kirin i hmun hluo ta ngai naw ti nih.
21. Tawpna rapthlak i chungah intlungtir ka ta, boral song tang i tih. Mihaiin zong an ti che a, sienkhom hmu ta naw top an ti che' ti hi Lalpa PATHIEN thu suok a nih.
←  Ezekiel (26/48)  →