←  Ezekiel (25/48)  →

---

1.

LALPA thu chu ka kuomah a hung tlung a.

2.

"Mihriem naupa, Amon mihai tieng ngha la, an chungthu ding hrilpek rawh.

3.

Lalpa PATHIEN thu hi lo ngaithla dingin hieng hin hril rawh: Hi hi Lalpa PATHIEN hril chu a nih: Ka tempul an suosam lai le Israel ram an sukram lai le Judai ram mipuihai sala an thuoi lai khan, 'Eheu!' tia in lo diriem leiin,

4.

khawsak mihai kutah ka pek suok ding cheu a nih. In ramah umhmun khuorin an puon inhai zar an ta, in thei rahai le in ranhai nenetui chu tlanin dawn an tih.

5.

Raba khuo chu sanghawngseihai tlatna hmunah siem ka ta, Amon thlahai ram chu beram ruol bok khawmna hmunah siem bok ka ta, chu pha chun kei hi LALPA chu ka nih ti hre tang in tih.

6.

Lalpa PATHIEN chun hieng hin a tih: Israel ram chu kut ben khum a, ke tet khum a, in lungril po poa a sietna chungah in lawm leiin,

7.

in chungah kut inlet ka ta, hnam danghai rallaka hawn dingin inroktir ka ti cheu. Hnama tiem tlak loah siem ka ti cheu a, ram nei loin sukchimit ka ti cheu. Ka suksiet pha cheu LALPA chu ka nih ti hre tang in tih.

8.

"Lalpa PATHIEN chun hieng hin a tih: 'Moab le Seir chun, "Entu, Juda sungkuo chu hnam dang ang char an nih" an ti leiin,

9.

Moab ramria a ram huoltu khawpui Beth Jesimot hai, Baal Meon hai le Kiriathaim hai, a ram sukropuitu khuohai khom thang vongin,

10.

Moab ram le Amon thlahai ram chu khaw sak rama umhai ta dingin peng ka ta, Amon thlahai chu hnamhai laia hriet zing ni ta naw ni hai.

11.

Moab ram chungah hremna intlungtir bok ka tih. Chu pha chun LALPA chu ka nih ti hre tang an tih.

12.

"Lalpa PATHIEN chun hieng hin a tih: 'Edom chun Juda sungkuo chungah phuba a lak leiin nasa takin a suksuol a nih.

13.

Chuleiin, Lalpa PATHIEN chun hieng hin a tih: Edom chungah kut inlet ka ta, a mi le sahai that ka ta, a ram chu suktlaran ka ta, Temana inthoka Dedan chenin kawlhnamin sam tawl ka tih.

14.

Ka mi Israelhai hmangin Edom lakah phuba lang ka ta, ka lungsen inling dan ang peiin soisak an ta, phuba ka lak a nih ti hre tang an tih ti hi Lalpa PATHIEN thu suok a nih.

15.

"Lalpa PATHIEN chun hieng hin a tih: 'Filistinhai chun tiena tlanga inthoka an lo hmelmakna chu pai zinga suksiet nuomna lungril neia Juda chungah phuba an lak leiin,

16.

Lalpa PATHIEN chun hieng hin a tih: Ngai rawh, Filistinhai chunga chun kut ka'n let tep a, Keret khaw mihai chu rawt ram vong ka ta, tuipui kama chenghai khom sukbohmang vong ka tih.

17.

An chungah na takin phuba lang ka ta, lungsenin hrem ka tih. An chunga phuba ka lak pha chun, LALPA chu ka nih ti hre tang an tih," a ta.

---

←  Ezekiel (25/48)  →