←  Ezekiel (24/48)  →
1. Babulon sala lal Jehoiachin intanga inthoka kum kuona, thla sawmna le ni sawma,h chun LALPA thu chu ka kuomah a hung tlung nawk a.
2. "Mihriem naupa, voisun, voisun tarik ngei hi inchik rawh, Babulon lalin Jerusalem a'n huol tan ni a nih.
3. Hi hel hmang sungkuo kuoma hin tekhin thu hril la, "Lalpa PATHIEN chun hieng hin a tih'" tiin hril tawl rawh:'Bel inchuon rawh, thlai suongna bel,A sunga chun tui bur rawh.
4. Sa chan sahai kha thlak la,A'n hnikna lai, a mal le a darhai leh,A ru tha tha khom thlak sa rawh.
5. Ran ruol laia a tha tha thlang la,Thukah thingher rol teu la,Soin intlok but but sien la,A ru khom hmin vong raw se.
6. Lalpa PATHIEN chun a hril:Thisen insuo hmang khawpui,Sa bel anga kang dum tah,A khir re thei lo ang chu,A chung a va hang pik ngei!A sa kha luok teu loin,A mal malin thur dok ro.
7. " 'A thisen insuohai chu,Amaah a kai zing a;Pila vur hmang el theina,Hnuoiah bun thla ta nekin,Lung chungah a bun thlak a.
8. Phuba ka lak theina dinga,Lungsenna chok thotu dingin,Tu khom vur khum lo dinginLung chungah ka buok ve a nih.
9. " 'Lalpa PATHIEN chun a hril:Thisen insuona khawpui chu,A chung a va hang pik ngei!Thing tam tak buk khum ka tih.
10. Thing her buk khum teu unla,Meiin raw hlut hlut unla,Sa chu hmin taka suongin,A bawlhlohai thlak unla,A ru tawl rakin ur ro.
11. Bel ruok chu meiling chungah,Suon loin inchuon zing ro,Bel chu hung inling vong a,A panga kophai zop thla a,A khir a kang vong chenin.
12. Sienkhom a kang khirhai chu,Nghok khopa thaw hnung khomin,A kang hmang thei hrim hrim nawh.
13. "Hur hi i porchena a na,Tleng fai ngiel ka tum che a,Sienkhom i fai thei chuong nawh;I chunga ka lungsenna hi,Ka hrikthlak vong hma khat chu,Tleng faiin um naw ti nih.
14. "Kei LALPA hin ka hril ta a. Ka chet hun a hung tlung ta a, ka kut kei ta nawng ka ta, lunginsiet ta nawng ka ta, inhnuk kir ta bok naw ning. I nungchang le thilthaw angin i chungthu chu rel ka tih' ti hi Lalpa PATHIEN thu suok a nih" tiin.
15. LALPA thu chu ka kuomah a hung tlung nawk a.
16. "Mihriem naupa, i dit lai ngawi ngawi ka lakpek thut ding che a nih. Sienkhom, i sun ding a ni naw a, i tap ding a ni bok nawh.
17. A rukin inrum la, sienkhom sun naw rawh. I lukawm kawm zing la, pheikhok bun zing bok rawh. I hmur hup naw la, ruokngha sa khom kil bok naw rawh" tiin a mi hril a .
18. Chun, zing tieng chun mipuihai kuomah thu ka hril a, zan tieng chun ka nuhmei chu a thi el ta a. A zinga chun hrila ka um ang charin ka thaw a.
19. Mipui chun, "Hieng thil i thawhai hin kan ta dingin inentir iem an nei a?" tiin an mi'n don a.
20. Chuongchun, an kuomah hieng hin ka hril a. "LALPA thu ka kuomah a hung tlung a.
21. Lalpa PATHIEN chun hieng ang hin a tih: 'Ka Hmun Thienghlim, in thlamuongpui le suong em em, in en nghok ngai lo le ngainat tawp ngai lo chu ka sukporche ding a nih. Judai rama in maksan in naunuhai le naupahai chu kawlhnamin sam an tih.
22. Ka thaw ang char hin in thaw ve ding a nih. In hmur tuom naw unla, ruokngha sa fa bok naw ro.
23. Lukawm kawm zing unla, pheikhok bun zing bok ro. Sun naw unla, mitthli intlaktir bok naw ro. Amiruokchu, in suolna lei le in lusunna leiin zur hmang in tih.
24. Chuong ang chun Ezekiel hi in ta dinga entirna ning a ta, a thaw dan ang peiin in thaw ve ding a nih. Hi hun hi a hung tlung pha chun kei hi Lalpa PATHIEN chu ka nih ti hung hre tang an tih' tiin.
25. "Chun, nang, mihriem naupa, an kulpui nghet, an hlimpui le suong, an en nghok ngai lo le lungdum chu lakpek ka ta, an naunuhai le naupahai khom la hmang bok ka tih.
26. Chu ni ngei chun Jerusalema inthoka tlan suok um sun chu Babulon-ah i kuomah hung a ta, thil tlung chanchin hung hril a ti che.
27. Chu pha chun i bau hung inhong a ta, ama chu inbiekpui i ta, to zing ta nawng i tih. Chuong ang chun an ta dingin entirna ning i ta, LALPA chu ka nizie hung hre tang an tih" a ta.
←  Ezekiel (24/48)  →